1 Ɗǝpaman weˈtǝ yahtǝɗi pǝnamǝn ndǝ Farta, thlǝ ˈya fee mǝnchi wa wanchi Farta, paɗ nechamǝn kǝɗuyu. Ənɗi chicha sǝnwaktǝ nafchi heshi mǝnchi, kǝhtlǝm sǝnwandǝ ndǝ wa. 2 Wanmanchina fee yahti, nakanya nggǝmǝn wanchi Farta. Paɗ weˈtǝ nafchiɗi natmǝn chokta ǝ pangnga pǝnwu fee kwaɗǝn wa. Paɗ sǝnmǝn wa maa pǝn Kristi fatˈyan, nechamǝn nat kǝɗ mǝthlan, kǝthlǝm namǝn naa ndi kǝɗ ǝnɗi natǝn. 3 Nat thla thlǝ ɗǝfchǝ kǝfatsi kǝ Kǝristi nan chandǝ fatˈyan kaɗ chiɗ chiɗ, kǝɗ ǝnɗi naa Kǝristi Chiɗ Chiɗ.

4 Nat thla thlǝ chich ɓǝɓifata tǝthl chenchi kusiˈ i Farta kaɗi. Kǝthlǝm ɓǝɓifata ndaˈan nech kǝ kumi chǝt ǝnɗi nda Farta. 5 Sǝnwun wa ɓech Yesu kǝthlǝm kǝ ɓǝ tǝrandǝ ɓǝɓifechˈyamǝn kaɗi. Mǝthlan paɗ ɓǝɓifatsi hwirˈyan wa. 6 Kǝthlǝm ndaˈan nat thla nech hwiri Kǝristi ɗǝwa kǝ pang tǝ chǝt ɓǝɓifata wa. Nat thla ɗich kǝ pangnga tǝ chǝt ɓǝɓifata, kǝɗu, tamwa naa Yesu wa, tamwa la sǝn ndǝ wa.

7 Kun wanchinchi fee yahti, kǝ nggǝm wun fa kǝ sakowunchǝ yowun wa. Nat thla thlǝ ɗich kǝ pangnga tǝ thlǝnandǝ kafata thlǝ kafat nakan, kǝɗ ǝnɗi naa Kǝristi kǝ thlǝ kafata. 8 Nat thla thlǝ ɗich kǝ pang tǝ chǝt ɓǝɓifata, yi Hweˈrǝ nakan. Kǝthlǝm ǝ tǝrkwathlkanan Hweˈra thlǝ thlǝn ɓǝɓifata. Saktǝ ɓati Waˈi Farta ndaˈan nech kǝ ɓǝ tutokandǝ teri Hweˈrǝ kaɗi.

9 Nat thla nech kǝ waˈi Farta nawa kǝ pangnga tǝ chǝt ɓǝɓifata wa, kǝthlǝm nati Fartǝ ha mǝthlan ǝ hwirˈyan. Peˈwa ɗǝt kǝ pangnga tǝ chǝt ɓǝɓifata wa, kǝthlǝm chok kǝ waˈi Farta. 10 Ə mbanɗi naa fee sǝn wanchi Fartǝ ya, tǝ paɗ wanchi Hweˈra. Nat thla thlǝ thlǝnawakchǝ ǝnɗi nech keˈkeˈ, mǝthlan ngga waˈi Farta wa, paɗ nat thla thlǝ yahwakchi sheɗan thlǝ fǝr kit, mǝthlan ngga waˈi Farta wa.

