1 Nat thla fǝrchi kit tǝ ndat wa Yesu nech kǝ Kǝristi, nafɗiya waˈi Fartǝ nakan. Nat thla yahchǝ Chinan nan yah wanan paɗ. 2 Ə mbanɗi natmǝn sǝndǝya wa nggǝmǝn yah wanchi Fartǝ ya, maa thlǝ yahchamǝn Farta paɗ thlǝ nechamǝn para kusiˈ ˈyan. 3 Yah Farta yi kit ndaˈan nech kǝ, thlǝnamǝn kusiˈchiyan, paɗ kusiˈyan ˈyangˈyang kǝ par fee wa. 4 Kǝthlǝm chǝka wun Waˈi Farta alkǝtˈyansi kǝ ɓǝra heshi. Fǝrkitˈyamǝn kǝmɗi Kǝristi ndaˈan thlǝ fǝramǝnchi alkǝt ɗiya. 5 Wun nech tǝ alkǝt fa kǝ ɗar heshiɗiya? Thla fǝrchi kit wa Yesu Waˈi Farta.

6 Pǝn fee wa Yesu Kǝristi nech kǝ Waˈi Farta, tǝmɗi baptisma tǝɗi chandǝ fee hur ema, tǝ farɗi thlǝrandǝn kaɗ ɗar palang nda. Ɓawa tǝmɗi em ndak wa, ɓechan tǝmɗi ema tǝ fera. Shemeta mbuˈchǝ ǝnɗi sǝndǝn kǝɗu kǝ ɗaran. kǝthlǝm Shemeta mǝthlan nech kǝ kit. 7 Ichisi mahkan fee mbuˈchǝ ǝnɗi sǝndǝ nda kǝ ɗaran, ndat wa Yesu Wa ˈi Farta nakan. 8 Fen nech kǝ Shemeti Farta, ˈyam chǝt baptisma, tǝ ferˈyan thla thlǝrandǝn kaɗi kǝthlǝm nggǝmǝn. Fen taˈan mahkandǝ yu ǝn artǝ nat ndǝ mbuˈta. 9 Maa thlǝ nggǝman chamǝn ǝnɗi mbuˈtǝ nafcha thla sǝndǝ ndǝsi ndat wa kit, ai, sǝndi Farta pǝɗantǝ yi nafchi ha tǝ alkǝta. Kǝthlǝm thleya nech kǝ mbuˈ ǝnɗi sǝndǝ Fartǝsi, thla fǝrtǝn kǝ ɗar Waˈyan. 10 Kǝthlǝm ndaˈan, nat nafɗi fǝrchǝ kit kǝ Waˈi Farta, nggǝmanchi tǝ ǝnɗi sǝndǝnsi ǝ hur wanɗǝkaɗatˈyan. Paɗ nat nafɗi fǝrwakchi kit kǝ Farta, chantǝ Farta kaɗ kǝ thlǝ lektǝ hacha. Kǝthlǝm fǝr wa kit kǝ in ǝnɗi sǝndǝ Fartǝsi kǝ ɗar Waˈyan wa. 11 Thleya nech kǝ sǝnɗisi, ndat wa, fǝraminchǝ Farta shishingnda thla kǝ kwekǝchi. Shishingngǝnɗiya paɗ, nechan hwiri Waˈyan. 12 Nat thla naa Wanan mǝɗiyan, shishingndiyansi. Paɗaa nat thla nawaktǝ Waˈi Fartǝs mǝɗiyan, ǝ shishingndiyan su wa.

13 Kun tǝɗi fǝrchi kit kǝ Waˈi Farta, yarowunchǝ ichiɗiyasǝ nat kǝthlǝm kǝ sǝnwunsǝ wa shishingndiyowunsi thla kǝ kweˈkǝɗan. 14 Thleya wathlamǝn chǝha tǝ ndat wa namǝn mbahan thlartǝ ha ǝ pangngǝn Farta lekǝt su wa. Kǝthlǝm sǝnmǝn wa chǝka mǝ shitǝmǝn tǝ yahtǝyan nan sǝk mǝnchi. 15 Nakan sǝnmǝn wa thlǝ sǝkchan mǝnchi chǝk kwat shiyandǝmǝn ǝnayowun, sǝnmǝn tǝ ndat wa namǝn mbǝs ǝnɗi shitǝmǝn.

16 Maa ǝ ni yowun wanmanan thlǝ fǝr kit chǝt ɓǝɓifata thla saˈwakchǝ kǝ yi mǝrta, shiyankan kǝ in, Farta paɗ nan fǝran shishingnda. Nechi ndiktǝ kǝ ɗar fee saˈwaktǝ ɓǝɓifatˈyandǝ kǝ yi mǝrta. Ɓǝɓifatsi thla thlǝ saˈchǝ kǝ yi mǝrta, nda wi wa kǝ shi fee kǝ ɗar ndaˈan wa. 17 Nat kumi kafata ɓǝɓifata, paɗ ngga chǝka yen ɓǝɓi fata thlǝ saˈchǝ kǝ yi mǝrta wa.

18 Sǝnmǝn wa nat nafɗi nech kǝ Waˈi Farta ɗǝwa kǝ pangnga tǝ chǝt ɓǝɓifata wa. Kǝthlǝm Waˈi Farta thlǝ nechan parat har tǝ ndi, kǝ chan Hweˈrǝ mboro fa wa.

19 Sǝnmǝn wa nggǝmǝn wanchi Farta, nat heshiɗiya paɗ nechan heri Hweˈra.

20 Sǝnmǝn wa ɓi Waˈi Farta kǝ hur heshi, paɗ fǝramǝn kan sǝn ǝna kǝ sǝnmǝn thla nech kǝyi kit. Nggǝmǝn paɗ hwiri thla nech kǝ kit, ndat wa hwiri Waˈyan Yesu Kǝristi. Mǝthlan nech kǝ Farta thlǝ kit paɗ thlǝ shishingnda kǝ kweˈkǝchi.

21 Wanchinchi fee yahti, kǝ wumowunchǝ ǝn ha tǝ maanandǝ ɗǝhacha wa.