2 Corinthians 10

Chapan Bulus indiyan kaɗ ɗar terˈyan

1 Nggǝt Bulus tǝ indinchi, thlǝ paˈpaˈ tǝ hur inda, tǝ thlǝ kǝsandǝ inda kǝɗ Kǝristi, nggǝt shiyowun nda. Nggǝtiɗi thlǝ nda fee wa, "Thlǝ hartǝfata," maa ngǝt thlǝmatwun, paɗ maa ngǝt langnga thlǝ nechi ndiktǝ tǝ alkǝt fa kǝmɗowun. 2 Nggǝt shiyowunda, mǝ kweˈwun nenchi kǝ ɗahowunchi in kǝɗ ǝnɗi ɗǝfti wanɗǝkaɗat su wa nii ɗahandǝ nafchiɗi thlǝ ndech wa, natˈyaˈan ha weˈtǝ yi heshi ndak wa. 3 Chǝka nakan nechaˈan wiˈtǝ hur fata, yandi yaˈan ngga weˈtǝ yi heshi wa. 4 Kǝthlǝm ǝna yaanchiɗi nessiyaˈan ngga i heshi wa, paɗ i alkǝti Farta. Fee naa alkǝt ˈyandǝsi kǝ ɓilanchi ǝna yaanchi hweˈrǝ kaɗi. 5 Thlǝ pǝkanchaˈan fǝ as incha ha, thlǝ tutokanchaˈan nat ǝnɗi nech yata sǝn Farta, paɗ thlǝ nggǝrang chaˈan chǝka yen kaɗat ha kǝthlǝm kǝ para ndikti Kǝristi. 6 Tahisˈǝnfa kǝ chakaˈǝn mee fǝ tar kumthlǝmecha, maa tapi ndiiɗ fǝr mandiyowun ha kǝmɗi Kǝristi.

7 Ɗǝpanman ǝnɗi thlǝ natwun tǝ wenita, maa wathlanchǝ yowun ha wa methlan i Kǝristi, kǝ kuɗuka wa kǝɗ ǝnɗi natǝn kǝ i Kǝristi, nggaˈan paɗ kǝɗu. 8 Chǝka mǝ ndǝ fee wa nggǝt thlaˈ indǝ kaan tǝ alkǝtɗi fǝraˈandǝ Farta ya, nǝ fat harichi wa, fǝraˈanchi Farta alkǝtɗiya kǝthlǝm kǝ tǝnowunchi ǝn, ngga tutokowun ndǝ ha wa. 9 Yahwesi kǝ tǝrwun wa tǝ ni yah kwarowunndǝ tǝ ɗelwer chin chǝ wa. 10 Kǝthlǝm thlǝ ndech fowun wa, "Ɗelwer chiyan lǝk lǝk nda, paɗ tǝ alkǝt fa, paɗaa maa mǝthlan thlǝmat ǝn tǝ indiyan, mǝthlan ngga thlǝ ndiktǝ tǝ alkǝt fa wa, paɗ ndiktiyan ngga ǝna wa." 11 Weˈtǝ nafchi ini kǝ sǝn nda wa, ǝnɗi thlǝ nbuˈtǝ ǝn hur ɗelwer chiyaˈan fartǝɗi nawaktǝ ǝnsi, ndaˈan thlǝ chǝtˈǝn fartǝɗi nat ǝnsi.

12 Chaˈwaˈansi kǝ kaɗaˈǝn inchiyaˈan tǝ fee thlǝ chimchǝ inchiyanda wa. Kǝthlǝm weˈtǝ nafchi ini thlǝ nechandǝ kaɗandǝ inchandǝ tǝ raˈan, paɗ kǝ tǝrndǝ inchiyandǝ kǝɗ raˈan, sǝn ǝn ˈyandǝs wa. 13 Paɗaa nggaˈan naˈǝn thlaˈ kirsha kǝ mbǝranchǝ hǝnggǝ ha tǝ weˈta wa, nechaˈan thlar tǝ ha kǝ ɓǝra sǝrtǝ mǝɗi thleˈen ndǝ Fartǝsi. Sǝrtaˈan tǝɗa wumchan ha nat tǝ kun. 14 Kǝthlǝm, thlaˈ kirshiyaˈan mbǝra wa hǝngngǝ ha tǝ weˈta wa. Mǝ naa fee ndat wa mbǝraˈǝn hǝnggǝ ha weˈta manngga ǝnɗi ɓakaˈan kǝmɗiyowun wa, kǝthlǝm nggaˈan ɓech kǝmɗiyowun tǝ kwastǝ ndikta thla mbinchan i sǝkta i Kǝristi. 15 Thlaˈ kirshiyaˈan pǝɗawa mǝɗi ha natˈǝn wa, paɗ mbǝn wa teri fowun fa wa. Paɗaa ɗǝf kǝfatˈyaˈan, fǝr kit ˈyowun nan naa chekta. Paɗ teryaˈan hurwun nan naa chektǝ kaan tǝ kit fa. 16 Kǝthlǝm kǝ mbahan ǝn ɓas kwastǝ ndikta thla mbinchan yi sǝkta ǝ hahichiɗi pangngǝn wun. Ngga tǝ kaa thlima ǝ ɗar teri yowun thla tapatǝn kǝ cha ǝ mǝɗi ɗǝftǝ fee ndǝs wa. 17 Paɗaa kǝɗ ǝnɗi mbuˈtǝ yara Ndikti Farta, "Nat thla nech thlaˈ kirsha, kǝ thlaˈtǝ kirsha tǝ ǝnɗi chǝt Chinda." 18 Kǝthlǝm ngga nafɗi thlǝ chimchi indiyan thlǝ fǝrtǝ Farta kit kǝ ndǝ wa. Paɗ thla chimndǝ Chinda Yesu, mǝthlan thlǝ fǝr tǝ Farta kit kǝ ndi.