Mateus 4

ಸೈತಾನಾನಿ ಯೇಸುಚಿ ಪರಿಕ್ಷಾ ಕೆಲ್ಯಾಲಿ

1 ತವಾ ದೇವಾಚಾ ಆತ್‌ಮ್ಯಾನಿ ಸೈತಾನಾಪ್ನಿ ಪರಿಕ್ಶೆ ಕರಾಯಾ ಯೇಸುಲಾ ರಾನಾತ್ ನೆಲಾ. 2 ಆನಿ ತ್ಯನಿ ಚಾಳಿಸ್ ರ‍್ಯಾತ್ ದೀಸ್ ಉಪಾಸ್ ಕೆಲಾ ನಂತರ್ ತ್ಯಲಾ ಖುಬ್ ಬುಕ್ ಲಾಗ್ಲಿ. 3 ತವಾ ತ್ಯಚಿ ಪರಿಕ್ಶೆ ಕರಾಯಾ ಸೈತಾನ್ ಯವುನ್, "ತು ದೇವಾಚಾ಼ ಲ್ಯೊಕ್ ಹಾಸ್ತ ಹ್ಯಾ ದೊಂಡ್ಯಾಚಾ ಬಾಖರ‍್ಯಾ ಹೊ ಮನ್ಹುನ್ ಸಾಂಗ್. " ಮನ್ಲಾ.

4 ಯೇಸುನಿ ತ್ಯಲಾ,

"‘ಮಾನುಸ್ ನಿಸ್ತೆ ಬಾಕ್ರಿನಿ ಜ಼ಗತ್ ನಾಹಿ,

ಮಾನ್ಸಾಚ಼ಾ ಜೀವ್ನಾ ದೇವಾನಿ ಸಾಂಗ್‍ಲ್ಯಾಲೆ ಪರತೇಕ್ ಬುಲಿಲಾ ಆಧಾರ್ ಜಾ಼ಲ್ಯಾ’

ಮನ್ಹುನ್ ಪವಿತ್ರ ಪುತೀಕಾತ್ ಲಿವ್‍ಲ್ಯಾ" ಮನ್ಹುನ್ ಜ಼ಬಾಬ್ ದಿಲಾ

5 ತವಾ ಸೈತಾನಾನಿ ಯೇಸುಲಾ ಪವಿತ್ರ ಯೆರುಸಲೇಮ್ ಪೆಠತ್ ಹಾಕ್ಟುನ್ ನಿಹುನ್ ದೇವ್ಳಾಚಾ ಟೊಕಾವ ಉಬಾ ಕರುನ್ 6 ತು ದೇವಾಚಾ಼ ಲ್ಯೊಕ್ ಆಸ್ಲಾಸ್ತ ಹಿತ್ನಿ ಖಾಲ್ ಉಡಿ ಮ್ಯಾರ್.

ದೇವ್ ತುಜಿ ಸಾಟಿ ಆಪ್‍ಲ್ಯಾ ಧುತಾನಾ ಹುಕುಮ್ ದಿಯಿಲ್.

ತುಜ಼ ಪ್ಯಾ ದೊಂಡ್ಯಾನಾ ಆದ್ಳಾಚೆ ಆಂದಿ

ತೇ ತುಲಾ ಹತಾತ್ ಉಚ್ಲು಼ನ್ ದರ್ಥಿಲ.

ಮನ್ಹುನ್ ಪವಿತ್ರ ಗ್ರಂಥಾತ್ ಲಿವ್‌ಲ್ಯಾ ನವ್ಹ. ಮನ್ಲಾ.

7 ತ್ಯಲಾಸ್ ಯೇಸುನಿ,

"ತುಜಾ಼ ದೇವ್‍ ಜ಼ಾಲ್ಯಾಲ್ಯಾ ಪ್ರಭುಚಿ ಪರಿಕ್ಶೆ ಕರು ನಕೊಸ್"

ಮನ್ಹುನ್ ಪವಿತ್ರ ಪುತೀಕ್ ಸಾಹಿತ್ ಆಸ ಸಾಂಗ್ತ" ಮನ್ಹುನ್ ಜ಼ವಾಬ್ ದಿಲಾ

8 ಮಂಗ್ ಸೈತಾನಾನಿ ಯೇಸುಲಾ ಮೊಟ್ಯಾ ಗುಢ್ಯಾವ ನಿಹುನ್ ಪರಪಂಚಾತ್ಲ ರಾಜೆ ಸಗ್ಳ ಆನಿ ತ್ಯಚಿ ಸಗ್ಳಿ ಸೊಭಾ ದಾವುನ್, 9 ಸೈತಾನ್ ಯೇಸುಲಾ ತು ಮನಾ ಆರಾದನ್ ಕೆಲ್ಯಾವ ಮಿ ತ್ಯ ಸಗ್ಳ ತುಲಾ ದಿಯಿನ್ ಮನಲಾ.

10 ಯೇಸು ಸೈತಾನಾಲಾ, "ಮಾಜಿಪ್ನಿ ಜಾ಼!

ತುಜಾ಼ ಪ್ರಭು ತುಜಾ಼ ದೇವ್ ತ್ಯಲಾ ಆರಾದನ್ ಕರ್ ಆನಿ ತ್ಯಚಾ ಪಾಯಾ ಪಡ್

ಮನ್ಹುನ್ ಪವಿತ್ರ ಪುತೀಕಾತ್ ಲಿವ್‌ಲ್ಯಾ" ಮನ್ಹುನ್ ಸಾಂಗ್ಲ.

11 ತವಾ ಸೈತಾನ್ ಯೇಸುಲಾ ಸುಡುನ್ ಗೆಲ ಆನಿ ಥೊಡ್ಯಾ ದೇವ್ ದುತಾಂಚಾನಿ ಯವುನ್ ತ್ಯಚಿ ಸೇವಾ ಕಿಲಿ.