1 Chǝka mǝ nakan wa ǝnsi nati mbǝstǝs wa, nwaat kǝɗi kǝ pangnga tǝ thlaˈ kirsha. Nakanya, nii ɗǝt kǝ pang tǝ ichiɗi pǝnitǝ Chinda Yesu Kǝristi kǝɗ ǝ hur sǝnaˈta, tǝ paɗ hur Shemeta. 2 Sǝninchi yowun nefa, thla kǝ ɓukuya hurat kum nggǝrsǝ foɗɗa hacha, tǝr kǝ fee ndi kǝ hulafǝrta yi mahkanan tǝ alkǝti Kǝristi. Ndu nechan hur fat ya, ndu ngga hur fata wa, sǝnwi wa, Farta ndak sǝncha. 3 Paɗ sǝninchi nafɗiya, tǝr fee ndi kǝ mǝɗi naa Farta, ndu nechan hur fat ya, ndu nga nechan hur fata wa, sǝnwi wa, Farta ndak sǝncha. 4 Ə mǝnni sǝktǝ ichǝ samǝn samǝn thla nawaktǝn mbahan mbuˈta, weˈtǝ thla nawaktǝ pong nef mbahǝn ndiktǝ kǝ ɗaran. 5 Nii thlaˈ kirsha kǝ ɗar nef kǝɗ thleya, paɗaa nii thlaˈ kirsha kǝ indinchǝ wa. Nechi thlaˈ kirsha kǝ ɗar ichiɗi pǝnchǝ huhuthlkaktinchi. 6 Chǝka tǝ ndǝ fee wa tǝ yahi thlaˈ kirsha, mǝ nii nǝ kǝ ɓema wa, kǝthlǝm kit nati mbuˈta. Paɗaa nii thlaˈ kirsha wa, kǝthlǝm yahwisi yowun kǝ tǝr tǝ nenchi kǝ mbǝrantǝ thla ha thlǝ natǝn naa nenchǝ wa. Tǝmɗi ǝnɗi thlǝ chiti tǝ ǝnɗi thlǝ sǝktǝn.

7 Kǝthlǝm kǝ thlaˈi kirsha kǝ ɗar ichiɗi pǝni tǝ Farta yi fǝr saka inda wa. Thlǝ nii kǝ fee yowun hatǝ fata thla nech haɗchan kaan, thla chokichǝf kǝɗ taha ǝ fi fatinchi. Thleˈya chokchan kǝ thlǝ thlǝnda thla thlǝndǝ hweˈra kǝthlǝm kǝn firi ɓahta, paɗ kǝ ˈyatichi thlaˈandǝ inda. 8 Kurɓani shiyandǝ Chinda Yesu mahkan kǝthlǝm kǝ chakichi ha tǝ ǝnɗa. 9 Paɗaa ndikan wa, "Kaafatinchi ǝ chaˈuchi, kǝthlǝm ǝ hur huhuthlkaktiyo thlǝ naa fee ndiiɗ alkǝtinchi." Kǝthlǝm ndaˈan, tǝ mbǝnfat nati chekandǝ thlaˈ kirshinchi tǝ huhulkaktǝɗinchi ya. Kǝthlǝm kǝ choki tǝ alkǝti Kǝristi. 10 Kǝthlǝm ndaˈan, wathlichǝ huhuthlkaktinchǝ ha, tǝ ˈyaraɗi thlǝ naa fee i ˈyaritǝ fa, tǝ saa ɓahta, tǝ nggwarkwana, tǝ mboro kǝthlǝm Kǝristi. Kǝthlǝm ǝ fartǝɗi nawaktǝ alkǝtinchǝsi, ǝ fartaˈan nati tǝ alkǝt fa.

