1 Chaˈam tǝ nenchi, kǝɗ ǝnɗi thlǝ nati chaˈat tǝ Kǝristi.

2 Thlǝ nechi chimwunchi kǝthlǝm thlǝ nechowun kuɗuk tǝ, tǝ nggǝta hur chika mǝ. Thlǝ nechowun paɗ kǝs raˈa chaˈanan kaɗ kaˈan, keˈke kǝɗ ǝnɗi chaˈowundi har. 3 Paɗ yahǝnchǝs kǝ sǝn wun tǝ ndat wa, Kǝristi nech ǝ ɗar chǝka wun nefa, hǝs nef paɗ mǝthlan nech ǝ ɗar nuwan, Farta paɗ nech ǝ ɗar Kǝristi. 4 Nat hǝs nafɗi nech shenuˈtǝ tǝ Farta, ndu tǝn mbuˈ ǝnɗi mbuˈandǝ Farta chipangkan indiyan, fǝrawa maandǝ thla nech tǝ alkǝtfa ǝ indiyan wa. 5 Paɗ nat nuɗi nech shenuˈtǝ tǝ Farta, ndu tǝn mbuˈ ǝnɗi mbuˈandǝ Farta, chipawa indiyan wa, tǝ nggirtǝ chimaɗan hacha. Nechan keˈke tǝ nuɗi hǝsandǝ fee indiyan kaɗi. 6 Maa kar nunef chipandǝ indiyan, hǝsan kan weshiyan kaɗi. Paɗ chok kan wa ǝna hartǝ fata nunef kǝ takantǝ weshiyan ha, ndu kǝ hǝsanchi kaɗ nat. Kǝɗu, chipangkan indiyan.

7 Hǝsnefa kǝm wasi kǝ chǝpan tǝ indiyan wa, kǝthlǝm tǝn kǝ mirshishingnda tǝ maandi Farta. Paɗ nunefa tǝn pǝn maandi chimaɗan. 8 Ə tǝr kwathl kanan hishnefa ɓawa kesh fi nunefa wa, paɗ nunefa ɓechan kesh fi hisnefa. 9 Chǝwu fee hishnefa kǝthlǝm nunefa wa, chich fee nunefa kǝthlǝm hishnefa. 10 Ndaˈan chicha nwaat nunefa kǝ chipantǝ indiyan, kǝ pǝnwa alkǝtsǝ ǝ ɗar indiyan. Kǝthlǝm manandǝ fǝ thlǝnchi Farta.

11 Nat tǝkǝɗu, hur Chinda, nunefa mǝthlan samǝn tǝ hishnefa wa. Hishnef paɗ mǝthlan samǝn tǝ nunefa wa. 12 Kǝɗ ǝnɗi chit fee nunefa fi hishnefa, kǝɗu paɗ nunefa nggǝt chǝ hishnefa. Chǝka mii nat ɓechan mǝɗi Farta. 13 Ɗǝpaman tǝ indiyowun kǝ nowun ǝnɗi kǝmchisi. Nunefa kimsi wa kǝ shenuˈ tǝ Farta indiyan chaˈ wa? 14 Ə chokheshi pǝnamǝn wa wa, maa mallan hishnef weshiyan njang hǝssa wa kaɗwa, ngga ǝna hartǝfata wa? 15 Nunafɗi naa weshiyan njangnjang, ngga ndǝta kǝmɗiyan wa? Fǝranchǝ fee weshi njangnjang, kǝthlǝm kǝ nggǝlantǝ indiyan. 16 Maa naa yowun yah as inda kǝ ɓǝra ǝnɗa, nggaˈan sǝn waˈan yowun raˈat samǝn wa. Kǝɗu paɗ nat takǝɗ nggomndi fǝ fǝr kit cha, chǝk tǝ yenni, fen paɗ sǝnwanda wa.

