Mateus 21

यीशु को यरुशलेम मे विजय जानो

1 जब यीशु ओका सेवक यरुशलेम का नजीक पोच्या अरु जैतून का झाड पर बैतफगे का पास आया, ते यीशु ने दो सेवक होन खे यौ बोलीखे भेज्यो, 2 अपना सामने का गाव मे जा, व्हा पोचते ही एक गधी बाधी हइ, अरु ओका सात बच्चा होन तुम खे मील्हे. उन खे खोली खे, मरा पास लिखे आ. 3 अगर तुम से कोय कुछ बोले, ते ओखे बोल, की प्रभु खे इनकी जरुरत हइ तब उ झल्दी उनखे भेजी दिये.

4 यो येका लिये हुयो, की जो वचन भविष्यव्दक्ता का वजेसे बोल्यो गयो थो का उ पुरो हुये

5 "सिय्योन कि बेटी से बोल,

देख, तरो राजो तरा पास आस हइ.

उ नम्र हइ अरु गधी पर बठ्यो हइ.

जब गधी का बच्चा पर".

6 सेवक होन ने जय खे जसो यीशु ने उनका से बोल्यो थो, असो ही कऱ्यो. 7 अरु गधी अरु बच्चाहोन खे लयखे, उन पर अपना कपडा डाले, अरु यीशु ओका पर बठी गयो. 8 अरु भोत सारा दुन्याहोन ने अपना कपडा खे रस्ता मे बिछायो, अरु दुन्याहोन ने झाड से डग्‍यान तोडी खे रस्ता मे बिछायो. 9 अरु जो गर्दी आगेजानआली अरु पीछे से आनवाली खे बुलय-बुलय खे बोलन लगी, "दाउद का बेटा को जय हुये. धन्य हइ उ जो प्रभु का नाम से आस हइ, बद्दल मे होशन्ना."

10 जब ओने यरुशलेम मे प्रवेश कऱ्यो, ते सब नगर मे भाग दोड मची गइ. अरु दुन्या बोलन लग्या, "की यो कोन हइ?"

11 "दुन्याहोन ने बोल्यो, यो गलील को नासरत को भविष्यव्दक्ता यीशु हइ"

यीशु मन्‍दिर मे जास

12 यीशु ने परमेश्वर की मन्‍दिर मे जयखे, उन सब खे, जो मन्‍दिर मे लेनो-देनो करी रा था, नीकली दियो. अरु साफ का मेज अरु कबूतर खे बेचनआला खे चौकी उलटय दी. 13 अरु ओने बोल्यो, "शास्त्र मे लिख्यो हइ, अरु परमेश्वर ने बोल्यो हइ की मरो घर प्रार्थना को घर बोलस हइ. पन तुम येखे लुटेरा को अडो बनास हइ."

14 अरु अंधा अरु लगडा, मन्‍दिर मे ओका पास आया, अरु ओने उनखे अच्छो कऱ्यो. 15 पन जब प्रधान याजकहोन अरु पंडीतहोन ने यो बडो काम खे, जो ओने कऱ्यो, अरु लगडा खे मन्‍दिर मे दाउद का बेटा खे होशन्ना, बोलते हुये देख्यो, ते वे घुस्सा हुया, 16 अरु ओकासे बोलन लग्या तू सुनस हइ की यो,

"बोलस हइ?" यीशु ने उनका से बोल्यो, "हव, तुम ने यो शास्त्र मे कभी पढ्यो नी बालकहोन अरु दूध पीता बच्चाहोन का मुडा से तोने स्तुती सिध्द करी?"

17 तब उ उनखे छोडी खे नगर का बाहेर बैतनीय्याह गाव मे गयो, अरु व्हा रात बितय.

यीशु ने अंजीर का झाड खे श्राप दियो

18 दुसरा दिन खे जब उ नगर खे लोटी रो थो, ते ओखे भुख लगी. 19 अरु अंजीर का झाड खे सडक का किनारा पर देखी खे उ ओका पास गयो, अरु पता खे छोडी खे ओमे अरु कुछ नी पय खे ओकासे बोल्यो, "अभी से तरा मे कभी फल नी लगन का," अरु अंजीर को झाड झल्दी सुखी गो.

20 यो देखी खे सेवक होन ने अचम्बो कऱ्यो अरु बोल्यो, "यो अंजीर को झाड झल्दी कसो सुखी गयो?"

21 यीशु ने उनखे उत्तर दियो, "मी तुम से सच्ची बोलुस हइ. अगर तुम विश्वास रखे ते, अरु दुर नी कर्‍हे. ते फक्त यो कर्‍हे, जो यो अंजीर का झाड से कऱ्यो गयो हइ. पन अगर या टेकडी से भी बोले की उखडी जा अरु समुदर मे जा पड ते यो हुये जाये. 22 अरु जो कुछ तुम प्रार्थना मे विश्वास से मागे उ सब तुम खे मीले."

यीशु को अधिकार पर सवाल

23 यीशु मन्‍दिर मे फिर से जयखे शिक्षा करण लग्यो, की प्रधान याजक अरु दुन्याहोन बापदादा ने ओका पास अयखे पुछ्यो, "तू यो काम कोनता अधिकार से करस हइ? अरु तोखे यो अधिकार कोने दियो हइ?"

