1 He aginan nam7u tammanne oydanththo gallas Isra7eele asay issi bolla shiiqidi ba nagara gishshas keehi modhettidayssanne ceecidayssa qonccisiinaas maaqa may7idi ba hu7e bolla gudulla laallidi xoomides. 2 Isra7eele asay allaga asaa ubbaafe bana shaakkides; hessafe guye asay wuri dendi eqqidi isttinne kase istta aawati ooththida nagara ubbaa paaxida. 3 Heen istti eqqida mala dishin istta Xoossa woga maxaafay heedzdzu saate kumeth isttas nababettides; qasse hara heedzdzu saate kumeth istti ba nagara paaxishe GODAAS ba Xoossaas hokki goynnida. 4 Lewe baggataska eqqiza madirakey dees; he madirakeza bolla Iyaasoy, Baaney, Qadim7eeley, Shebaaniyay, Buuney, Sherebiyay, Baneynne Kanaaney eqqidi ba qaala dhoqqu histtidi GODAA bantta Xoossako woossida. 5 Iyaaso, Qadim7eele, Baane, Hashabinaye, Sherebiya, Hoddiya, Shebaaniyanne Pattaya geetettiza Lewe bagga asati,

«Intte dendi eqqidi mernaa GODAA

intte Xoossaa galatite;

galatappenne anjjofe

dhoqqu dhoqqu gida

bonchchettida Xoossa sunththa

sabbite» gida.

6 Hessafe guye Isra7eele asay,

«Xoossoo, ne xalla Goda;

Salonne salo bolla dizayta,

sa7anne sa7a bolla dizayta,

gita abbanne iza giddon dizayta

ubbaa medhdhiday nena.

Ubbaas de7o shemppo immadasa;

Salo medheteththati ubbay

nees goynneettes.

7 GODAWU, neni Xoossa!

Neni Abraame Uure geetettiza

Kaladaawe dereppe doorada

xeyga kessadasa;

iza sunththaaka

Abrahaame gadasa.✝

8 Izi nees ammanettida as

gididayssa beyada

izara caaqettadasa;

Kanaane asay, Hiite asay,

Amoore asay,

Paarize asay, Yaabuse asaynne

Gergese asay

izan diza biitta,

iza zereththatas

duussa biitta gidana mala

laatissanaas caaqo

qaala geladasa;

neni xillo gidida gishshas

ne caaqo qaala minththa naagadasa.✝

9 «Neni nu aawata bolla

kase Gibxe biittan gakkida

waayeza beyadasa;

istti Zo7o abba matan dishe

maado koyidi

nena woossida woosaa siyadasa.✝

10 Gibxe kawo bolla,

shuumeta bollanne

he biittan diza asaa

kumeththa bolla

gita malaatata qonccisa bessadasa.

Hessa ne ooththiday kase nu aawata

Gibxe asay ay mala isttas

menxe iitidi waayisidaakko

ne be7ida gishshassa;

ne hessa ooththoyssa gaason

hach gakkanaas

ne sunththay bonchchon

xeygettana mala ooththadasa.✝

11 Istta sinththan abbaa

nam7u kessa shaakkada,

mela biittarakka

istta pinththadasa;

Shuch duge ciimma haaththa

giddon yeggiza mala

istta gooddizayta ciimma

haaththa giddo yeggadasa.✝

12 Gallas tuussa mala eqqida shaaran,

omarsi tuussa mala

taman poo7isada

istti baanaas bessiza ogera

baana mala kaaleththadasa.✝

13 «Saloppe duge

Siina zuma bolla wodhdhada

ne dereza haasayssadasa;

lo7o wogatanne suure timirteta

ne isttas immadasa.

14 Geeshsha ne Sambata

istti bonchchana mala

tamaarsadasa;

Ne azazota, wogatanne maarata

ne oosanchcha Muse baggara

isttas immadasa.✝

15 Istti gafettida wode

saloppe kath immadasa;

istti saamettida wode haath

zaallafe isttas pulttisadasa;

qasse ne isttas immana gaada

caaqqida biittaa gelidi

ekkana mala azazadasa.✝

16 «Kase nu aawati otoranchchanne

wozina muume gidida gishshas

ne azazo naagibeettenna;

17 Nees azazettibeettenna;

ne isttas ooththida gita

malaataakka ubbaa dogida;

wozina muume gidida;

qasse guye Gibxe aylleteththan

zaarana mala

banttana kaaleththiza

as doorida.

Gido attiin neni siiqon

kumida Xoossa,

hanqos takkiza Xoossa,

atto giza Xoossa,

kiyanne maariza

Godaa gidida gishshas

ne istta aggabeekka.✝

18 Mara leemison baas eeqa

xoos ooththidi,

‹Gibxe biittafe

nuna kaaleththidi kessida

Xoossi hayssako!› gida.

Ne sunththaaka ay mala

mooro mooridoo!✝

19 «Ne maarotay gita gidida gishshas

istti heen bazzo biittan dhayi

attana mala aggabeekka;

gido attiin istti gallas

tuussa mala shaaran

omars tuussa mala taman

istti baanaas bessiza ogera

istta kaaleththo aggabeekka.

20 Lo7o gidida ne Ayana

istta tamaarsana mala immadasa;

isttas maana mala manna,

uyana mala haath immadasa.