11 Chinchi ɓam kǝt kuɗa, paɗ kun ɗǝfchǝ nenchisi. Kun kǝmchǝs mǝ kǝ chǝm wun nenchi. Chǝka mǝ nakan wa ngga ǝn naki wa, chokwa wa, "Fen tatǝ kǝmsichǝɗi tǝrchǝ indiyanda wa yowunsi kǝɗ tanda wa," pǝɗiwandǝ ha tǝ ǝna yowun wa. 12 I chǝ Farta ǝna wanɗǝsǝncha tǝ ǝna tar sakaˈincha tǝmɗinchi ǝ hur wun. Əna saka inchiɗiya pǝn nda wa nggǝt tatǝ kimsha naki yi kit. Chǝti terinchi hur kǝrǝsa. 13 Mǝ chaandi fowun kǝtǝn shicha chowun wakti? Ndu kǝthlǝm ǝnɗi ˈyatowun ndi kǝ kǝsichiwun si tǝ ǝnɗi yahti wa? Kǝɗu, sǝɓani kaɗi, kalam nenchǝ ha.

14 Tahsinchǝf kǝ wiˈyowunchi fǝ yi mahkanan nakanya. Nii ɗǝfowun heˈta wa, kǝthlǝm kun yahti, ngga wanɗǝɓithlˈyowun yahti wa. Kǝthlǝm kǝm wasi wanchǝ kǝ nggomandǝ ichǝ ha kǝthlǝm parchǝ nanda wa, paɗ kǝmchansi parchǝ nech nggomandǝ ichǝ ha kǝthlǝm wanchi yanda. 15 Nii sǝk mbǝndǝfa kǝ ɓǝlani ǝnɗi nessǝnchi kaɗ nat, paɗ kǝ fǝri indinchǝ, kǝthlǝm kǝ kǝsowunchisi. Maa yahinchi wunchi kaan, awi, nowun takandǝ yahtǝɗi ha thlǝ chǝtǝ wun wa? 16 Nowun nggǝmandǝ tǝ ndat wa, nggǝta chokowunwi fǝ kǝ heˈta wa. Nat tǝ kǝɗu, kun ndat wa, tǝ lǝmi wunchi, tǝ paɗ ɗathlowunchi fa, tǝ lǝmwuchǝ tǝ lekta. 17 Tǝ ɗathlowunchi fa tǝmɗi yowun ǝ hur fee thlǝndi kǝmɗiyowun wa? 18 Shiyani Titus wumanki tǝ yowun wanmanda kǝ ɗǝndǝ kǝmɗiyowun. Nowun ndat wa ɗathlowunchǝ Titus fa wa? Awi, Shemeɗi thlǝ parech har tǝ ndi, ngga ndaˈan thlǝ parecha har tǝ nggaˈan wa? Paɗ ngga mbandǝ arta thlǝ parat ǝn wa?

19 Awi, kǝ choh chowunchan fǝ wa tǝthlǝ naˈan chapandǝ indiyaˈan kaɗ mǝɗˈyowun wa? Fartǝ sǝnchǝsi, tǝthl naˈan mbuˈ kit hur Kǝristi. Kun tǝɗi yahti, nat ǝnɗi thlǝ chǝt ǝn, chichaˈan kǝthlǝm kǝ tǝnowun chǝ ǝn. 20 Kǝthlǝm thlǝ nechi lekǝta, fartǝɗi ɓati, maˈya nii mbǝsowunchi kǝɗ ǝnɗi yahti wa. Kun paɗ nowun mbǝsichǝ kǝɗ ǝnɗi yahtǝwun wa. Nggǝt lekǝta nii mbǝsandǝ yanda, tǝ sǝraˈta, tǝ peˈtǝ hwira, tǝ yah inda, tǝ sǝɓandǝ thlǝm fowun kaɗi, tǝ ǝsfata, tǝ maaan inda, tǝ paɗ thlaˈ hur inda. 21 Nggǝt lekǝta ndat wa maa nggǝrinchǝ ɓat kǝmɗiyowun, Fartinchi nan dǝftǝ kǝ harichǝ fata ǝ pangngǝn wun. Nii sǝɓandǝ hwir kaɗi kǝthlǝm nafchǝ terchan fee chich ɓǝbifata ǝ choh tǝrwakchǝ ha ǝ hur tar fǝlaukǝta, tǝ tar tǝkǝmnda, tǝ ka mban sǝk mbǝndǝfa yi kumi hartǝfata.