1 Ɗelwer tǝɗiya thlaˈtǝ mǝɗinchi Bulus, thla ˈya Farta ndǝ tǝ yahtiyan paɗ kǝ choki kǝ kimsha i Yesu Kǝristi. Wanmanmǝn Sastanisu mǝthlan mǝɗiya tǝ nggǝta.

2 Nggǝt thlǝnowun ɗelwer tǝɗiya kun fǝ tǝr mbanchi Farta, fee nech ǝ mǝrɓi Korinti, fee hǝlengnga ndǝ fee kaɗi paɗ ˈya fee tanda kǝ nandǝ chǝɗchǝɗ mǝɗi Farta. Ɓukwa tǝ fee nech chik ǝ ayi thlǝ nech ˈyata tǝ thlǝm Chinmǝn Yesu Kǝristi, Chǝnnanda tǝ yimǝn nat.

3 Kafata tǝ chok hashas kǝta kǝ chok tǝ wunchi thlaˈtǝ mǝɗi Farta Chimǝn, tǝ yi Chinda Yesu Kǝristi.

4 Thlǝ chanchi usoko Farta chika kwati kǝthlǝm kun, kǝthlǝm kafati Farta, thla mbǝsowundǝ fee tǝmɗi Kǝristi Yesu. 5 Nat tǝ chik yen mbanda chowunɗǝ fee wurmaktǝ ǝ huran, tǝmɗi shenuˈta tǝ hurˈindǝ nat 6 Kǝthlǝm ǝ wathlan Farta ha ndat wa ǝnɗi mbuˈtǝmǝn kǝ ɗar Yesu Kǝristi, thla sǝk tǝwun, chok ha ǝ hurwun. 7 Kǝthlǝm ndaˈan, kuɓawowun mbǝs chǝka yen kǝnau pafǝn i Shemeti Farta wa, nat wun pǝkta tǝ kwalfata, fartǝɗi naa fee pǝn Chinmǝn Yesu Kǝristi. 8 Chǝnmǝn nan ɗǝf wunchi kǝ nowun kwaˈkwa kǝ ndukwaɗan. Kǝthlǝm kǝ chok wun kǝ ǝna aiˈ ǝ fartǝ ɓati Chinm`ǝn Yesu Kǝristi kaɗ wa. Kǝthlǝm kǝ thlewunchi Farta chak mee ˈyan ndat wa chǝwun ɓǝɓifata wa. 9 Farta thlǝ ndiɗanchan ɗǝf mee ˈyan ha, mǝthlan ˈyech wunchi kǝ chok wun nggitkekta tǝ waˈyan Yesu Kǝristi, Chinmǝn.

10 Wanmanchina, nggǝt shiyowunnda, kǝthlǝm thlǝm Chinmǝn Yesu Kǝristi, ndat wa, kǝn meˈyowun arta kǝ ɗar ǝnɗi thlǝ mbuˈtǝwun. Kǝ ɓǝ chak tǝ ha kǝ pǝthlǝr wun wa, wumaman inda, kǝn kaɗatˈyowun tǝ saktiyowun artǝ paɗ. 11 Wanmanchina hǝssǝ tǝ nǝssa, fowun nafchi thla wiri Kuluwi, mbaˈichindǝ tǝ ndat wa, thlǝ nech fowun nafchǝ as indǝ tǝ raˈan hur wun. 12 Ənɗi nati mbuˈta, ndat wa chaktǝs ha pǝthlǝrwun. Fowun thlǝ nechandǝ mbuˈta wa "Ngǝt yi Bulus naki," Yowun paɗ ndakan wa, "Ngǝt yi Apolos naki," Yowun paɗ ndakan wa, "Ngǝt yi Kefas naki," Yowun paɗ ndakan wa, "Ngǝt yi Kǝristi naki." 13 Awi, ǝ chak kǝristi ha wa? Ndu Bulus kukwandǝ fee ha kǝthlǝm kun wa? Ndu chowunchi fee baptisma tǝ thlǝm Bulus wa? 14 Chani usoko Farta, chawi yowun baptisma hurwun wa, manga Kǝrisbus tǝ Gayus wa. 15 Tǝ kǝɗu nefsi nech ndat nakanya wa tǝ thlǝmna cha ndǝ fee baptisma wa. 16 (Kuɗukinchi paɗ, chani nafchi wiri Istifanus baptisma, paɗ maangga fee yawa, ni kuɗuk ndu chani yowun baptisma wa.) 17 Ai, ngga thlǝn chi Yesu nenchi kǝthlǝm kǝ chani baptisma nafcha wa, paɗ thlǝn chan nenchi kǝ ɓasi kwastǝ ndikti Farta yi sǝkta kǝmɗi nafcha. Ngga kǝ mbu i tǝ ɗathla ndu tǝ mbǝr shenuˈ tinchǝ wa, kǝthlǝm kǝ kuɓan fee naa alkǝt mǝrtǝ Yesu ɗar palang nda wa.

