1 Balaamey Baalaaqe, «Ne taas hayssan laappun yarsho yarshanaasota ooththa; qasseka laappun korma booratanne laappun dorsa dharshota taas haa ekka ya» gides. 2 Balaaqey Balaamey izas yootida mala ooththides; istti nam7ay yarsho yarshizasohota bolla issi issi korma booranne issi issi dharsho yarsho shiishshida. 3 Hessafe guye Balaamey Balaaqes, «Xoossi haa taakko Yaanaakkonne yonttaakko tani gede baada erana gakkanaas neni hayssan xuugettiza yarshoza achchan eqqaashsha; GODAY taas qonccisikko hessa ta nees wursa yootana» gides; hessafe guye Balaamey barkka pude dhoqqaso kezides. 4 Heen Xoossi izara gayttides; Balaameykka, «Tani laappun yarsho yarshizasohota giigsadis; yarsho yarshizasohota issaa issaa bolla issi issi korma booranne issi issi dharsho yarshadis» gides.

5 GODAYKKA Balaamey Balaaqes yootanaas bessiza kiita izas yootidaappe guye Balaaqekko simmi baana mala yootides. 6 Izikka guye simmi bishin Balaaqey Mo7aabe ayssiza daannata ubbaara issife he xuugettiza yarshoza achchan eqqida mala demmides. 7 Hessafe guye Balaamey haasaya doommidi,

«Mo7aabe kawo Balaaqey

arshey mokkiza baggara diza

zumati diza Aaraameppe

tana xeygi ehides;

izi tana,

‹Haa yaada Isra7eele asaa

taas doqqarkkii!

Istti dhayana mala

taas istta qanggarkkii!› gides.

8 Histtiin tani Xoossi

qanggonttaade wostta qanggoo?

Xoossi hilonttaade

tani wostta hiloo?

9 Tani istta hayta

gita zaallata bolla

dashe demmays;

dhoqqa zumata bolla dashe

ta istta xeellays;

istti barkka diza kawoteth;

istti bana

hara kawoteththara gaththi

qoodonttayssi taas beettees.

10 Gudulla mala corida

Yaaqoobe zereththaa

qoodi dandayanay oonee?

Woykko Isra7eeles cigozakka

qoodi kanththanay oonee?

Xillo asata hayqo

ta hayqqana;

ta wurseththayka

istta wurseththaa mala gido» gides.

11 Balaaqey Balaames, «Hayssi ne ta bolla ooththidayssi aazee? Tani nena haa ehiday ne ta morkketa qangganaassa; neni gidikko istta anjjo anjjadasa attiin qanggabeekka» gides.

12 Balaameykka zaaridi, «GODAY taas qonccisidayssa xalla ta yootanaas bessennee?» gides.

13 Balaaqey Balaames, «Isra7eele asaa kumeththaa gidontta isttafe guuththati nees beettizaso gede haraso tanara issife baada ne istta heen taas qanggarkkii!» gides. 14 Hessafekka pude Pizga zumaa hu7en diza Xoofime demba efides; heenkka laappun yarsho yarshizaso giigsidi issi issi yarshizasoza bolla issi issi korma booranne dharsho yarshides.

15 Balaamey Balaaqes, «Neni hayssa xuugettiza yarshoza matan eqqaashsha; tani GODAARA gayttana gede bays» gides.

16 GODAYKKA Balaamera heen gayttides; izi yootana kiitaa izas yootidi neni Balaaqekko simma baada hayssa ha kiitaa izas yoota. 17 Izi simmi bishin Balaaqey Mo7aabe dereza kaaleththizaytara he xuugettiza yarshoza matan eqqida mala demmides; Balaaqeyka GODAY izas ay yootidaakko iza oychchides.

18 Balaameykka izas haasaya doommishe,

«Xipoora naa Baalaaqe!

Haa shiiqa!

Tani nees yootizayssa siya.

19 Xoossi asa mala wordotenna;

iza qofay

asa qofa mala laamettenna;

izi ba immida hidota

ubbaa polees;

izi ba yootida

ubbaa ooththees.

20 Izi taas

ta anjjana mala yootides;

Xoossi anjjida qaalaa

tani laammanaas dandaykke.

21 Yaaqoobe zereththa bolla

metoy gakkenna;

Isra7eele asaa bollaka

waayey gakkonttayssi

taas beettees;

GODAY isttara dees;

Xoossi kawo gididayssa

istti qonccen yooteettes.

22 Xoossi istta

Gibxeppe kessides;

izi isttas

menththa mala qaycana.

23 Yaaqoobe nayta bolla

ay bitay,

Isra7eele bolla

ay muurennoyka ooththenna;

hekko ha7i Yaaqoobessinne

Isra7eeles,

‹Xoossi istti ay ooththidaakko

ane xeellite!› geetettana.

24 Isra7eele asay

macca gaammo mala dendana;

ba shankkati ehidayssa montta,

suuththaaka uyontta dishe

shempontta gaammo mala

dendana» gi yootides.

25 Hessafe guye Balaaqey Balaames, «Neni Isra7eele asaa qanggontta ixxida mala istta anjjoka anjjofa!» gides.

26 Balaameykka, «Tani kase nees GODAY taas yootooro xalla ta ooththana gaada yootabeekkinaa?» gides.

27 Balaaqeyka, «Haa ya ane hayssafe haraso boos; oonee erizay neni heen daada hayssa dereza taas qanggana mala Xoossi nees ero gontta aggenna» gides. 28 Hessa gishshas Balaaqey Balaame gede bazzo ginara diza Pe7oore zumaa hu7e ekki kezides. 29 Balaameykka iza, «Hayssan taas laappun yarsho yarshizaso giigsa; laappun korma booratanne laappun dharshota haa taas ekka ya» gides. 30 Balaaqeyka Balaamey izas yootida mala ooththides; yarsho yarshizasoza bolla issi issi korma booranne issi issi dharsho yarsho shiishshides.