24 यीशु ने उनखे उत्तर दियो, "मी भी तुम से एक बात पुछस हइ, अगर उ मेखे बताये ते मी भी तुमखे बतायु कि यो काम को का अधिकार से करुस हइ. 25 यहून्ना को बपतिस्मा खा से थो? स्वर्ग का तरप से या इन्सान का तरप से थो?" तब वे आपस मे वाद विवाद करण लग्या,

"अगर हम बोले ते स्वर्ग का तरप से ते उ हम से बोले की फिर तुम ने ओको विश्वास क्यु नी कऱ्यो?" 26 "अरु अगर बोले, इन्सान का तरप से, ते हम खे गर्दी को डर हइ, क्युकी वे सब यहून्ना खे भविष्यव्दक्ता*21:26 परमेश्वर, तरप से सदेस लानवालो मानस हइ." 27 अत उनने यीशु खे उत्तर दियो, "हम नी जानस."

ओने भी उनका से बोल्यो, ते मी भी तुमखे नी बतवू, कि यो काम कोय अधिकार से करुस हइ.

दो बेटाहोन दृष्‍टान्‍त

28 "तुम का समझस हइ? कोय इन्सान का दो बेटा था. ओने पैयला का पास जयखे बोल्यो हे बेटा आज अंगूर की बाडी मे काम कर. 29 ओने उत्तर दियो मी नी जउ पन बाद मे ओने अपनो मन बदली दियो अरु चली गयो. 30 फिर दुसरा का पास जयखे असो ही बोल्यो प्रभु ने उत्तर दियो, जी हव, जउस हइ, पन नी गयो. 31 ये दो मे से को ने बाप की इच्छा पुरी करी?

"उनने बोल्यो, पैयला ने. यीशु ने उनका से बोल्यो,

"मी तुम से सच्ची बोलुस हइ चुंगी लेनवालो अरु वेश्या तुम से पैयले परमेश्वर का राज्य मे प्रवेश करी रास हइ. 32 क्युकी यहून्ना धार्मीकता का रस्ता से तुमारा पास आयो, अरु तुम ने ओका पर विश्वास नी कऱ्यो पर चुंगी लेनवाला अरु वेश्याहोन ने ओका पर विश्वास कऱ्यो अरु तुम देखी खे बाद मे भी नी पछतायो की ओका पर विश्वास करी लेता.

दुष्ट किसानहोन को दृष्टान्त

33 "एक अरु दृष्‍टान्‍त सुन, एक घर थो, जेने अंगूर की बाडी लगय. अरु ओका चारी तरप बादी बाधी. अरु ओने एक रस को कुवो खोद्यो. अरु मचाग बनय. अरु किसानहोन खे ओको ठेको दिखे उ परदेस चली गयो. 34 जब फल को टेम नजीक आयो, ते ओने अपना सेवक होन खे ओका फल लान का लिये किसानहोन का पास भेज्यो. 35 पर किसानहोन ने ओका सेवक होन खे पकडी खे, कोय खे पीटियो, अरु कोय खे मारी डाल्यो. अरु कोय पत्थर माऱ्यो. 36 फिर ओने अरु सेवक होन खे भेज्यो, जो पैयले से जादा था. अरु उनने उनका से भी असो हि कऱ्यो. 37 अन्नत मे ओने अपना बेटा खे उनका पास यो सोची खे भेज्यो, कि वे मरा बेटा को सम्मान कर्‍हे. 38 पन किसानहोन ने बेटा खे देखी खे आपस मे बोल्यो, यो तो वारिस हइ, ओखे भी मारी डालस हइ अरु ओकी सम्पंत्ती ली लेवास. 39 अरु उनने ओखे पकड्यो अरु अंगूर की बाडी से बाहेर नीकाली खे मारी डाल्यो.

40 "यीशु ने पुछ्यो, येका लिये जब अंगूर की बाडी को स्वामी आये, ते ये किसानहोन का सात का कर्‍हे? यीशु खे आते देख्यो.

41 "उनने ओकासे बोल्यो, ‘उ वे बुरा दुन्याहोन खे जरुरत खतम कर्‍हे.’ अरु अंगूर की बाडी को ठेको ‘अरु किसानहोन खे दिये जो टेम’ पर ओका फल दियो कर्‍हे."

42 यीशु ने उनखे उत्तर दियो, तुम ने कभी पवित्रशास्त्र मे यौ नी पढ्यो?

जो पत्थर खे राजमिस्त्रीहोन खे नी बुरो समझ्यो थो.

उ कोना का माथा को फत्तर हुइ गयो.

यो प्रभु का तरप से हुयो;

अरु हमारी नजर मे बडो हइ!✝21:42 भजन संहिता 118:22,23

43 "येका लिये मी तुम से बोलुस हइ, की परमेश्वर, ‘को राज तुम से ली लियो जाये.’ अरु असी जातहोन को जसो ओको फल लास हइ. 44 ‘जो यो पत्थर पर,’ गिरी गयो उ चकनाचुर हुये जाये अरु जेका ‘पर उ गिरे, ओखे पिसी डाले.’"

45 प्रधान याजकहोन अरु फरीसी ओका दृष्‍टान्‍तहोन खे सुनीखे समझी गया, की उ हमारा विषय मे बोलस हइ. 46 अरु उनने ओखे पकडनो चायो, पन वे दुन्याहोन से डरी गया क्युकी वे ओखे भविष्यव्दक्ता जानता था.