18 Ndiktǝ mǝrti Yesu ǝ ɗar palang nda, chok chan kǝ ɓamkǝta kǝmɗi fee nech mǝrtǝ hur ɓǝɓifechˈyanda. Nggǝmǝn tǝɗi thlǝ naa fee hǝraˈa mǝnda, kǝthlǝm kǝ mbǝsmǝn shishingdǝ kǝ kweˈkǝchi, chok chan kǝ alkǝti Farta. 19 Kǝthlǝm nechan kǝ yaraɗan hur ndikti Farta ndat wa,

"Ni timandǝ mbǝrˈǝni fǝ mbǝrˈǝnicha.

Ni paˈandǝ sǝnˈǝni fǝ sǝnˈǝnichǝ kaɗi."

20 Kǝɗu, fǝ mbǝrˈichǝ ayi? Ai, paɗ fǝ chaˈanchi kussiˈ i Musa kaɗi? Ai, fee thlǝ nech ndat wa sǝn ɗǝ chikami nat yuwa heshiɗiya? Awi pǝnwǝ Farta wa mbǝrˈǝni fǝ mbǝrˈǝnicha yi heshiɗiya ɓamkǝta wa? 21 Farta tǝmɗi mbǝr ǝn ˈyan, nggǝmawa kǝ sǝn nafchi ndi tǝmɗi mbǝrˈǝn ˈyanda wa. Tǝ kǝɗu taɗ Farta kǝ hǝraˈanchǝ fee thlǝ fǝr chǝ kit kǝmɗiyan tǝmɗi kwastǝ ndikta mbinchan yi sǝkta thla thlǝ natmǝn ɓasandǝ kaɗi, thla thlǝ naa fee nat paɗ kǝɗ ɓamkǝta. 22 Yahudawecha, ǝna sakaˈincha thlǝ nat ndǝ kata kǝ nannda kǝthlǝm kǝ fǝr ndǝ kit kǝ anchi, Helenawecha paɗ mbǝr ǝn ndak yahtǝ ndǝs kǝ mbǝsnda. 23 Nggamǝn paɗ, tǝnamǝn ɓas Kristi thla mǝrchǝ ǝ ɓǝra palangnda, ǝnɗi chokchǝ kǝ ɗakwan che wansarta kǝmɗi Yahudawecha, ǝna ɓamkǝt paɗ kǝmɗi fee nawakchǝ kǝ Yahudawecha. 24 Paɗ kǝmɗi fee ˈya Farta, ndu Yahudawecha ndu fee nawakchǝ kǝ Yahudawecha, Kǝristi nech kǝ alkǝta tǝ mbǝr ǝni Farta. 25 Kǝthlǝm ǝnɗi naa fee kǝɗ chǝ Farta ɓamkǝta, mbǝrantǝ mbǝr ǝni pong nef ha, kumi alkǝti Farta ɗǝbandǝ nefa, mbǝrantǝ alkǝtɗi nessi pong nef ha.

26 Wanmanchina hǝssǝ tǝ nǝssa, kaɗam har kunmicha fartǝɗi ˈya Farta wunchi. Ngguɗyeh hurwun nech kǝ fǝ mbǝrˈicha kǝ ɗar nati pong nef ha. Ngguɗyeh paɗ hurwun nech tǝ kapa manda. Ngguɗyeh nech kǝ wanchi paktecha. 27 Paɗ Farta thlǝ taɗchan ǝnɗi ɗǝpandǝ nafcha wa ǝna ɓamkǝta hur heshiɗiya, kǝthlǝm kǝ fǝrantǝ hartǝ fat fǝ mbǝr icha. Thlǝ taɗchǝ Farta ǝnɗi thlǝ naa nafcha wa kǝɗ tǝ wulanchi, kǝthlǝm kǝ fǝrantǝ hartǝ fat fee nech tǝ alkǝtfa. 28 Taɗ chi Farta ichiɗi nawakchi kǝ ǝna hur heshiɗiya. Ichiɗi jirandǝ fee kaɗi tǝ ǝnɗi nawakchǝ kǝ ǝna, kǝ chok ndǝ ǝ pangngǝn ichiɗi ɗǝbandǝ nafcha wa ndiˈchan. 29 Chich Farta ichiɗa nat kǝthlǝm kǝ ndǝ yowun wa nan thlaˈan tǝ inda ǝ pangngǝn nan wa. 30 Kǝthlǝm Farta ɓet tǝmǝnchi kǝ chok mǝn kǝ yi Yesu Kristi. Mǝthlan ɗǝfchǝ Kǝristi paɗ kǝ chok kǝ mbǝr ǝn ˈyamǝn. Tǝmɗi Kǝristi nawaktǝ ǝn fiyamǝn pangngǝn Farta. Chok mǝn chǝɗchǝɗ mǝɗi Farta tǝ fee hǝraˈandǝ fee tanda. 31 Kǝthlǝm ndaˈan, "Kǝɗ ǝnɗi natǝn kǝ yaraɗan, nat thla yahchǝ kǝ hupantǝ kirsha, kǝ hupantǝ kirsha hur Chinda Yesu."