1 Wanchinchi fee nech wechicha, nggǝt yarowun ǝnɗisiya kǝthlǝm kǝ chiwun ɓǝɓifata wa. Paɗ maa chǝ yowun ɓǝɓifata thlǝ thlaramǝn ndǝs ǝ pangngǝn Farta kǝthlǝm nggǝmǝn. Mǝthlan nech kǝ Yesu Kǝristi, thlǝ kafata. 2 Mǝthlan fǝrchǝ shishingndiyan kǝthlǝm ɓǝɓifechˈyamǝn. Ngga kǝthlǝm ɓǝɓifechˈyamǝn ndak wa, paɗ kǝthlǝm ɓǝɓifechi nafchiɗi nech hur heshi nat. 3 Maa parimǝn kusiˈ chǝɗi mbuˈamǝn ndǝ Farta, ndaˈan nech pǝnamǝn ndǝ wa sǝnmǝn ndi. 4 Nat thla ndech wa, "Sǝntǝ Farta," paɗ mǝthlan para kusiˈ chi Farta wa, nef ini thlǝ lekta, kittaˈansǝ hwirˈyan wa. 5 Paɗaa thla nech para ǝnɗi mbuˈtǝ Farta, kafatˈyan kǝmɗi Farta ndiiɗ ha. Tǝ kǝɗu natmǝn sǝnda wa nggǝmǝn hwirˈyan. 6 Nat thla ndech wa natˈyan ha hwiri Farta, nwaat kǝn wiˈtiyan kǝɗ ǝnɗi chǝt Yesu.

7 Wanmanchina fee yahti, ngga yuwa kusiˈ nati yarowundǝs wa. Auwa, kusiˈ yi choh thla sǝktǝwun tǝrkwathl kan fartǝɗi nggaktǝwun sǝk ndikti Farta. Ɗohtǝ kusiˈ taˈan, ndaˈan nech kǝ ndiktǝɗi tamndǝwun sǝkta. 8 Paɗ nat tǝ kǝɗu, yuwa kusiˈ nati yarowun ndǝsi. Thlǝ nech fee kit tǝ ndiktǝɗiya hwiri Kǝristi tǝ paɗ ǝ hwirˈyowun. Wuthla mǝthlan pǝɗata, ɗaˈkǝta thla nech kǝ kit mǝthlan wenandǝ mǝt kaɗi.

9 Nat thla ndech wa mǝthlan hur ɗaˈkǝta, paɗ mǝthlan kar wanmanan thlǝ fǝr kit, pǝnchan wa peˈchan hur wuthla. 10 Kǝɗu nat thla yahchi wanmanan, chok chan wa natˈyan ha hur ɗaˈkǝta. Kǝthlǝm ndaˈan ǝnsi hwirˈyan thla nech ɗǝf yowun kǝ chǝt wansarta ndu kǝ chǝt ɓǝɓifata wa. 11 Nat thla karchǝ wanmanan methlan hur wuthla, paɗ methlan wiˈtǝ hur wuthlan. sǝn wa ndu chan kai wa, kǝthlǝm koman wuthlan.

12 Wanchinchi fee nech wechicha yarowunchǝsi,

kalowunchi fee ɓǝɓifechˈyowun ha kǝthlǝm thlǝm Yesu.

13 Chincha, nggǝt yarowundǝssi

kǝthlǝm tapi sǝnwun ndi. Thla nechsi tǝrkwathl kanan.

Kun tǝɗi nech kǝ kǝmsicha yarowunchisi,

kǝthlǝm tapi pǝɗawun hwaˈran ha.

14 Wanchinchi fee nech wechicha nggǝt yarowundǝssi,

kǝthlǝm sǝnwun Papa.

Kun tǝɗi nech kǝ chincha yarowunchisi

kǝthlǝm tapi sǝnwun ndi mǝthlan tǝɗi nech tǝrkwathl kanan.

Kǝmsicha yarowunchisi,

kǝthlǝm tǝ nowun kwaˈkwa

ndikti Farta mǝthlan hur wanɗǝkaldechˈyowun,

paɗ mbǝrawun alkǝti hweˈrǝ ha.

