1 «Ta godee! Ne ay mala lo7o!

Neni ay mala giiga!

Ne ayfeti ne ayfeso kammiza

quraace giddora xeelliza wode

haraphphe mala lo7eettes;

ne binanay Gala7aade

zumaara duge

wodhdhiza deysha

wude misatees.

2 Istta giddon maynney baynda

mentte mentte yeliza

iskey diirettiin

meecetti keziza

booththa dorsa wudeta mala

ne achchati tana ufaysseettes.

3 Ne metershati

zo7o qacina mala lo7eettes;

ne haasayza wode

keehi ufaysseettes;

ne shagalati ayfeso kammiza

quraace giddora xeelliza wode

oroomaane nam7u kessi

phalqidaa misateettes.

4 Ne qoodhey shiyan

qoodettiza gondalleti,

ola massarati iza bolla

kaqetti beettizanne

ola miixa gidanaas

oosettida Dawite gimbe misatees;

5 Ne dhanththati mentte yelettidi,

suufe ciishshata giddon

miza genessa

laaqqata misateettes.

6 Qammay wonttana gakkanaas,

dhumay aadhdhana gakkanaas

karbbey diza zuma bollanne

exaaney iza zumbulla bolla

baada shempana.

7 Ta godee!

Ne asateththay kumeth lo7o;

ne bolla aykko wosoykka baawa.

8 Ta mishirayee! Libaanooseppe

haa duge wodhdha;

gaammoynne maahey dizaso

Amaana zumaappe,

Sanire zumappenne

Hermoone zumaappe wodhdhada

haa ya.

9 Taas siiqo michcho gidida

ta mishirayee!

Ne xeelliza xeeloynne

ne qoodhen diza alleqoy

ta wozina ekkides.

10 Taas siiqo michcho gidida

ta mishirayee!

Ne siiqoy tana ay mala ufayssizee!

Ne siiqoy woyne ushshafe

aadhdhi ufayssees;

ne shittoy ubbaafekka

aadhdhidi sawees.

11 Ta mishirayee!

Ne metershara

eessa ililoy xokkees.

Ne doonappe eessinne

maaththi pulttees;

ne may7o sawoy

Libaanoose shitto mala sawees.

12 Taas siiqo michcho gidida

ta mishirayee!

Ne taas dirsa giddon naagettiza

atakilte mala,

izas yuushoy shuurettida

pultto haaththa malanne

asi gakkontta piissa haaththa mala.

13 Ne aadhdha bizason

mal7iza miththa ayfeti kumida;

heytikka oroomaane

atakiltesohota mala.

14 Nardoosey, laadey,

sawo maataynne qarafay,

qasseka exaane mala sawiza

dumma dumma

atakilteti deettes;

haray qasse karbbey,

godare uuththa ciishshaynne

dumma dumma

sawo atakilteti mokkeettes.

15 Neni atakilte ushshiza

pultto haaththa mala;

de7o haaththi keziza olla mala;

Libaanoose zuma garsafe

goggiza shaafa

haaththa mala» gides.

16 «Pudeha bagga carkozoo! Denda!

Dugeha bagga carkozoo! Haa ya!

Ta atakilte bolla carka!

heerazi ubbay sawo tunnu go.

Ta siiqozi

ba atakilte giddo yo;

doorettida miththa

ayfetakka mo» gadus.