Zakaraasa Tinbite 9

Isra7eele Asa Morkketa Bolla Yaana Pirda

1 Isra7eele asa ubbaa ayfey

pude GODAAKKO xeellees;

hessa gishshas GODAY

kase yooti woththida mala

Sedireeke bollanne

Damasqo bolla pirdana.✝9:1 Isa 17:1-3; Er 49:23-27; Amo 1:3-5

2 Ha pirdazikka Damasqo zawan diza

Hamaate bolla,

aadho erateththi diza

Xiroose katamata bollanne

Sidoona katamata bolla gakkana.

3 Xiroose katamaya baas mino

miixa giigsadus;

bira biitta mala,

worqqaka gudulla mala

shiishsha guuppadus.

4 Gido attiin GODAY

iza guuppidayssa

woththi ekkana;

izis abba giddon diza wolqqa

ubbaa dhayssana;

izakka taman xuugetta dhayana.✝9:1-4 Isa 23:1-18; Hizi 26:1—28:26; Iyu 3:4-8; Amo 1:9-10; Mato 11:21-22; Luqa 10:13-14

5 Asqeloonay hessa be7idi yayyana;

Gaazay meton un7ettana;

hessaththoka Aqarooney

hidotakka qanxxana;

Gaazay qasse

kawoy bayndaaro gidana;

Asqeloonay bula gidana.✝9:5-7 Isa 14:29-31; Er 47:1-7; Hizi 25:15-17; Iyu 3:4-8; Amo 1:6-8; Sofo 2:4-7

6 Walaka derey Azaxoone oykkana;

ceeqettiza Filisxeeme asaa

ta dhayssana.

7 Tani istta doonappe suuth,

istta gacoppe montta mala

digettida kath diggana;

hankko attidayti ta dere gidana;

Yuhuda biittan halaqatana;

Aqaroone asaykka

Yaabuse asa mala gidana.

8 Tani gidikko ta keeththa

bonqqiza wolqqamatappe naagana;

hayssafe guye un7eththizay

ta deraa laattenna.

Tani ha7i minna naagays.

Buro Yaana Xiyoone Kawo

9 Hanne Xiyoone nayee

keeha ufayetta.

Hanne Yerusalaame nayee

ufayssan ilila;

xillonne ashshiza ne kawoy

ashke gididi hareyonne

harey gutte toggidi neekko yees.✝9:9 Mato 21:5; Yoha 12:15

10 Para-gaareta Efreemeppe

ola parata Yerusalaameppe

ta ekka dhayssana.

Tani ola toorata

menththereththana.

Saroteth kawoteththatas awajjana.

Izi abbaafe abban

gakkanaas haarana;

Efiraaxise shaafappe sa7a gaxa

gakkanaas izi ayssana.✝9:10 Maza 72:8

11 Ta nenara suuththan

caaqettida caaqoza gishshas

haaththi baynda ollan

qashettida asata

ta birshada yeddana.✝9:11 Kessa 24:8

12 Intteno hidotay diza qasho asatoo!

Intte kase diza miixan simmite;

kase inttes diza aqota

dakko histta ta inttes zaarana.

13 Yuhuda wondafe mala

Efreemekka yiishsha mala

ta go7ettana;

hanne Xiyoone tani ne nayta

Girike dere bolla

denththeththana;

nenakka tani wolqqama

mashsha mala

histta go7ettana.

Goday Qonccana

14 GODAY istta bolla qonccana;

iza yiishshay wolqqanththa mala

popol7u gaana;

Ubbaafe Wolqqama GODAY

xurumba punnana.

Dugehappe keziza gote carko mala

izi baana.

15 Ubbaafe Wolqqama GODAY

isttas gondalle gidana;

istti ba morkketa

ubbaa dhayssana;

istti yanbarshan

olizayta yedhdhana;

istti woyne ushshu

uyida asa mala waassana;

yarsho suuththi kere kumi

yarshosoho bolla gukkiza mala

istta morkketa

suuththika gukkana.

16 He wode GODAY istta Xoossay

ba deraa baas wude mehe

histti ashshana;

kallachcha bolla diza

seeloy xolqiza mala

isttika Xoossa deren phoollana.

17 Istti ay mala lo7onne

puula as gidaneeshshaa!

Kaththi naateththata

woyne ushshi geela7ota

anqarsana.