1 He gallas Dibooraynne Abino7aame naa Baraaqey hayssafe kaalliza yeththaa yexxida.

2 «Kaaleththizayti

Isra7eele kaaleththishin,

dereykka ba shenen haarettishin

GODAA galatite!

3 «Intteno kawotoo! Hayssa siyite!

Intteno dere haarizaytoo! Ezgite!

Tani GODAAS yexxana;

Isra7eele GODAAS

galata mazamure yexxana.

4 «Abeet GODAWU!

Neni Seyre dereppe

dendida wode,

neni Eedoome biittafe

kezida wode,

biittay qaaxxides.

Saloppe iray bukkides;

ee, iray shaaratappe

duge bukkides.

5 GODAA Isra7eele Xoossaa

sinththaninne

Siina GODAA sinththan

zumati qaaxxida.✝

6 «Anaate naa Shamgare wodeninne

Ya7eele woden ogey samides;

zal7anchchatikka

he biittara kanththi beettenna.

Ogezara bizaytikka

ogaa aggidi harasora bida.

7 Isra7eele mandarati

asi dontta bazzo gidida.

Tani Dibooray Isra7eele asaas

aayo gidada dendana gakkanaas

xoonidi attiday baawa.

8 Isra7eele asay allaga xoossata

doorida wode,

biittan olay dendides;

oyddu tammu shii

Isra7eele olanchchata giddon

issi gondalley woykko

issi tooray beettibeenna.

9 Ta wozinay

Isra7eele daannatara dees;

asaa giddon dosan bana

aaththi immidaytara dees.

GODAY galatetto!

10 «Intteno koorettida

booththa hare toggizaytoo!

Intteno lo7o araatan utti

aleqettizaytoo!

Intteno tohon hemettizaytoo!

11 Haaththa pulttota heeran

yexettiza yeththaa siyite;

istta GODAY xoonidayssa

akeekissees;

qasse Isra7eele asay

xoonidayssa nashshees.

«GODAA asaykka

katama geliza pengetakko

duge wodhdhides.

12 ‹Diboora! Beegga! Beegga!

Beegottada mazamure yexxa.

Nenoo, Abino7aame naa

Baraaqe, denda!

Ne di7idayta ekkada

sinththe gujja.›

13 «Hessafe guye attida asati

halaqataakko duge wodhdhida.

GODAA asati olettanaas giigidi

Baraaqekko yida.

14 Kase Amaaleeqe zareti dizason diza

Efreeme asaappe

issi issi asati yida.

Qasse harati Biniyaame

zereththatappe

istta kaallida.

Maakire zaretappe daannati,

Zaabiloone zaretappe

kawoteththan uttizayti yida.

15 Yisakoore zereththafe daannati

Diboorira yida;

ee, Yisakooreynne

Baraaqeykka yida;

isttika Baraaqe kaallidi

duge zulleza wodhdhida.

Gido attiin Oroobeele zareti

qofan shaaketti wodhdhida;

Yaanaakkonne

yonttaakko sidhida.

16 Ne ays dorsa yire giddon uttadii?

dors heemmizayta

wayqeth siyanaas uttadii?

Oroobeele zareti

qofan shaaketti wodhdhida;

Yaanaakkonne yonttaakko sidhida.

17 Gala7aade zareti

Yordaanoose shaafappe

he pinththan attida;

Daane zareti

ays markabe giddon gam7idoo?

Aaseere zareti ba dizason attida;

Mediteraane abbaa lanqenkka de7ida.

18 Zaabiloone zareti

bantta shemppo

hayqos aaththi immida.

Niftaaleme zaretikka

isttaththoka

ola demban ooththida.

19 «Kawoti yiidi

Magiddo pulttota matan diza

Ta7inaaken ola oykettida.

Kanaane kawotikka heen olettida;

di7i ekkanaas

aykko miishshika

demmibeettenna.

20 Salo xoolintteti izara olettida.

Bantta hanotan Sisaarara

ola qaqaphu gida.

21 Beni Qisoone shaafaa kixay

istta denththi efides;

isttika haron meecetti dhayda;

Ta shemppoyee minna;

wolqqankka sinth gujja.

22 Hessafe guye toga asati

togan adaraasi yida.

Toga parata giirissay

dada giirissa mala.

23 GODAA kiitanchchay,

‹Merooze qanggite!

heen diza asaa issife qanggite!

Gaasoykka istti GODAA asaa

olan maaddontta ixxida.

Wolqqama istta morkketara

olettanaas kezibeettenna› gides.

24 «Qenaawe dere as

Heebere machchiya

Ya7eela maccassa ubbaafe

anjjettidaaro gidu.

Dunkaane giddon diza

maccassa ubbaafe

iza anjjettidaaro gidu.

25 Sisaari izo,

‹Tana haath ushsha› gi woossides;

iza gidikko

meqa maath shiishshadus;

lo7o wancan izas immadus.

26 Issi kushen dunkaana dhishke,

ushachcha kushen

oosanchchata qoyxe oykkadus;

Sisaara hu7en dhishkadus;

hayththa corcorora

lukka kessadus.

27 Bolqu gi kundides;

izi toho garsankka gufannides;

he kundida sohon hayqqides.

28 «Sisaara aayeya

maskootera be7adus;

maskoote xoo7erakka

tishshi histta xeellashe,

‹Ta naaza para-gaarey

ays gam7idee?

Para-gaareti eesotidi

ays simmibeettennee?›

gaada waassa oychchadus.

29 Aadho erateththi diza

izi maccassati

izi oyshaa zaarida;

gido attiin iza ba qofan baas,

30 ‹Istti di7idi ehidayssa

gishetti ekkishin

issaade issaade

issi issi geela7oy woykko

nam7u nam7u

geela7oti gakkeettes.

Sisaaras istti dumma dumma

qalamen oosettida

aleqo may7o immana;

qasse taaska qoodhen xaaxanaas

xilifen alleqidi lo7iza

may7ota ehana› gadus.

31 «Abeet GODAWU!

Ne morkketi ubbay

hessaththo hayqqetto!

Gido attiin ne siiqoti

maalado mokkiza

arsheda phoolletto.»

Hessafe guye biittay oyddu tammu layth woppa demmides.