1 Ɗelwertǝɗa thlaˈtǝ mǝɗinchi Bulus, tatǝ kǝmsha i Yesu Kǝristi tǝ nggǝmndi Farta fa. Wanmanmǝn hur fǝr kit Timoti mǝthlan mǝɗa tǝ nggǝta.

Ɗelwertǝɗa kǝmɗi fǝ tǝr mbanchi Farta thla nech ǝ mǝrǝɓ Koranti, nat tǝ fee nech chiɗ chiɗ ǝ hahi Akaya.

2 Kafata tǝ chok hashas kǝta i Papa Farta, tǝ yi Chinda Yesu Kristi kǝ chok ndǝ tǝ wunchi.

3 Usoko kǝmɗi Farta, mǝthlan tǝɗi nech kǝ Farta, tǝ Papa yi Chinmǝn Yesu Kǝristi. Mǝthlan nech kǝ chinda yi kafata, tǝ paɗ Farta yi sǝsi nat. 4 Mǝthlan tǝɗi thlǝ nech chamǝn sǝsi nat hur ɓahtiyamǝn ha, kǝthlǝm nggǝmǝn paɗ kǝ mbahǝn mǝn chan sǝsi fee nech sa chika weˈtǝ yen ɓahta. Cham kǝɗu tǝmɗi sǝsi tǝɗi thlǝ mbǝstǝ mǝn mǝɗi Farta. 5 Kǝthlǝm paɗ kǝɗ ǝnɗi nat mǝn ɓahtǝ ha, weˈtǝ thla saa Kǝristi, kǝɗu paɗ thlǝ naa Farta chamǝn sǝsi kaan, tǝmɗi Kǝristi. 6 Chǝka nechaˈan ɓahtǝ ha, nat kǝthlǝm sǝsi ˈyowun, tǝ paɗ kǝ ɗǝksanchi natˈyowun ha hur Shemeta. Chǝka nech fee ndamǝn sǝssi, nat kǝthlǝm nda sǝssiˈyowun, thla thlǝ ɗǝfchǝ wunchi, kǝ kǝriswun weˈtǝ ɓahtǝɗiya thlǝ natˈmǝn sata. 7 Ɗǝf wanɗǝkaɗatˈyaˈǝn kǝ indiyowun nechan tǝ alkǝt fa. Kǝthlǝm sǝnˈǝn wa, kǝɗ ǝnɗi wumandǝwun inda tǝ nggaˈan hur ɓahtǝ ha, kǝɗu paɗ natˈwun mbǝs weˈtǝ sǝsi tǝɗi thlǝ chaˈan ndǝ fee.

8 Wanmanchina, yahwaˈansi kǝ nowun kǝ fǝ kumisǝn icha, tǝ ɓahtǝɗi satˈǝn ǝ hahi Asiya wa. Kǝthlǝm siˈǝn ɓahtǝ kaan nggǝ sǝrtaˈansǝ wa, ǝnaɗan ǝ tǝktǝ nggaˈan kaan, saɓ chi wanɗǝkaɗat ˈyaˈan kǝsh wa peˈwaˈan nat ha paɗ wa. 9 Chaˈan chan fa kǝɗ tapi thleˈanchǝ fee chak mii mǝrtǝsi. Paɗaa ǝnɗa sǝɓchan kǝɗu, kǝthlǝm kǝ fǝrˈǝn alkǝt kǝ chok indiyaˈan wa, paɗ kǝmɗi Farta ndak, thla thlǝ thlaˈanchǝ fee mǝmatecha. 10 Farta hǝraˈaˈǝncha meˈi ɓǝɓi mǝrta, nan hǝraˈaˈanndǝ paɗ. Paɗaa ɗǝf ǝn wanɗǝkaɗat sǝ wa nan hǝraˈaˈannda chǝkakwati, 11 Kun paɗaa, kǝ kǝsaˈan chǝwunsi tǝ shita. Tǝ kǝɗu nafchǝ terchan nandǝ chan usoko Farta kǝthlǝm nggaˈan, kǝthlǝm mbǝsˈǝnaɗi har natˈǝn mbǝsta yi nggǝmandǝ shichi nafchi terchan.