17 Kǝ ɗar ndiktǝɗiya paɗ, ǝ chimwi wunchi wa. Maa nggomwun ha kǝthlǝm kǝ manawun Farta, mǝ kǝ kǝsowun chǝsi, nakan chekandǝ sǝɓaandǝ pǝthlǝrwun kaɗi. 18 Ə tǝrkwathl kanan, sǝkinchi wa maa mggomwun ha, mggomndǝ ha yi fǝ fǝr kit cha, chaktǝs ha pǝthlǝrwun. Yah ki nggǝmandǝ shenuˈtaˈan. 19 Nwaat kǝ mbǝs fee chak tǝ ha pǝthlǝr wun, kǝthlǝm kǝ sǝn fee, fee nech para Kǝristi yi kit. 20 Awi, maa nggom wun ha yi sǝm ɗǝsǝmnda, ngga kǝthlǝm kuɗuktǝ tǝ Chinda Yesu wa. 21 Ə mǝt sǝm ɗǝsǝmnan, chǝkawuni thlǝ nechan sǝm ɗǝsǝndiyan pǝkwa sheɗan wa. Kǝ malfee yowun ǝ mita, yowun paɗ sakan tǝran kan. 22 Nggǝ wurchiyowunsi thla natwun chok tǝ ha kǝ sǝmwun kǝ sowun ǝ huran wa wa? Ndu tǝ yah wun njir nafchi Farta wa, kǝ fǝrawun hartǝ fat fee nawak tǝ ǝnˈyandǝs wa? Kǝɗu, mǝnati mbuˈowunda? Kǝ chimi wunchi kǝthlǝm thleya wa? Auwa. Nggǝ chimwunchi wa.

23 Ənɗi fǝrowunndiya, thlǝchi thlaˈ tǝ mǝɗi Chinda. Ndat wa, Chinda Yesu, ǝ witǝɗi hiyandǝ fee kaɗi, tǝrtǝ njohǝma, 24 kǝrsǝ chan usoko Farta, chǝchen kan ha, ndakan wa, "Thlǝya fatǝnchi naa, thla fǝr tǝ fee kǝthlǝm kun. Thlǝ cham kǝɗuyu kǝthlǝm kuɗuktǝ tǝ nenchi." 25 Kǝɗu paɗ kǝrsǝ sǝm ɗǝsǝmndiyanda, tǝrkan tǝɓ saa ˈyaman, thla naa ˈyam yangngga huran, ndakan wa, "Tǝɓsa ˈyamɗiya mǝthlan pǝnda wa, Farta kǝnantǝ yuwa ɗǝf mee ha tǝ nafcha, tǝmɗi ferinchi. Cham kǝɗuyu nat fartǝɗi nat wun sata, kǝthlǝm kuɗuktǝ tǝnenchi." 26 Kǝthlǝm kǝt ndaˈan, thlaˈtǝ nakanya kǝ fartǝ ɓati Yesu kaɗi, nat fartǝɗi nat wun kang njohǝminɗiya, nat wun paɗ saa ˈyam yangngga tǝɗi nech hur tǝɓsaa ˈyamɗiya. Tǝ nowun ɓaasa ndat wa, Chinda Yesu mǝrchan kǝthlǝm nafchǝ nat.

27 Kǝthlǝm ndaˈan nat thla kangchǝ nggohǝminɗiya, ndu tǝ saa hur tǝɓ saa emi Chinda tǝ kumi kǝmwaktǝsi, tǝ chantǝ fati Chinda Yesu tǝ ferˈyan, ɓǝɓifat hacha. 28 Kǝmchansi chika wun nefa kǝ tausan chi indiyan, kǝnan kang njohǝman paɗ kǝ saa hur tǝɓ saa ˈyaman. 29 Nat thla kang chi njohǝman, saa kan paɗ hur tǝɓ saa ˈyaman ngga tǝ sǝnda wa njohǝman tǝ tǝɓ saa ˈyaman chok chandǝ kǝ kwar fati Chinda tǝ ferˈyan wa, tǝ kaɓan tǝ indiyan chak mee hacha. 30 Ndaˈan chicha fowun hur wun terchan nech tǝ kumi alkǝtfa, tǝ hatǝfata, fowun paɗ mǝmatinda. 31 Paɗ maa tausa mǝn indiyamǝn kwaɗǝn kǝ namǝn kangnda, nǝ fee chakamǝnchǝ mee wa. 32 Maa Chinda thlǝ nech chakamǝn mee tǝ mbanɗiya, tǝn fee tǝɗandǝ thlǝmatˈyamǝn hacha, kǝthlǝm kǝ thlemǝnchi fee chak mee ɓuˈkwa tǝ nafchi heshiɗiya wa.

33 Kǝthlǝm ndaˈan, wanmanchina, maa nggomwun ha kǝthlǝm sǝm ɗǝsǝmnda, pǝk kowun raˈan. 34 Paɗ maa yowunsi naa mitǝfiyan, sǝm kan ɗǝsǝmnda ǝ wiri. Kǝthlǝm ndaˈan, maa nggomwun, kǝ kaɓwun chak mee i Chinda indiyowun kafa wa.

Kǝ ɓǝra takǝɗ ichaˈan paɗ, maa ɓinchi ni shenuˈtǝ kǝ ɗaran.