1 Coríntios 5

Ndik fǝllaukǝta hur nafchi Farta

1 Sǝkin chǝwa ndik tǝ fǝlaukit nech wiˈtǝ kaɗ ǝ hurwun. Wiˈtǝ fǝlaukǝɗ ɗi chǝka fee thlǝ fǝr wakchi kit chiwa nda wa. Mbuˈi chǝ fee tǝ ndat wa, yowun sǝ hurwun thlǝ hunechan tǝ nu chinan. 2 Maa thlǝ sǝɓ chi ichiɗa pǝthlǝr wun, mǝ chich thlǝ natwun thlaˈandǝ inda? Kǝmchansi kǝ nowun tǝta, kǝthlǝm ɓǝɓife ini. Rǝkam weˈtǝ nef ini kesh pǝthlǝr wun.

3 Chika mǝ nakan wa nggǝt tǝ wunchi wenitǝ tǝ wenita wa, nggǝt tǝ wunchi hur Shemeta. Kǝthlǝm ndaˈan tapi chakani mee nef ini hur thlǝm Chinda Yesu kǝɗ thla mǝ nati chanda maa tǝni thlǝmat wun. 4 Cham ǝnɗi nati mbuˈowun nda. Nat fartǝɗi wumnduwun ha, nggǝt paɗ nggǝt tǝ wunchi hur shemeta, tǝ alkǝti Farta Chinda Yesu minni. 5 Fǝr kowun weˈtǝ nef ini kǝmɗi hweˈra, kǝthlǝm kǝ ɓǝlantǝ fat ˈyan, paɗ kǝ hǝraˈan fee shishing ndiyan fartǝ ɓati Chinda Yesu kaɗi.

6 Wilwir tǝɗi thlǝ natwun chita ngga ǝn ndiˈchan wa. Awi, sǝnwowun wa, wan yisti ngguɗyeh thlǝ hupanchi fuhwa njohǝma wa? 7 Kǝthlǝm ndaˈan mǝkaman ɗohtǝ yisti kaɗi, kǝthlǝm kǝ chok wun kǝ yuwa fuhwa njohǝma thla nawak tǝ yisti fiyan. kittaˈan wa tapi chakowun chǝ fee ha tǝ yisti. Kǝthlǝm tapi thlen fee Kǝristi wan chohrat ˈyamǝn yi mbǝnfa tathla. 8 Kǝthlǝm ndaˈan, kuɗu kam tǝ mɓǝnfata, ngga tǝ johumɗi naa ɗohtǝ yisti fiyan, ndat wa, ɓǝɓifata tǝ wenikǝta. Paɗ tǝ johumɗi nawaktǝ yisti si fiyan. Johuman nech kǝ thlǝrɗaktǝ tǝ raˈan tǝ paɗ chǝt kit.

9 Yarowun chisi hur ɗelwer taˈan ndat wa, kǝ wumawun indǝ tǝ fǝ chǝt fǝlaukǝta wa. 10 Ngga nechi kaɗata wa fee naa fǝlau kǝt ˈyan ndǝs hur heshiɗiya wa, ndu fǝ yah icha, ndu fǝ yar kicha, ndu fǝ ɗǝhacha. Kǝthlǝm maa ndaˈan nech kǝ kaɗatinchi nwaat kǝ malwun heshiɗiya ha. 11 Paɗ nggǝt yarowun ndǝs wa, mǝ wumawun inda tǝ nafɗi tǝrchi indiyan wa thlǝ fǝr kit nakan wa, paɗ fǝlau nakan. Ndu thlǝ yah icha, ndu thlǝ ɗǝhacha, ndu thlǝ sǝɓandǝ thlǝm nafchǝ kaɗi, ndu thlǝ sabala, ndu thlǝ lǝm nafcha kǝ harantǝ ichiyanda, chika ɗǝsǝmnda mǝ sǝmwun tǝ weˈtǝ nef ini wa.

12 Ngga terinchi wa kǝ chakani mee fee nawakchǝ kǝ fǝ fǝr kit cha, Ngga fee fǝr chǝ kit nat wun chakan mee tanda wa? 13 Farta thlǝ chakan chǝ mee fee nawakchǝ kǝ fǝ fǝr kit cha. Kǝtaman thlǝ wenikǝt inni kesh ǝ hurwun.