1 Xoossa as Musey hayqqanaappe kasetidi Isra7eele asaas woththida basse qaalay hayssafe kaalli dizayssa; 2 Musey,

«GODAY Siina zumaappe yides;

Eedoomeppe awa arshey

nu bolla poo7ides;

Paaraane zuma bollafekka

nuus xolqides;

izas ushachcha baggara

tama lacoy dees;

qooday baynda kiitanchchati

izara issife deettes.

3 GODAWU! Neni deraa

keeha siiqaasa;

geeshshati ubbayka

ne kushen deettes;

ne toho garsan

gulbati goynneettes;

histtidi neeppe

azazo ekkeettes.

4 Musey immida wogay

Isra7eele asaas

laata xinxxo.

5 Isra7eele qommoti ubbaynne

deraa halaqati shiiqiin

GODAY ba dere

Isra7eele asaa bolla

kawotides» gides.

6 Oroobeele qommota gishshas Musey,

«Oroobeele qommoti

detto attiin hayqqofetto;

istta qoodaykka

paccofo» gides.

7 Yuhuda qommota gishshas Musey,

«GODAWU, Yuhuda qommota

waaso siya;

istti ba dabbotara

issifeteththan

daana mala ooththa;

isttas gita

wolqqa imma;

istti ba morkketara

olettishin neni istta

maadda» gides.

8 Lewe qommota gishshas Musey,

«Godawu! Neni istta

Maasan paaccadasa;

Mariiba haaththa achchan

isttara palamettadasa;

hessa gishshas Tumimeynne

Urimey ne dosida

ne oosanchchatas gido.✝

9 Ne gishshas giidi

istti bana

yelidayta balida;

ba dabbotappe shaakettida;

ba ishatappe shaakettida;

ba nayta aggida;

ne qaalaa bonchchida;

ne immida

caaqo qaalaakka naagida.

10 Istti ne woththida

maaraa Yaaqoobe,

ne wogaakka Isra7eele

asaa tamaarseettes;

istti ne sinththan

exaane cuwaseettes;

xuugettiza yarshoka

yarsho yarshizasoza bolla

shiishsheettes.

11 GODAWU! Ne istta

de7o anjja;

istti ooththiza ooso ubbaan

ne ufayetta;

istta morkketa shaya

ne duuththa;

istta ixxizayti

nam7anththo dendontta mala

digga!» gides.

12 Biniyaame qommota gishshas Musey,

«GODAY siiqida asi

izan ammanetti dees;

ubba gallas

istta izi naagees;

ba hashen tookkidi

shempisees» gides.

13 Yooseefe qommota gishshas Musey,

«GODAY saloppe bukkiza iran,

biittafe pude keziza pultton

intte biittaa anjjo.

14 Awa wode kaxxiza

lo7o ayfe immo;

woden woden kaxxiza

kaththa ayfen kumo.

15 Beniisofe diza

istta zumatinne

zumbullati coranne

lo7o ayfen anjjettetto.

16 Istta biittay

lo7o miishshan kumo;

Xuugettiza tusha giddofe

qonccida GODAA

kiyateththi daro;

Yooseefey ba ishata giddon

halaqa gidida gishshas

ha anjjoti ubbay

iza gakketto.

17 Yooseefe teemay

korma boora mala yashiso;

iza kaceti

menththa kace mala

mino gidetto;

iza kaceti shiyan qoodettiza

Minaase zaretanne

tammu shiyan qoodettiza

Efreeme zareta;

he kacetan izi

kawoteththata qaycana;

biitta gaxa gakkanaas

istta izi gooddana» gides.

18 Zaabiloone qommota gishshassinne Yisakoore qommota gishshas Musey,

«Zaabiloone!

Neni ne kessan ufayetta;

Yisakoore! Nenikka

ne dunkaane giddon ufayetta.

19 Istti dereza pude

zuma bolla xeygidi

heen xilloteththa

yarsho yarshana;

banttas aqotanne

dureteth abbafenne

shaaminttafe demmana» gides.

20 Gaade qommota gishshas Musey,

«Gaade qommota zawa

aassida Xoossay galatetto;

Gaadey morkketa

menththereththanaas

gaammo mala shankkatees.

21 Halaqatas bessiza biittazi

iza naagees;

izikka lo7o biitta

baas doorides;

deraa kaaleththizayti shiiqida

wode izi GODAA shenenne

xillo pirda pirdides» gides.

22 Daane qommota gishshas Musey,

«Daaney Baasaaneppe

guppi ke7iza

wodalla gaammo mala» gides.

23 Niftaaleme qommota gishshas Musey,

«Niftaalemey GODAA

matan dosettides;

GODAA anjjonka kumides;

iza zaway abbaafe aadhdhidi

dugeha bagga gakkides» gides.

24 Aaseere qommota gishshas Musey,

«Aaseere qommoti

hara qommotappe

aadhdhi anjjettidayta gidetto;

istti ba ishata giddon

dosettidayta gidetto;

istta biittay

zayten kumo.

25 Istta katamata pengeti

birataninne xarqimalan

minni gordetetto;

ba diza layth ubbaan

istti wolqqama gidetto» gides.

26 Isra7eele asawu!

Saloppe inttena maaddanaas

ba teemara

shaara bolla hemettiza

intte Xoossa mala

hara Xoossi deenna.

27 Mernaa Xoossay

inttes duussaso;

Mernaas diza iza qeseti

inttefe garsara

diidi kaafeettes;

intte morkketa izi

intte sinththafe gooddana;

intte istta dhayssana mala

izi inttena maaddana.

28 Hessa gishshas Isra7eele

asay Saloppe iray

izin bukkiza biittayn,

kaththinne woyne ushshi

izin kumida biittayn

hirgay baynda

saron de7ana.

29 Isra7eele asawu!

Intte ay mala

anjjettida deree!

GODAY ashshida

intte malay oonee?

Izi inttes gondallenne

inttena maaddizayssa;

izan intte xooniza

giththa mashsha;

intte morkketi

intte sinththan gufannana;

intteka istti goynnizasota laallana.