15 Mǝ yahwun heshi wa, ndu ichiɗi nech huran wa. Nat thla yahchǝ heshi, ǝ thlǝrɗakti Papa sǝ hwirˈyan wa. 16 Kǝthlǝm nat inchiɗi nech hur heshiɗiya, kǝɗ, chǝt ǝnɗi thlǝ yahtǝ fata, tǝ ǝnɗi thlǝ yahtǝ wenita, tǝ thlaˈandǝ inda kǝ ɗar ǝnɗi nessiyamǝn. Ichiɗiya ngga ɓechandǝ thlǝma Chinda wa, paɗ ɓechandǝ hur heshi. 17 Heshiɗiya tǝ ɓǝɓi ichiɗi nat thlǝ yahtǝ nafcha, tandǝ mbǝrtǝ ha. Paɗ nat thla nech thlǝnandǝ ǝnɗi mbuˈtǝ Farta, nan nat ha kǝ kwekǝɗan.

18 Wanchinchi fee nech wechicha, fartǝɗi naa heshiɗiya tǝɓata nduk ha. Kǝɗ ǝnɗi sǝktǝwun ndat wa, naa atǝkreti Kǝristi ɓata. Nggǝt mbuˈowun nda atǝkrechi Kǝristi terchan tapi ɓi ndǝ kǝ hur heshi. Kǝthlǝn ndaˈan sǝnmǝn tǝ ndat wa nggǝmǝn ǝ ndukwa heshi. 19 Nafchiɗiya choh tandǝ tǝ mǝnchi, paɗ malndǝ mǝnchǝ ha, kǝthlǝm kǝ choh ngga yimǝn nakanda wa. Kǝthlǝm maa yimǝn nakanda, mǝ pǝˈchandǝ tǝ mǝnchi. Chi ndǝ kesh malndǝ mǝnchǝ ha, thleya pin hayan ndat wa nat nda ngga yimǝn wa.

20 Kun ngga kǝɗu natwun wa, kǝthlǝm thlǝ Chiɗ Chiɗ kǝɗ ɗiya tapi fǝrowun tǝ Shemetˈyan. Kǝthlǝm ndaˈan nat wun sǝnwun kittaˈan. 21 Yarowunchisi ngga kǝthlǝm sǝnwowun kitwa wa. Yarowunchisi kǝthlǝm sǝnwun kit, tǝ paɗ tapi sǝnwun nggǝtwu kit kǝ lekta wa. 22 Wun thlǝ lekta? Mǝthlan ndech wa Yesu ngga Kǝristi wa. Chǝkawun aschǝ in Chinda tǝ Wannan mǝthlan nech kǝ atǝkreti Kristi. 23 Nat thla aschǝ in Wannan, Chinan ˈyan sǝ wa. Kǝɗu paɗ, thla thlich Wannan, thlǝt Chinan.

24 Kun paɗ, ǝnɗi sǝktǝwun terkwathl kanan kǝ chok hur wanɗǝkaɗatˈyowun. Maa chok ǝ wanɗǝkaɗatˈyowun, nowun nat hwiri Wannan tǝ Chinan. 25 Thleya nech kǝ ɗǝf miɗi chamǝn ndǝ Wannan ndat wa namǝn mbǝs shishingnda thla kǝ kwekǝɗan.

26 Nggǝt yarowun ichiɗisiya kǝ ɗar fee yahchǝ kǝ sakowunchǝ nda. 27 Kun paɗ Shemeɗi Farta thla fǝrowun ndǝ Kǝristi ya, mǝthlan ɗas hurwun. Kǝthlǝm ndaˈan peˈwowun yah yowun kǝ ɓǝ chaˈowun ǝn har wa. Nat ǝnɗi chaˈowun ndǝ Shemet har kittaˈan, lektǝs huran wa. Kǝɗ ǝnɗi chaˈowun ndǝ Shemet har, chokam tǝ Kǝristi hur natˈyowun ha.

28 Nakanya, wanchinchi fee nech wechicha fee yahti, ɗam kǝ pang tǝ natˈyowun ha hur Kǝristi, kǝthlǝm ǝ fartǝɗi natǝn pǝn fatˈyan, namǝn chok tǝ lekǝta, ndu hartǝfata ǝ pangngǝnan wa. 29 Maa sǝnwun wa Kǝristi thlǝ kafata, no wun sǝndǝs wa nat thla naa natˈyan ha hur kafata, chok kǝ Waˈi Farta.