1 Nggǝt ɓat kǝmɗiyowun yi mahkanan. Nggǝt ɓat yi mahkanan kǝɗ ǝnɗi nbuˈtǝ yara ndikti Farta. "Nwaat kǝ sǝk fee chǝka yen ndikta meˈi nafchǝ chap ndu mahkan." 2 Ə chapatǝ ɓatinchi tǝɗani thlǝmatǝ fee chich ɓebifata choh tǝ takǝɗ nafchǝ nat kǝ malandǝ chǝt ɓǝbifata. Nakanya nggǝtsi pathlangnwun wa, nggǝt nggǝr tǝɗandǝ thlǝmechˈyowun. Kǝthlǝm maa ɓinchi thlǝ ɓǝɓifatsi nati malanda tǝɗawi thlǝmaˈyan wa. 3 Nakan yahwun kǝ wathlowunchǝ ha ndu thlǝ ndikchǝ Kǝristi tǝmɗinchi, maa kǝɗu ǝ sǝnanya. Kǝristi kuɓawa alkǝt ǝ hurwun wa, paɗ thlǝ pinchan alkǝtˈyan ǝ hurwun. 4 Chǝka mǝ nakan wa kukwanchǝ fee ha tǝmɗi kumi alkǝta, paɗ mǝthlansǝ tǝ shishingnda tǝmɗi alkǝti Farta. Kǝɗu paɗ nggaˈan ǝ alkǝtˈyaˈansi ǝ hwirˈyan wa, chǝka kǝɗu nggǝmǝn tǝ shishingnda tǝmɗi alkǝti Farta kǝthlǝm tarɗi thlǝ chǝtˈǝn ǝ hurwun.

5 Kaɗaman inchowun kǝthlǝm kǝ sǝnwun ndu ngguwun hur fǝr kit. Kǝthl nowun kaɗandǝ inchowun. Awi, sǝnwowun wa Yesu Kǝristi hurwun wa? Maa sǝnwowun wa, chokchan wa hǝmwunha tǝ kaɗaɗiya. 6 Fǝrinchi kit sǝ tǝ ndat wa nowun sǝndǝ wa hǝmwaˈan ha tǝ kaɗaɗiya wa. 7 Paɗaa nggaˈan shiyandǝ Farta kǝ chǝwun ǝnɗi kǝmwakchǝs wa. Ngga kǝthlǝm tǝ yahˈǝn pǝnda wa nggaˈan mbǝraˈǝn kaɗaɗan ha wa, paɗ kǝthlǝm kun kǝ chǝwun ǝnɗi nech keˈke. Chǝka mǝ nakan wa nechan pǝnda wa kǝɗ tǝ wulaˈanchǝ fata. 8 Kǝthlǝm naˈan para kǝrsi kit, nggaˈan mbahǝn chǝt ǝnɗi thlǝ chich atǝkrekǝt tǝ kit wa. 9 Mbǝnfat thlǝ chǝt ǝn maa alkǝt yaˈansǝ wa, paɗ kun alkǝt ˈyowunsǝ. Paɗ nggaˈan shita kǝ chokwun kǝ ndiiɗ chaˈan. 10 Ndaˈan chicha nati yarowun ǝnɗasi fartǝɗi nawakti tǝ wunchi. Kǝthlǝm ma ɓinchi, kǝ chok nwaat mǝɗinchi kǝ fǝrowunchi ngwarkwana kǝ ɗar chǝt ter tǝ alkǝtɗi fǝritǝ Chinda wa. Alkǝtɗi fǝrintǝn yi tǝnanda, ngga yi tǝtokandǝ kaɗ wa.

11 Ə nggel miyan, wanmanchǝna, mbǝnam fata. Kweyamha kǝ chokwun kǝ ndiiɗ chaˈan. Ndǝksaman raˈan, chokam tǝ kaɗat arta, kǝ chokwun hashas tǝ raˈan. Tǝ kǝɗu Fartǝ thlǝ yahraˈan, te has has kǝta, nan choktǝ mbukwa tǝ wunchi. 12 Ndaman ǝn raˈan hur yahraˈan yi kit. 13 Nat fǝ fǝr kitchǝɗi nech mǝɗa tandǝ ndowun ǝn fa.

14 Kafati Chinda Yesu Kǝristi, tǝ yahraˈan i Farta, tǝ thlǝrɗakti Shemeta thla Chiɗ Chiɗ, kǝ chok tǝ wunchǝ nat. Kǝchok kǝɗu.