1 Wanmanchǝna fee yahti, nakan chamǝn chǝ fee weˈtǝ ɗǝfmichǝɗiya, kǝ nggǝm mǝn fa kǝ tǝkman ǝn fechˈyamǝn kaɗ tǝ wanɗǝkaɗechˈyamǝn wa. Paɗ kǝ namǝn tǝ ndiiɗ chiɗ chiɗ kǝta hur lekandǝ Farta.

2 Pǝnam wa yahwun nggaˈan, chawaˈan ǝn yowun wa, chǝwaˈan ǝnɗi nech ɗǝf yowun kǝ chǝt wansarta wa, ɗathlawaˈan yowun fa wa. 3 Ngga ndikchi ǝnɗa kǝthlǝm kǝ ɗǝfowunchi ǝn kafa wa. Kǝɗ ǝnɗi mbuˈowundi, ǝnsi nech mbahǝn chakowun ndǝ ha tǝ yahtǝɗi yahtǝˈǝn wunchi wa, ndu nggaˈan hur fǝ shishingngǝn cha ndu nggaˈansi hur fǝ shishingngǝn cha wa, nggaˈan ɓukwa tǝ ngguwun. 4 Fǝrinchǝ kit kǝ kun kaan, paɗ thlǝ nechi ɗǝf kǝfat kǝ kun kaan. Nat tǝ ɓahtǝɗi sat ǝn, nggǝt chǝt mbǝnfat kaan tǝ kit.

5 Thlaˈtǝ fartǝɗi saˈtǝ ǝn kǝ hahi Makidoniya, mbǝswaˈan yipta wa. Nat mǝɗi tǝɓǝrtǝ ǝn ha fee pataˈan nda. Tǝ heshi fee yan nggaˈan, tǝ hur wanɗǝkaɗechˈyaˈan paɗ ndiiɗaˈanchǝ lekǝt kaɗi. 6 Paɗaa Farta thla thlǝ fǝranchi nafchiɗi sǝɓ tǝ hwirˈyandǝ kaɗ kǝrisa, fǝramǝntǝ kǝrisan tǝmɗi ɓati Titus. 7 Ngga wa kǝthlǝm ɓat ˈyan ndak wa, paɗ tǝ sǝsi tǝɗi fǝrandǝwun. Mbaˈaˈanchi yahtǝɗi yahtǝwun naa nenchi kaan, paɗ mbaˈaˈanchǝ sǝɓtǝ hwirˈyowun kǝ ɗar ǝnɗi sǝɓcha, tǝ kweˈtǝ yowun ha kǝ parowun kǝrsi na. Ənɗa ɗǝfchǝ nenchǝs kǝ sǝki mbǝndǝf kaan.

8 Chǝka mǝ nakan wa ɗelwer tǝɗi yarowun ndisi sǝɓantǝ hwirˈyowun kaɗ kaan, haɗwanenchi hur wa. Chǝka mǝ nakan wa choh sǝɓani hwir kaɗi, kǝthlǝm kaɗinchǝ har ɗelwer tǝɗi yarowun ndisi sǝɓantǝ hwirˈyowun kaɗi, paɗ chǝka mǝ nakan wa yi wanshengngǝn chǝ ngguɗyeh. 9 Nat tǝ kǝɗu, nakanya nggǝt mbǝn fata, ngga wa kǝthlǝm ǝnɗi ɗǝfti wunchi kǝ sǝɓtǝ hwira wa, paɗ kǝthlǝm sǝɓtǝ hwiryowun ɗǝftǝ wunchi kǝ tǝrwun ha, paɗ ɓeɗawun wanɗǝkaɗechˈyowun ha. Kǝthlǝm sǝɓawun hwir kaɗi, tǝɓǝrkowun ha kǝɗ ǝnɗi yahtǝ Farta. Kǝthlǝm ndaˈan, ɓahwowun ǝna kǝthlǝm nggaˈan wa. 10 Sǝɓtǝ hurɗi thlǝ ɓech mǝɗi Farta thlǝ ɗǝfchan nef kǝ malanchi ɓǝɓifata, kǝ mbǝstǝ shishingndǝ kǝ kweˈkǝchi, paɗ ɓawa tǝ masǝnchi wa. Paɗ sǝɓtǝ hwira weˈtǝ yi heshi thlǝ ɓechan tǝ mǝrta. 11 Ɗǝpaman ǝnɗi ɓowun ndǝ weˈtǝ sǝɓtǝ hurɗi ɓech mǝɗi Fartǝ ya. Ɗǝftǝ wunchǝs kwech kwech kǝ chǝwun ǝnɗi kǝmchǝsi, tǝ pǝnda wa sǝɓawun kaɗi. Ndaˈan ɗǝfchǝ wunchǝs kǝ kǝɗandǝ wanhera, paɗ chek kǝfatˈyowun. Ndaˈan chicha natˈwun kwech kwech kǝ nowun nggaˈan, paɗ ɗǝftǝ wunchǝs kǝnowun kweˈtǝ ha. Chicha natˈwun tǝ tahǝsfa kǝnowun chǝ fee chak miɗi kǝmchǝsi. Kǝ ɗar ndiktǝɗiya, kittaˈan pǝnwun chǝka tǝ yen mbenna sǝɓawowun kaɗ wa chǝk ngguɗyeh. 12 Chǝka mǝ nakan wa yarowunchǝ ɗelwer tǝɗisi ngga kǝthlǝm thla sǝɓanchǝ kaɗ pǝthlǝr wun wa, paɗ ngga kǝthlǝm thla ɗathlandǝ fee fa wa. Yarechi kǝthlǝm kǝ pǝnowunchǝsi hayan wa ǝ sǝn Farta wa yah wun nggaˈan kaan. 13 Kǝthlǝm ndaˈan chicha mbǝstǝˈǝn ɗǝkǝs fa hur wanɗǝkaɗechˈyaˈan.

Kǝrsǝ ɗǝkǝsɗi mbǝstǝˈǝn hur wanɗǝkaɗechˈyaˈan, sǝkˈǝn mbǝndǝf kaan natˈǝn Titus hur chiɗ chiɗ tǝ wanɗǝkaɗata. Mbǝnanchi fa, kǝthlǝm natˈwun kǝsawunsi tǝ ɗǝkǝsɗi fǝ mbǝstǝn. 14 Thlaˈinchǝ kirshi tǝ kun ǝ pangngǝɗan, paɗ hariwowun fata wa. Kǝɗ ǝnɗi natǝn, nat ǝnɗi mbuˈowun ndǝ ǝn kit, kǝɗu paɗ thlaˈ kirshi yaˈan kǝ ɗar wun ǝ pangngǝn Titus chok kǝ kit ǝ mǝɗyan. 15 Yahtǝɗi yahtǝ Titus wunchi mǝthlan chektǝ kaan, maa kuɗuktǝ mbanɗi thlǝ natwun para ndiktiyan nat, paɗ tǝ weˈtǝ fǝr maanɗi pǝnandǝ wun fartǝɗi thlǝt wun ndi. 16 Nggǝt mbǝn fat kǝthlǝm nii mbahan fǝr kit kǝ wunchi hur chǝka mǝ nat.