Mateus 21

Yesusi Gita Bonchchon Yerusalaame Gelides

1 Istti Yerusalaame matan Dabrazayte zuma bolla diza Betefaage geetettizaso gakkida mala Yesusi bana kaallizaytappe nam7ata kiittides. 2 «Hanno intte matan diza gutayo biidi intte hee gakkida mala issi hare dizaara ba gutteyra qashetta dishin intte demmana. Birshidi haa taakko ekki yiite. 3 Oonikka inttena, ‹Ays hayssaththo ooththeetii?› giikko ‹Goday istta koyees› giite; inttena oychchizaadey heerakka yeddana.

4,5 «Hayssika hanizay kase naben

Xiyoonis hizgite,

‹Hekko! Ne kawoy ashke gididi

hareyonne harey gutteyo

toggidi neekko yaana›

geetettidayssi polettanaassa» gides.✝21:5 Zaka 9:9

6 Iza kaallizayti Yesusi isttas yootida mala ooththida. 7 Hareyo izi gutteyra ehidi ba may7o istta bolla woththiin izikka hareta toggides.*21:7 Hareta toggides: Hareta toggides gizayssi NIV garsan dees; haray qasse tinbitey polettana mala hare gutte bolla uttides gees bagga geeshsha maxaafay.

8 Deraappe dariza baggay ba may7o oge bolla miccides; bagga asay miththa boncco duuththi duuththi oge bolla aaththi aaththi yeggides. 9 Izappe sinththara biza dereynne guyera kaalliza dereykka ba qaala dhoqqu histtidi,

«Hoosa7inna! Dawite nay galatetto!

Godaa sunththan

yiday anjjettidaade!

Xoossi galatetto!» gida.*21:9 Hoosa7inna Ibraaweta qaalara Hoosa7inna guussi, «Atoteth» «Nuna ashsharkkii!» guussa.

10 Izi Yerusalaame gelida mala katama asay wuri, «Hayssi oonee?» giidi yark yarkides.

11 Iza kaallidi yida derezikka, «Hayssi Galila giddon diza Naazireteppe yida Nabe Yesusa gidennee?» gides.