1 Nggaˈan chǝt ter ɓukwa tǝ Farta. Kǝthlǝm ndaˈan, nggaˈan shiyowunda hur kweˈtǝ ha, kaafaɗi Fartǝ thlǝtwunya kǝ chok pafǝn wa. 2 Kǝthlǝm ndech Farta wa,

"Ə fartǝɗi nati pǝnowun kaafata, ǝ kowunchǝ thlǝmata,

paɗ fartǝ mbǝs hǝraˈta kǝsowunchisi."

Nggǝt mbuˈowunda nakanya nech kǝ fartǝ thlǝt kaafati Farta, paɗ nakanya nech kǝ fartǝ mbǝs hǝraˈta.

3 Yahwaˈan teryaˈan kǝ chok kǝ ǝna ˈyarata wa. Kǝthlǝm ndaˈan, nggaˈan kweˈtǝ ha kǝ chok ǝn kǝ ɗakwan chǝt wansarti chǝkawun wa. 4 Paɗaa nat ǝnɗi nat ǝn chǝta, thlǝ chichaˈan kǝthlǝm kǝ pǝnˈǝn wa nggaˈan fǝ chǝt teri Farta. Thlǝ chichaˈan kǝɗu hur kǝrǝsa, tǝ ngwarkwana, tǝ ɓahtǝ ha, tǝ mboro. 5 Thlǝfaˈanchi fee, cham fee nggaˈan kǝ pursuna, mbǝsaˈan chǝndǝ mǝrinchǝ fa hur thlaˈ hur inda. Chǝˈǝn tera thla pǝɗanchǝ alkǝt ˈyaˈan ha, tǝ kumi ena, tǝ kumi ɗǝsǝmnda. 6 Paɗ nggaˈan pǝn kittaˈan ˈyaˈan tǝmɗi chiɗ chiɗ tǝ wanɗǝkaɗata. Tǝ sǝnˈǝna, tǝ kǝrǝs ǝna, tǝ kaakǝta. Chichaˈan thleya kǝ pǝnˈǝn wa nggaˈan fǝ tarchi Farta tǝmɗi Shemeta thla chiɗ chiɗ, paɗ tǝ yahraˈan yi kit, 7 tǝ ndik kit, tǝ alkǝti Farta. Kaa tarchǝɗi thlǝ chǝt ǝn, chok chan kǝɗen wa ǝna yaˈancha thla natmǝn laa ndǝ indiyamǝnsi ha. 8 Fee fǝraˈan maanda, paɗ fee ɓahaˈan nda. Fee chǝm nggaˈan, paɗ fee sǝɓandǝ thlǝm ǝn kaɗi. Thlǝ ɗǝpaˈanchǝ fee kǝɗ fǝ lǝm nafcha, paɗ nggaˈan ngga fǝ lǝm nafchǝ nakaˈan wa. 9 Thlǝ chaˈan chǝ fee kaɗ kǝɗ sǝnwu fee nggaˈan wa, paɗ ǝ sǝn fee nggaˈan kaan. Kǝɗ nechaˈan meˈi mǝrta, paɗ nggaˈan hur fǝ shishingǝncha. Fee ɓahaˈan ndǝ kaan, paɗ ɓǝlaˈanwu fee wa. 10 Kǝɗ nggaˈan hur sǝbtǝ hwira, chǝka kǝɗu ween mǝta nggaˈan mbǝn fata. Kǝɗ fǝ ɓahcha, chǝka kǝɗu nggaˈan chandǝ nafchi kaɗ terchan kǝ wurumǝncha. Kǝɗ ǝnyaˈansiwa, paɗ chǝka mǝ nat yiˈǝn. 11 Kun Korintiyawecha wuɓowun waˈan ǝna wa, paɗ pǝn ǝn wa nggaˈan yah wunchi kaan. 12 Ngga nggaˈan karchǝ yah wunchǝ wa, kun karchǝ inandǝ wanɗǝkaɗechˈyowun ha kǝ yah wun nggaˈan. 13 Ə ndiktǝɗiya, nggǝt ndiktǝ tǝ wunchi kǝɗ wanchinchi, kun paɗ kǝ pǝnaˈan chǝwun wa yah wun nggaˈan.

14 Kǝ wumawun indǝ tǝ fǝ kumi fǝr kitcha wa. Mǝ wumanchǝ kaakǝt ha tǝ ɓǝɓifata? Paɗ ndu mǝ wumanchǝ ɗaˈkǝt ha tǝ wuthla? 15 Mǝ nech kǝ nggǝtkekti Kǝristi tǝ hweˈra? Paɗ mǝ wumanchi thlǝ fǝr kit ha tǝ thla thlǝ fǝr wakchǝ kit? 16 Mǝ wumanchi fee thlǝ fǝrchǝ mananda Wiri Farta tǝ fee thlǝ fǝrchǝ maanda wurchi ɗǝhacha? Kǝthlǝm nggǝmǝn kǝtǝn shiti Farta thla tǝ shishingndǝ fa. Kǝɗ ǝnɗi nda Farta wa,

"Ni choktǝ tǝ tanda,

kǝ wiˈi pǝthlǝr nanda,

nii nat kǝ Fartǝ ˈyanda,

fen paɗ nandǝ nat kǝ nafchinchi."

17 "Kǝthlǝm ndaˈan, ndech Fartǝ paɗ wa,

"Chemkesh hur nanda,

kǝ chaurawun indiyowun kesh hur nanda,

nda Chinda."

Kǝ tǝkawun her tǝkǝmǝn ǝn fa wa,

ngǝt paɗ ni thlǝt wunchi,

18 nii chok kǝ chinda mǝɗˈyowun,

kun paɗ kǝ chok wun kǝ wanchinchi hǝssa tǝ nǝssa,

nda Chinda thlǝ maanda.