1 Abdiyuy be7ida ajjuuta;

GODAY Eedoome gishshas

Abdiyu kiittides;

nu siyida Xoossa kiitay,

«Tani Xoossay Eedoome bolla

meto gaththana mala azazada

deraa giddo as kiittadis» gees.

2 GODAY Eedoomes,

«Ta nena dere asaappe laafisana;

neni as ubbaan

leqettidaaz gidana.

3 Nenoo zaalla gomppan dizayssoo!

Ne duussaso dhoqqasohon

keexxidayssoo!

‹Ta dizasoppe tana ziqqaso

woththana dandayzay oonee?›

gizayssoo!

Ne wozina otoroteththi

nena baleththides.

4 Ne golle kafo mala

keeha pude piradhdhikokka,

ne keeth xoolintte giddon

keexxikokka

ta nena heeppe

haa duge woththana.

5 «Kaysoti woykko bonqqizayti

omars yiikko

baas gidizayssa ekkeettes;

Kath maxizayti piixe ashsheettes;

gido attiin ne morkketi

issinokka ashshettenna.*

6 Intteno Eesawe zereththatoo!

Intte keeth bonqqettides;

hekko intte haaroy wuri

bogettides.

7 Nenara caaqettida laggeti

nena baleththida;

nena dosiza laggeti

ne bolla morkketeththan dendida;

ne kath midayti nees yarde

woththidi nena

ne dereppe gooddida;

gido attiin istti hessa ne bolla

ooththishin neni erabeekka.

8 «He wode Eedoomeppe

aadho eranchchata,

Eesawe zumaappe

erateth dhayssana.

9 Eedoome deren de7iza

asati wurikka hayqqana;

Temaane oliza wolqqama

olanchchati babbana.

10 «Ne isha Yaaqoobe zereththata

neni gene wodhida gishshas

ne kawuyada mernaas dhayana.

11 Yerusalaame morkketi

penge menththidi

haarida miish ubbaa

bonqqiza wode

neni lanqera eqqa xeelladasa;

hessa gishshas Yerusalaame bolla

saama yeggi gishetti

ekkidaytappe

neni dummatakka.

12 Yuhuda deren de7iza ishata bolla

gakkida meton neni ufayettana

koshshennashin ufayettadasa;

qasse istta dhayoninne meton

ufayettananne otorettana

nees bessennashin otorettadasa.

13 Ta derey dhayza gallas

istta pengera

neni gelana bessennashin;

istti dhayza gallas metotishin

neni ufayettana bessennashin;

qasseka istti dhayza gallas

ne istta haaro

boggana nees bessennashin.

14 Goodettidi qotettidayta wodhana

ne oyddu oge bolla

naagana bessennashin naagadasa;

qasse attida asata

meto gallas ne aaththa

immanaas bessennashin

immadasa.✝

15 «Ta Xoossay asa ubbaa bolla

pirdiza wodey gakkida gishshas

Eedoomee! Ne ooththida

iita oosoy

ne bolla simmana;

hessa gishshas ne ooso mala

ne ekkana.

16 Anjjettida ta zuma bolla

intte waaye ushshu uyida mala

intte yuushon diza hankko derey

waaye ushshu uyana;

uyidayti wurikka dhayana.

17 «Xiyoone zuman metoppe

attanay daana;

he zumayakka geesh gidana;

Yaaqoobe derey bonqqettida

ba haaro zaari ekkana.

18 Yaaqoobe zereththati tama mala,

Yooseefe zereththati

tama laco mala gidiin

Eesawe zereththati

uttula mala gidana;

tamay uttula miza mala

Yaaqoobe zereththatinne

Yooseefe zereththati

Eesawe zereththata dhayssana.

19 «Yuhuda dereppe

dugeha baggara diza

Negebe asay Eedoome

biitta laattana;

arshey wulliza baggara

gadhan diza asati

Filisxeeme, Efreemenne

Samaariya biitta laattana;

qasse Biniyaame zereththati

Gala7aade biitta laattana.

20 Beti bida Isra7eele asay

Alahe geetettiza

dereppe simmidi

Kanaane biittafe

Sirafta gakkanaas

diza biitta laattana;

bete biidi Sirafta deren diza

Isra7eele asay

Negeben diza katamata laattana.

21 Attida Isra7eele asati

Xiyoone zumaa bolla uttidi

Eedoome dere ayssana;

qasse kawoteththayka

Xoossas gidana» gi yootides.