1 फिर यीशु सेवक से बोल्यो. "यो पक्को हइ कि वे बात जो बाप को कारण हइ. पन ह्या. उ इन्सान पर जिनको कारण वे आस हइ." 2 जो या छोटा मे से कोय एक खे ठोकर खलास हइ. ओका लिये यो अच्छो होस कि चक्की को पाट ओका गल्ला मे लटकायो जास. अरु उ समुद्र मे डाली दियो जास. 3 जागा र्‍हेव.

अगर तरो भैइ पाप कर्‍हे ते ओखे धमका अरु अगर पछतावो होस ते ओखे माफ कर. 4 अगर दिन भर मे व्हा सात बार तरो पाप कर्‍हे अरु सात बार तरा पास मेखे बोल्हे. कि मी पछतावो होस हय ते ओखे माफ कर.

5 तब प्रेरितहोन ने प्रभु से बोल्यो. "हमारो विश्वास बडा."

6 प्रभु ने बोल्यो. अगर तुम खे रइ का दाना का बराबर भि विश्वास हुये ते तुम यो शहतूत का झाड से बोलस की जडी से उखडी खे समुद्र मे लगी जाते व्हा तुमारो मानी जाये.

7 "मानलो तुम मे से असो कोन हइ. जोको सेवक नागर जोतस. अरु मेडा खे चरास हइ. अरु जब उ खेत मे आस. ते ओकासे बोलस. झल्दी अयखे खानो खान बठी जा? 8 का उ ओका से नी बोलस. की मरो खानो तैयार कर अरु जब तक मी खाउ पीयु तब तक कमर बाधीखे मरी सेवा कर. येका बाद मे तू भी खा अरु पी ले?" 9 का व्हा ओको सेवक का धन्यवाद मागे. कि ओने यो काम कर्‍यो जोकी आज्ञा दी गय थी? 10 या रीति से तुम भी. जब वे सब काम खे करी चुक्या हुये जिनकी आज्ञा तुमखे दी गइ थी. ते बोल्हे. हम नीकम्मा सेवक हइ. कि जो हमखे करण खे होनु थो उ कर्योस हइ.

11 फिर जब यीशु यरुशलेम जय रो थोते जो सामरिया अरु गलील देस कि सीमा से हुयखे जय रा था. 12 अरु कोय गाव मे घुसनो करतो थो टेम वे दस कोढी मील्हे. 13 अरु उनने दुर खडो हुयखे. उच्चा आवाज से बोल्यो. "हे यीशु. हे स्वामी. हम पर दया कर."

14 यीशु ने उनखे देखीखे बोल्यो. "जाव. अरु अपना आपखे याजक खे बतायो."

अरु जातेय जाते वे अच्छो हुय गयो. 15 तब उनका मेसे एक ह्या देखीखे कि मी अच्छो हुय गयो हय. उच्चा आवाज से परमेश्वर की महिमा करते हुयो पलट्यो. 16 अरु यीशु का पाय पर मुडा का उप्पर गिरीखे ओको धन्यवाद करण लग्या. अरु व्हा सामरी थो. 17 येका पर यीशु ने बोल्यो. "का दस अच्छो नी हुये. ते फिर वे नौ बोल्या? 18 का या परदेसी खे छोडी कोय अरु नी नीकाली. जो परमेश्वर की महिमा करतो?" 19 तब यीशु ने उनका से बोल्यो. "उठीखे चलते जा. तरो विश्वास अच्छो कर्‍यो हइ."

20 जब फरीसीहोन ने ओकासे पुच्छो. की परमेश्वर को राज प्रगट रुपी मे नी आतो. 21 अरु दुन्या ह्या नी कर्‍हे. कि देख ह्या हइ. यो व्हा हइ. क्युकी. परमेश्वर को राज तुमारा बिच मे हइ.

22 अरु ओने सेवक होन से बोल्यो. "वे दिन आह्ये जिनमे तुम इन्सान को बेटा का दिन मे से एक दिन खे देखनो चाह्ये, अरु नी देखनो पाये. 23 दुन्या तुम से बोल्हे देख व्हा हइ." यो देख ह्या हइ. पन तुम चल नी जानो अरु नी उनका पीछे हुये लेनु . 24 क्युकी जसो बिजली बद्दल की दुसरी तरप तक चमकी हइ. वोसो य इन्सान को बेटा भी अपना दिन मे प्रगट हुये. 25 पन पैयले यो जरुरती हइ. कि व्हा खुप तकलीप उठाय अरु यो जमाना का दुन्या ओखे बुरो रुखीजा. 26 जसो नूह का दिन मे हुयो थो. वोसो य इन्सान का बेटो का दिन मे भी हुये. 27 जो दिन तक नूह डोंगा परनी चडी ओका दिन तक दुन्या खाता पीता था. अरु उनमे भ्याव शादी होते थी तब पाणी प्रलय ने अयखे वे सब को नास कर्‍यो. 28 अरु जसो लुत का दिन मे हुयो थो. कि दुन्या खाता पिता लेन देन करता. झाड लगाता अरु घर बनाता था. 29 पर जिस दिन लुत सदोम से नीकल्यो उ दिन अंगार अरु गन्धक बद्दल से बारीश अरु सब खे नाश करी दियो. 30 इन्सान का बेटा को प्रगट होन का दिन भी असो य हुयो.

31 "उ दिन जो छपर पर हय. अरु ओका जसो घर मे हय. व्हा ओखे लेन खे नी उतर्‍हो. अरु वोसोय जो खेत मे हय व्हा पीच्छे नी पलट्यो. 32 लुत कि लुगय खे याद रख. 33 जो कोय अपनो जान बचानो चाह्ये व्हा ओखे गमाह्ये. अरु जो कोय ओखे व्हा ओखे बचाह्ये. 34 मी तुमारा से बोलुस वा रात दो इन्सान एक खटीया पर हुये एक लि लियो जाह्ये. अरु दुसरो छोडी दियो जह्ये. 35 दो बय एक सात चक्की पिसती हुये. एक ली ली जाह्ये. अरु दुसरी खे छोडी दिह्ये जाह्ये. 36 दो झन खेत मे हुये एक ली लियो जाह्ये अरु दुसरी छोडी जाह्ये."

37 ह्या सुन उनने ओकासे पुच्छो. हे प्रभु ह्या खा हुये. यीशु ने उनका से बोल्यो.

"झा लास हइ. व्हा घुब्बड जमा हुये."