1 जब यीशु अपना बारा सेवक खे शिक्षा दी रो थो, ते उ उनका गावहोन मे उपदेस अरु सुसमाचार करण खे व्हा से चली गयो.

2 यहून्ना ने बन्दिघर मे मसीह का काम को सुसमाचार सुनीखे अपना सेवक खे ओका पास भेज्यो. 3 "आनवालो तु ही हइ, या हम दुसरा कि रस्ता देखे?"

4 यीशु ने उत्तर दियो, "जो कुछ तुम सुनस हइ अरु देखस हइ, उ सब जयखे यहून्ना से बतय दे. 5 की अंधो देखस हइ अरु लंगडो चलस फिरस हइ, कोढी अच्छा करी जास हइ अरु बाहेर सुनस हइ, मुर्दा होन जिन्दो होस, अरु गरीब होन खे सुसमाचार सुनायो जास हइ. 6 अरु अच्छो हइ उ, जो मरा कारन ठोकर नी खाये."

7 जब वे व्हा से चली गया, ते यीशु यहून्ना को बारे मे दुन्याहोन सेबोलन लग्यो, "तुम जंगल मे मेखे देखन गया था? हवा से हालते हुये सरकण्डा खे? 8 फिर तुम, देखन गया था? जो अच्छा कपडा पेन्या हुया, या राजभवन मे ऱ्हेस हइ. 9 ते फिर क्यु गया था? कोय भविष्यव्दक्ता खे तुम देखन गया था? हव, मी तुम से बोलुस हइ, जब भविष्यव्दक्ता से भी बडि हइ. 10 यो उ हइ जेका विषय मे लिख्यो हइ की तुम देख, मी अपना स्वर्गदूत खे तरा आगे भेजुस हइ जो तरा आगे तरी रस्ता खे तैयार करस. 11 मी तुम से सच्ची बोलुस हइ, की जो बयहोन से जन्मो हइ, ओमे से यहून्ना बपतिस्मा देनआला से कोय बडो नी हुयो. पर जो स्वर्ग का राज्य मे ऱ्हेस वे छोटा से छोटा हइ उ ओकासे बडो हइ. 12 यहून्ना बपतिस्मा देनआला का दिनहोन से अभी तक स्वर्ग का राज्य मे बलपूर्वक अय रोस हइ, अरु बलवान ओखे छुडय रोस हइ. 13 यहून्ना तक सब भविष्यव्दक्ता अरु मूसा की व्यवस्था भविष्यवाणी करस ऱ्हेस. 14 अरु चाहा ते मानीले, एलिय्याह जो आनवालो थो उ यो हइ. 15 जेका कान हइ उ सुनी ले.

16 "मी या टेम मे ये दुन्याहोन की तुलना को का से करु? वे बच्चान का जसा हइ, जो बजार मे बठ्या हुया एक दुसरा से बुलयखे खे बोलस हइ. 17 हमने तुम्हारा लिये बासरी बजय, अरु तुम नी नाचे. हमने दुख कऱ्यो, अरु तुम ने अपनी छाती नी पिटि . 18 क्युकी यहून्ना नी खाते आयो अरु नी पीते आयो, अरु वे दुन्या बोलस हइ की ओमे बुरीआत्मा हइ. 19 इन्सान को बेटो खातो-पीतो आयो, अरु दुन्याहोन बोलस हइ की देख, यो पेटू अरु पियक्कड इन्सान हइ उ चुंगी लेनवालो अरु पापीहोन को दोस्त! पर परमेश्वर को ज्ञान अपना कामहोन मे से सच्चो ठहरो गयो हइ."

20 तब वे उ गाव मे दोष देन लग्या, जेने ओने भोत अच्छा सामर्थ्य काम कऱ्या था. क्युकी ओने अपनो मन नी फिरायो थो. 21 "हाय, खुराजीन! हाय. बैतसैदा! जो सामर्थ काम तुम मे कऱ्यो गयो, अगर वे सूर अरु सैदा मे कऱ्यो जास, ते ठाटी होडीखे खे राख मे बठी, खे वे अपना पाप से मन फिरास हइ*11:21 दुख उठानो अरु रख मे बठीखे, वे अपना पाप से मन फिरावो हइ. 22 पन मी तुम से बोलुस हइ. कि न्याय का दिन मे तुम्हारी दशा से सूर अरु सैदा की दशा अधिक सहन योग्य हुये. 23 अरु हे कफरनहूम, तु स्वर्ग तक उपर कऱ्यो जास? तु तो दुन्याहोन तक नीचे जाये. जो सामर्थ काम तरा मे कऱ्ये गयो हइ, अगर सदोम मे कऱ्यो जास, ते उ आज तक बन्यो ऱ्हेस. 24 पर मी तरा से बोलुस हइ, कि न्याय का दिन तरा देस से सदोम कि दशा अधिक सहन योग्य हुये."

25 उ टेम यीशु ने बोल्यो, "हे बाप, स्वर्ग अरु पृथ्वी का प्रभु, मी तरो धन्यवाद करुस हइ, की तोने या बात खे ज्ञानीहोन अरु पढ्या लिख्या दुन्या से लुकय खे रखी, अरु बच्चाहोन पर प्रगट कऱ्यो हइ. 26 हव, हे बाप, क्युकी तोखे यो अच्छो लग्यो."

27 "मरा बाप ने मेखे सब कुछ सोपी दियो हइ, अरु कोय बेटा खे नी जानस, फक्त बाप. अरु कोय बाप खे नी जानस, फक्त बेटो अरु उ जेको बेटा खे ओका पर प्रगट करणू चास.

28 "हे सब मेहनत करणवालो अरु बोज से दब्या हुया दुन्याहोन, मरा पास आ. मी तुमखे आराम दियु. 29 मरो जुवाडो अपना उपर उठ्य ले. अरु मरासे सीख. क्युकी मी दीन अरु मन से नम्र हइ; अरु तुम अपना मन मे आराम पाये. 30 क्युकी मरो जुवाडो सीदो हुयगो अरु मरो बोजो हलको हुयगो."