1 हे प्रिय दोस, अब मी तोखे या दूसरी चिठ्ठी लिखुस हय, अरु दो मे याद दि खे तुमारो शुध्द मन खे जागृत करुस हय, 2 कि तुम वा बात खे जो पवित्र भविष्यव्दक्ताहोन ने पैयले से कुछ हइ, अरु प्रभु उद्धारकर्ता कि वा आज्ञा खे याद करस जो तुमारा प्रेरित का वजेसे दियो गयो थो. 3 सब से पैयले यो समजी ले कि आखरी दिन मे हसी उडान आलो आयोस जो अपनी या अभिलाषाहोन का जसो चल्यो 4 अरु बोल्यो, "वोने आन कि प्रतीज्ञा करी थी, बोल्यो हइ वु? हमारो बापदादा से पैयले से मरी चुक्यो हइ, पर जबसे सृष्टि बनय हइ सब बात वसी की वसी चली अय रही हइ." 5 वे तो जानी बुजी खे यो भुली गयो कि परमेश्वर का वचन का वजेसे बद्दल पैयले काल से बनय गयो हइ अरु पृथ्वी भी पाणी मे से बनी अरु पाणी मे रुखोस हइ, 6 यो कारण वु युग को जगत पाणी मे डुबी खे खत्म हुय गा. 7 पन बद्दल अरु पृथ्वी जो आज अस्तित्व मे हइ वोका आदेश का वजेसे अंगार का वजेसे खतम होन का लिये सुरक्षित हइ येखे वु दिन का लिये रख्यो जय रो हइ जब अन्यायी दुन्या को न्याय हुये अरु वे खतम करी दियो जाह्ये.

8 हे प्रेम दोस, या एक बात खे मत भुलनु की प्रभु कि नजर मे एक दिन हजार साल मे कोय फरक नी हइ. वोका लिये यो दिन भी बराबर हइ. 9 प्रभु अपनी प्रतीज्ञा का बारे मे देर नी कर्हे जसी कुछ दुन्या समजस हइ. पन तुमारा बारे मे धिर धरस हइ, अरु नी चाह्ये, कि कोय खतम हुये. क्युकी यो सब को मन फिराव को अवसर मील्हे.

10 पन प्रभु को दिन चोर का जसो अय जाह्येका वु दिन बद्दल गर्झना का सात नी दिखानो हुय जाह्ये वो का बाद बद्दल कि सब चिज पानी खे खतम हुय जाह्ये अरु पृथ्वी अरु वोका पर की बात गायब हुय जाह्ये. 11 जब कि ये सब चिजहोन, या रीति से खतम होन वाली हइ, ते तुमखे कोय रंग का दुन्या जिवन पवित्र अरु परमेश्वर का तरप सर्मपित होनो चाह्यो. 12 अरु परमेश्वर को वु दिन कि रस्ता कोय रीति से देखनो चाह्यो अरु वोखे झल्दी आन का लिये कोय इजा करणो चाह्यो, जो कारण बद्दल अंगार से खतम कर्‍यो जाह्येका अरु बद्दल की सब चिजहोन खुप गरम से तपीस खे गली जाह्ये. 13 पन वोकी प्रतीज्ञा का जसो हम एक नवो बद्दल अरु नवी पृथ्वी की आस देखस हइ जेम्मे धार्मीकता वास कऱ्हे.

14 येकालिये का हे लाड दोस, जब कि तुम वु दिन को इनतजार करी रा हय, ते अपनी तरप से पुरी कोशिश कर कि तुम शांती से परमेश्वर की नजर मे नीष्कलंक अरु नीर्दोष रुखनु. 15 हमारो प्रभु, धिरज खे वुनको उध्दार देन का लिये दि गय संधी समझ, जसो हमारो लाडेलो भैइ पौलुस ने ज्ञान से जो परमेश्वर ने वोखे दियो थो वोको इस्तमाल करीखे लिख्यो थो. 16 वोसो य वोने अपनी सब चिट्ठिहोन मे भी या बात लिखी हइ. जो थोडी बात असी हइ, जिन खे समझनो कठीन हइ, अरु अनपढ़ अरु चंचल दुन्या वुन को अर्थ खे भी पवित्रशास्त्र की दूसरी बात का जसी खीचा तानी खे अपनो य नास को कारन बनस हइ.

17 येका लिये हे लाडेला तुम दुन्या पैयले से या बात खे जानी खे हुशार ऱ्हेव ताकि अधर्मीहोन को भ्रम मे फस खे अपनी स्थिरता खे कोय हात से गमय नी दे. 18 पन हमारो प्रभु अरु उद्धारकर्ता यीशु मसीह का जसो अरु ज्ञान मे बडते जाव. वोकीय महिमा अब भी हुये खे अरु पिडमपिडि होते ऱ्हिये. आमीन.