1 Nafchinchi fee yahti, kǝ fǝr wun kit kǝ chǝkawun ndech wa Shemeti Fartǝˈs ǝ hwirˈyan wa. Kaɗaman tandǝ nat kǝthlǝm kǝ sǝnwun wa ndu Shemeɗi fiyanda yi Farta. Kǝthlǝm wel fǝ shenuˈchǝ tǝ yahti Farta ha kǝ fǝ lekcha terchan, ǝ hur heshi. 2 Nechowun sǝn nafɗi thla naa Shemeti Fartǝˈs fiyan kǝɗaya, nat nafɗi ndech wa Yesu Kǝristi ɓi hur fata, nefˈini Shemeti Fartǝs hwirˈyan. 3 Paɗaa nat nafɗi mbuˈwakchǝ kǝɗu kǝ ɗar Yesu, shemeɗi nech hwirˈyan ngga yi Farta wa. Thleya nech kǝ Shemeɗi thlǝ chich atǝkrekǝt tǝ Kǝristi thla sǝktǝwun tǝ ndat wa nan ɓata kǝ hur heshi. Nakan kǝɗaya tapi ɓi kǝ hur heshi.

4 Kun wanchinchi fee yahti, kunya yi Farta, kun tapi mbǝrawun nafchiɗi ha ya, kǝthlǝm Shemeti Farta ɗi nech hurwun pǝɗantǝ shemeɗi ha nech hwiri nafchiɗi nech hur heshi tǝ alkǝta. 5 Kǝ choh taˈan yi heshi nakanda. Kǝthlǝm ndaˈan nat ǝnɗi mbuˈtǝ nda yi heshi, nafchi heshiˈan paɗ tandǝ sǝk tanda. 6 Nggǝmǝn, yi Farta nakamǝn. Thla sǝnchi Farta thlǝ parechan ndiktiyamǝn. Thla nawakchi kǝ yi Farta, para wa ndiktǝ yamǝn wa. Tǝ kǝɗu, tǝ minni thlǝ sǝndǝmǝn nafɗi nech tǝ Shemeta thla nech kǝ kit tǝ thla nech kǝ yi lekta.

7 Nafchinchi fee yahti, yahamraˈan, kǝthlǝm yahraˈan ɓechan mǝɗi Farta. Nat thla nech pǝn yahraˈan waˈi Farta nakan, paɗ sǝntǝ Farta. 8 Nat thla yahwakchǝ wanmanan, sǝnwa Farta wa, kǝthlǝm Farta mǝthlan nech kǝ yahraˈan. 9 Ə mbanɗi pǝnamǝn ndǝ Farta yahraˈan ˈyan hayan ya. Fǝrtǝ Wanɗengthlutiyan kǝ hur heshi, kǝthlǝm tǝmɗiyan kǝ mbǝsmǝn shishingndǝ kǝ kwekǝchi. 10 Kǝɗaya naa yahraˈan yi kit. Ndaˈan nech kǝ, ngga nggǝmǝn yahchi Farta wa, mǝthlan yahchi minchi, thlǝnkan Waˈyan kǝ fǝrtǝ shishingndiyan kǝthlǝm kalamǝnchǝ ɓǝɓifechˈyamǝn ha.

11 Nafchinchi fee yahti, chokkan wa yah Farta minchi kǝɗaya, kǝmchansi nggǝmǝn paɗ kǝ yahmǝnraˈan. 12 Nefsi tamchi naa Farta tǝ wenita wa. Maa thlǝ yahchamǝn raˈan, Farta mǝthlǝn hur mǝn, yahraˈan ˈyan ndiiɗ ha hurmǝn.

13 Tǝ mbanɗiya sǝndǝmǝn wa nggǝmǝn choktǝ ǝ hwirˈyan, mǝthlan paɗ hurmǝn, kǝthlǝm fǝramǝn tǝ Shemetˈyan. 14 Nimǝn tǝ wenitiyamǝn, paɗ nggǝmǝn mbaˈandǝ nafcha ndat wa, thlǝn Papa Farta Waˈyan kǝthlǝm Thlǝt nafchi heshi. 15 Nat thla ndech wa Yesu Waˈi Farta nakan, pǝnchan wa Farta hwirˈyan, mǝthlan paɗ hwiri Farta. 16 Kǝthlǝm nggǝmǝn tǝ indiyamǝn ǝ sǝnmǝn, paɗ fǝrkamǝn kit kǝ yahraˈan tǝɗi nessi Farta kǝthlǝm nggǝmǝn.

Farta mǝthlan nech kǝ yahraˈan, nat thla thlǝ pǝnchi yahraˈan, mǝthlan ɗas hwiri Farta, Farta paɗ mǝthlan hwirˈyan.

17 Yahraˈan ˈyan chokkan kǝ ndiiɗan hurmǝn, kǝthlǝm kǝ chok mǝn tǝ lekǝta wa fartǝɗi naa Farta chakan mee heshi. Kǝthlǝm kǝɗ ǝnɗi naa Kǝristi, kǝɗu paɗ natmǝn hur heshiɗiya. 18 Mǝɗi naa yahraˈan i Farta, lekǝt si minni wa. Kǝthlǝm yahraˈan thla ndiiɗ chǝha thlǝ rǝkchan lekǝta. Thleya pǝnchan wa nat nafɗi nech lekǝta nggǝ yahraˈan sǝ hwirˈyan thla ndiiɗ chǝha wa.

19 Nggǝmǝn yahraˈan, kǝthlǝm Farta yahchiminchi terkwathl kanan. 20 Maa ǝ ndi yowun wa, "Nggǝt yahinchi Farta," paɗ mǝthlan kar sheɗan thlǝ fǝr kit, nef ini thlǝ lekta. Kǝthlǝm nat thla yahwakchi wanmanan thla thlǝ natǝn, nechan mbahǝn yah Farta wa kǝni thla tamwaktǝn nata? 21 Kusiˈ tǝɗi fǝramǝn ndǝ Kǝristi ndaˈan nech kǝ, nat thla thlǝ yahchi Farta, nwaat kǝ yahtǝ sheɗan thlǝ fǝr kit paɗ.