11 Thlǝya nech kǝ ndiktǝɗi sǝktǝwun tǝrkwathl kanan, tǝ ndat wa kǝ yahwun raˈan. 12 Kǝ chokwun kǝɗ Kayinu wa, thla chokchi kǝ yi hweˈra, ɓǝlangkan wanmanan. Kǝthlǝm mǝ ɓǝlandǝn wanmanan? Ɓǝlanchan kǝthlǝm tarchiyan nech kǝ ɓǝɓiˈan, paɗ yi sheɗan taˈan yi kafata. 13 Kǝ sakowunchǝ inda wa wanmanchina fǝ fǝr kit, maa kar nafchi heshi wunchi. 14 Nggǝmǝn ya, sǝnmǝn wa tapi talamǝn mǝrta, kǝ shishinggnda, kǝthlǝm thlǝ yahchamǝn wanmanchǝmǝn fǝ fǝr kit. Paɗaa nat thla thlǝ yahwakchi wanmanchaˈan fǝ fǝr kit, paˈya peˈchǝ alkǝti mǝrtǝ ǝ ɗar indiyan. 15 Nat thla thlǝ karchi wanmanan thlǝ fǝr kit, thlǝ ɓǝlfata. Paɗ sǝnwun wa thlǝ ɓǝlfatsi naa shishingndiyansi kǝ kwekǝchi ǝ hwirˈyan wa.

16 Ə mbanɗi natmǝn sǝn mǝnech kǝ yahraˈan ya, fǝr Yesu Kǝristi shishinggndiyan kǝthlǝm nggǝmǝn. Kǝmchansi nggǝmǝn paɗ kǝ fǝrmǝn shishingndiyamǝn kǝthlǝm wanmanchǝmǝn fǝ fǝr kit. 17 Nat thla naa kǝnauˈyansi, paɗ nakan wanmanan hur ɓillaa, haɗawa fǝ ǝ hur wanɗǝkaɗatˈyan wa, kaakǝti Fartǝs hwirˈyan kuɗa wa? 18 Kun wanchinchi fee yahti, kǝ pǝnmǝn yahraˈan ǝ hur me ndak wa. Mallan kǝ pǝnmǝn yahraˈan ˈyamǝn tǝmɗi thlǝnandǝ ichiɗi nech ndiˈchan tǝ nat ha hur kit.

19 Ə mbanɗi natǝn wathlamǝndǝ ha ya wa nggǝmǝn yi kit, tǝ paɗ wanɗǝkaɗatˈyamǝn kǝ wathlaminchi ha tǝ ndat wa, namǝn mbahan thlartǝ ha ǝ pangngǝn Farta lekǝtsi wa. 20 Ndu chǝka tǝ pǝnamǝnchi wanɗǝkaɗechˈyamǝn wa nggǝmǝn fǝ ɓǝɓifecha, nggǝmǝn hur kaɓikaɗi. Kǝthlǝm sǝnmǝn wa Farta pǝɗanchi wanɗǝkaɗatˈyamǝn ha, paɗ sǝntǝ chǝka mǝ nat. 21 Kuntǝɗi yahti, maa pǝnamǝnwu wanɗǝkaɗǝchˈyamǝn wa ɓǝɓifatˈyamǝn su wa, wathlamǝnchǝ ha ǝ wanɗǝkaɗatˈyamǝn ndat wa, namǝn mbahǝn thlartǝ ha ǝ pangngǝn Farta. 22 Thlǝ mbǝschamǝn nat ǝnɗi shitǝmǝn mǝɗiyan, kǝthlǝm thlǝ parechamǝn kusiˈ ˈyan paɗ thlǝ thlǝnan chamǝn ǝnɗi thlǝ tǝranchi hwirˈyan ha. 23 Kusiˈ taˈan ndaˈan nech kǝ fǝrmǝn kit kǝ Waˈyan Yesu Kǝristi, paɗ kǝ yahmǝn wanmanchǝmǝn fǝ fǝr kit, kǝɗ ǝnɗi ndamǝn ndǝ Kǝristi. 24 Nat fee thlǝ parech kusiˈ ˈyan tandǝ ɗas hwirˈyan, mǝthlan paɗ hwirˈyanda. Tǝ kǝn natmǝn sǝnda wa mǝthlan hurmǝn? Nechamǝn sǝnda, tǝmɗi Shemeɗi fǝramǝndǝn.