12 Ənɗi thlǝ ɗǝfchǝ nggaˈan kǝ thlaˈ kirsha hacha. Hur ɓǝrati wanɗǝkaɗech yaˈan mǝthlan sǝnaˈǝndǝs wa, natˈyaˈan ha hur heshiɗiya chichaˈan tǝ wanɗǝkaɗat arta kapaɗan nggitkektiyaˈan tǝ kun. Chichaˈan kǝɗu ngga wa kǝthlǝm ɗathlǝ heshi wa, kǝthlǝm kafati Farta ndak. 13 Kǝthlǝm ngga nechaˈan yarowun ǝnɗi si nawaktu wun mbahan changgandǝ kǝ wathlowunchǝ ha wa. Nggǝt ɗǝf kǝfatsi kǝ wathlowunchǝ chǝka mǝ ha nat. 14 Nakan ya ndiktiyaˈan wathlowun wa ha nat wa. Ndat wa, nowun mbahǝn ɗǝf kǝfat kǝ nggaˈan, kǝɗ ǝnɗi nat ǝn mbahǝn ɗǝf kǝfat kǝ kun paɗ, ǝ farti ɓati Chinmǝn Yesu kaɗi.

15 Kǝthlǝm sǝninchi tǝ ndat wa kǝɗuyu natǝn sǝɓta, ndaˈan chicha yahti kǝ ɓi kǝmɗiyowun ǝ tǝrkwathl kanan, kǝthlǝm kǝ mbǝswun mbǝsˈǝnhar kǝ inan chap. 16 Tahsinchi fa kǝ wiˈyowun chifa maa nggǝt pǝɗat kǝ Makidoniya, kǝ nggǝri parat tǝmɗiyowun maa nggǝt ɓat kaɗ ǝ Makidoniya, kǝ kusichǝ wunsi tǝ ǝnɗi yahti kǝthlǝm pǝɗatinchi kǝ Yahudiya. 17 Awi, chowunchan fa wa chichi kǝɗu hur kumi sǝnda wa? Ndu tahǝstinchǝ nechan hur fata wa, kǝthlǝm kǝ ndi wa, "Aa" Kǝ nggǝri ndat paɗ wa, "Auwa" Kǝɗar ǝn arta wa?

18 Kǝɗ ǝnɗi natǝn asˈindǝs wa Farta thlǝ kafat nakan, kǝɗu natǝn ndiktǝɗi mbuˈowun ndǝ ǝn ngga yi ndat wa, "Aa" tǝ "Auwa" wa. 19 Kǝthlǝm Waˈi Farta Yesu Kǝristi, thlaˈtǝ nggǝta tǝ Sila tǝ Timoti ɓasowun ndǝ ǝn kǝ ɗaran. Ngga mǝthlan yi "Aa" tǝ "Auwa" wa, paɗ ǝ hwirˈyan "Aa" weenmǝta. 20 Kǝthlǝm tǝmɗiyan ndiiɗandǝ Farta nat ɗǝf michiɗi chǝtǝn. Ndaˈan chicha tǝmɗi Yesu Kǝristi thlǝ ndat mǝn wa, "Kǝchok kǝɗu" Kǝthlǝm maandi Farta. 21 Nakanya Farta mǝthlan nggǝraˈanchǝ ha tǝ kun kǝ mbahanmǝn thlarta tǝ alkǝt fa hur Kǝristi. Mǝthlan taɗchǝ mǝnchi, 22 ɗǝfamǝnkan wanɗǝsǝndiyan kǝ indiyamǝn thla nech pǝndǝ wa nggǝmǝn yaˈan. Paɗ ndǝfamǝnkan Shemetˈyan kǝ hur wanɗǝkaɗechˈyamǝn, kǝthlǝm wathlandǝ ǝnɗi ha natǝn chǝt thla kǝ pangnga.

23 Paɗ Farta ǝ shinsǝwa, maa lektǝ nati chǝta ndati wa ǝnɗi chich ɗǝwakti tǝ Korinti kǝthlǝm kǝ chekowun chi heˈta wa. 24 Ngga wa tǝ naˈan pǝnowun alkǝt kǝ ɗar fǝr kit ˈyowun wa, auwa, tǝnamǝn chǝt ter mǝt arta, kǝthlǝm kǝ mbǝnwun fata. Kǝthlǝm tǝmɗi fǝr kit ˈyowun thlartǝwun ha tǝ alkǝt fa.