21 Oyddu tammu layth kumeth

istta bazzo biittan maaddada

isttas koshshiza miishshe

issinokka diggabeekka;

istti may7ida may7oy

wuribeenna;

qasse istta tohoykka

puuribeenna.

22 «Istta deraa yuuyi

aadhdhi diza deretanne

istti kawoteththata ubbaa

xoonidi he biitta

ekkana mala ooththadasa;

hessa gishshas

kawo Sihooney ayssiza

Haseboone geetettiza biittanne

kawo Aagey ayssiza

Baasaane geetettiza biitta

xoonidi laattida.✝

23 Isttas qooday salo xoolintte mala

darida nayta immadasa;

kase istta aawatas ne immana ga

qaala gelida biittaa

istti xooni laattana mala

ooththadasa.✝

24 Istta nayti Kanaane biitta

xooni laattida;

he biittan diza asata

neni xoonadasa;

istta kawota bollanne Kanaane

biittan diza asaa bolla

ba dosida mala ooththana mala

wolqqa immadasa.✝

25 Qasse lo7i gimbettida

katamatanne aradda biitta,

lo7o miish

isttan kumida keeththata,

haaththa ollatanne

woyne atakiltey tokettiza gade,

wogara miththatanne daro ayfe

ayfiza miththata laattida;

Miidinne uyidi modhdhida;

neni ne kiyateththan immida

lo7o miishshan wuri ufayettida.✝

26 «Gido attiin istti ne bolla makkallida;

‹Ne qaalaska azazettoko› gida;

ne wogaa siyokko giidi

nees zokko zaarida;

qasse istti neekko zaarana giidi

seeri tamaarsida nabeta wodhida;

ubba wode ne bolla

cashsha qaala haasayda.

27 Hessa gishshas istta morkketi

istta xoonidi haarana mala

aaththa immadasa;

morkketikka istta metoththida;

istti banttana metida wode

neekko waassida;

nekka istta waasaa

salon daada siyadasa;

ne maaroteththa gitateththaafe

dendidayssan

istta morkketappe ashshana

kaaleththizayta yeddadasa.

28 «Gido attiin saro demmida wode

qasseka simmi nagara ooththida;

hessa gishshas ne istta morkketas

aaththa immadasa;

istta morkketikka istta haarida;

gido attiin ne maaddana mala giidi

neekko simmi woossida wode

salon dashe istta woosaa siyadasa;

neni ne qadheteththafe

dendidayssan

istta ubba wode maaddadasa.✝

29 Ne qaalaakko simmana mala

neni istta seeradasa;

gido attiin ba otoroteththafe

dendidayssan

ne azazota kadhida;

istti azazettidaakko

isttas de7o immiza

ne wogata bolla nagara ooththida.

Istta wozinay muumida gishshas

ba sinth haraso zaarida;

qasse ba wozina muumisidi

ne azazota ixxida.✝

30 Daro layth ne istta dandayadasa;

istta tamaarsana mala nabeta

ne Ayanan isttas denththadasa;

gido attiin istti lo7eththi

siyibeettenna;

hessa gishshas istta dere

matan diza asati

xoonana mala

istta aaththa immadasa.✝

31 Gido attiin ne maaroteththa

gitateththaafe dendidayssan

istta aggabeekka;

Ne kiyanne atto giza

Xoossaa gidida gishshas

istta dhayssabeekka.

32 Gita, wolqqamanne yashshiza

nu Xoossawu!

Neni ne caaqo qaalanne

mernaa gakkanawu diza

ne siiqo naagaasa;

nu bolla, nu kawota bollanne

nuna kaaleththizayta bolla

nu qeeseta bollanne nu nabeta bolla

nu aawata bolla,

qasseka dere ubbaa bolla,

Asoore kawotappe doommidi

hach gakkanaas gakkida meto

ubbaa ne qoppa.✝

33 Ne nuna qaxxayana gaada

ne ooththidayssi wuri likke;

nuni nagara ooththikokka

neni ne ammaneteththan

minna eqqadasa.

34 Kase nu aawatinne

nu kawoti,

nuna kaaleththizaytinne nu qeeseti

ne wogaa naagibeettenna;

qasse ne isttas immida

azazotanne

seera zore siyibeettenna.

35 Ne istta kawoteththan

isttas gita anjjo immadasa;

araddanne aaho biitta

isttas immadasa;

gido attiin istti

ba nagarappe simmidi

nees goynnibeettenna.

36 Hessafe dendidayssan

ne nu aawati

ayfeyo maana malanne

lo7o miishshan ufayettana mala

ne isttas immida biittan

hach nu aylle gididos.

37 Nuni nagara ooththida gaason

neni nu bolla kawoththida kawoti

nu biitta anjjo ubbaa

istti go7etteettes;

qasse nu bollanne nu meheta bolla

ba koyida mala ooththeettes;

hessafe dendidayssan

nuni ha7i gita waaye bolla doos.

38 «Hanida yo7o ubbaas nuni Isra7eele asay qaalan gaaggidayssa xaafi woththanaas qaala qachchidos; nu qachchiin xaafettida qaala bolla nuna kaaleththizayti, Lewe baggatinne nu qeeseti ba maatame shocida» gida.