1 Wanmanchina hǝssǝ tǝ nǝssa, fartǝɗi ɓati kǝmɗiyowun kǝ ɓasowunchi wubtǝ ǝnɗi mbuˈamǝn ndǝ Farta, mbuˈowun wi ichiɗa tǝmɗi mbǝr shenuˈta ndu pǝn mbǝrˈǝna wa. 2 Fartǝɗi nati choktǝ tǝ wunchi, thlarani ha wanɗǝkaɗatinchi wa, mǝ sǝni ǝn samǝn wa maangga Kǝristi Yesu ndak tǝ mǝrtiyan ɓǝra palangnda wa. 3 Ɓechi kǝmɗiyowun tǝ kumi alkǝtfa, ngǝt rǝɓ fata tǝ lekǝta. 4 Ichiɗi mbuˈti tǝ ɓasinchi, ngga tǝ ndik ɗathla ndu shenuˈtǝɗi nech kaɓ hur inchiyowun wa, paɗ tǝ fǝr kit kǝ alkǝti Shemeti Farta. 5 Kǝthlǝm kǝ chok fǝr kit ˈyowun kǝ mbǝr ǝni nafcha wa, paɗ kǝ chok kǝ ɗar alkǝti Farta.

6 Nat tǝ kǝɗu thlǝ ndikchi tǝ mbǝr ǝni Farta kǝmɗi fee manchǝ hur shemeta, paɗ ngga mbǝrˈǝni yuwa heshiɗiya wa, ngga weˈtǝ yi fǝ kuturakchi yuwa heshiɗiya fee naa alkǝt ˈyandǝ tǝɓata wa. 7 Nechamǝn ndiktǝ kǝ ɓǝra mbǝr ǝni Farta thla nech kǝ wubtaˈan, thla tahsandǝ Farta ha tǝn wa heshi wa kǝthlǝm maandi yamǝn. 8 Yowun hur kuturakchiɗi yuwa heshiɗiya wathlanchi tandǝ ha wa, kǝthlǝm maa tǝ sǝnnda, mǝ kukwawandǝ Chinda thlǝ maanda ha wa. 9 Ichiɗiya sǝɓchan kǝɗu kǝɗ ǝnɗi yarandǝ fee ha ndat wa,

"Ichiɗi tamwak tǝ weniti nef nata,

Ichiɗi tamwak tǝ thlǝmati nef sǝkta,

Ichiɗi tamwak tǝ wanɗǝkaɗati nefa kaɗatsi.

Fen nech kǝ ichiɗi tahsandǝ Farta ha kǝmɗi fee thlǝ yahchǝ anchi."

10 Nggamǝn pǝnandǝ Farta ǝnɗiya hayang, tǝmɗi Shemetˈyan.

Shemeta thlǝ kechan ichi nat, nat tǝ ichiɗi nech hwengnga i Farta. 11 Wun nech mbahǝn sǝn kaɗaɗi hur wanɗǝkaɗati yowun, maangga Shemeti nafan wa? Kǝɗu natǝn paɗ nefsǝ nech mbahǝn sǝn kaɗati Farta wa maangga Shemeti Farta wa. 12 Nggǝmǝn ngga shemeti heshi mbǝstǝmǝn wa, paɗ Shemet thla ɓech mǝɗi Farta, kǝthlǝm kǝ wathlaminchǝ kǝ ɗar ichiɗi fǝramǝndǝ Farta pafǝn. 13 Thleya nech kǝ ichiɗi thlǝ mbuˈtǝmǝn, ngga mbǝr ǝni nef pǝnamǝn cha wa. Thlǝ ndikchamǝn kǝ ɓǝra ǝnɗi mbuˈamǝndǝ Shemeta. Thlǝ tǝɓran chamǝn ǝnɗi mbuˈtǝ Shemet ha kǝmɗi fee nech tǝ Shemet fa. 14 Naf ɗi nawak tǝ Shemeti Farta fiyan nggen thlǝt ichiɗi ɓech thlǝma Shemeti Farta wa. Kǝthlǝm koha ǝn mǝɗiyan, paɗ nggech sǝn tanda wa, kǝthlǝm Shemeti Farta thlǝ ɗǝfchǝ nef si kǝ sǝna. 15 Nafɗi nech tǝ Shemeti Farta thlǝ chakchan mee kǝ ɓǝra icha nat. paɗ nafɗi ngga waktǝ Shemet sǝ fiyan nggen mbahǝn chakan mee wa.

16 Yaranchi fee ha hur laulawati Farta, ndat wa, "Wun sǝn chǝ kaɗati Chinda Farta,

natǝn chaˈan ǝnɗi har natǝn chita?" Nggamǝn Shemeti Farta hurmǝn, paɗ kaɗat ˈyamǝn artǝ tǝ yi Kǝristi.