1 Nakanya paɗ, wanmanchina, yahˈǝn kǝ sǝn wun ǝnɗi chǝt kafati Farta ǝ hur nafcha fǝ fǝr kit fee nech ǝ Makidoniya. 2 Kǝthlǝm ɓahndǝ ha kaan tǝ nggwar kwana tǝɗi yim ndǝ ndǝsi, chicha tertǝ mbǝn fatˈyanda ɗǝftǝ tandǝ kǝ chǝt kakǝta yi fǝr pafǝn kaan kǝmɗi fowuna, chǝka mǝ nakan wa tandǝ hur pongngǝn ɓahtǝ kaan. 3 Kǝthlǝm fǝrinchǝ kit si fǝrchandǝ ɓǝra ǝnɗi nessiyanda, thla pǝɗanchǝ alkǝt ˈyandǝ ha. Fǝrchandǝ paɗ tǝ yahtǝ yanda, ngga tǝ kweˈyan fee tandǝ kafa wa. 4 Shiyaˈan chǝndǝ kaan, kǝ nggǝman fee tandǝsi, fen paɗ kǝ fǝrndǝ pafǝn, kǝmɗi fǝ para Farta fee nawaktǝ ǝn ˈyandǝsi. 5 Paɗ fǝrchandǝ pafǝn ˈyandǝ kaan pǝɗantǝ ǝnɗi ha saktǝ ǝn. Tǝrkwathl kanan fǝrndǝ indiyandǝ kǝmɗi Chinda Yesu, thlaˈtǝ minni paɗ fǝr kandǝ indiyandǝ kǝmɗi yaˈan, tǝ yahti Farta. 6 Nakaˈan kǝɗu, shiyan kaˈan Titus kǝ ɗǝ kǝ pangnga tǝ tar nggomandǝ fǝr kǝnau pafǝn yi yahti wanɗǝkaɗata, nakan mǝthlan nggakcha. 7 Hur chǝka mii kun nech pangnga, ndu tǝ fǝr kit ˈyowun hur Kǝristi, ndu hur ndikta, ndu hur sǝn kit, ndu hur yah kǝsandǝ nafchǝsi, tǝ paɗ yahtǝɗi thlǝ pǝnaˈan ndǝ wun, thla nggaˈan thlaˈanchǝ hur wun. Kǝthlǝm ndaˈan, yahchaˈansi kun paɗ kǝɗuwun kǝ pangnga hur tar kafata yi fǝr pafǝn tǝɗa.

8 Ngga kusiˈ nati fǝrowun ndǝ kǝ ɓǝra ndiktǝɗa wa. Paɗ tǝni yah kaɗandǝ kit tǝ yahraˈan ˈyowun, tǝmɗi kaɗandǝ tǝ kweˈti fowun na. 9 Kǝthlǝm sǝnwun kaakǝti Chinmǝn Yesu Kǝristi. Chǝka mǝnakan wurumndǝ nakan, nat tǝ kǝɗu chok kǝ thlǝ ɓahta kǝthlǝm kun. Kǝthlǝm tǝmɗi ɓahtiyan kǝ mbǝswun chǝka mii ǝ mǝɗi Farta.

10 Nii mbuˈowun ǝnɗi kǝmchisi kǝ ɗar ndiktǝɗa, nan nat ndiˈchan kǝ tǝɓawun ǝnɗi ha tǝrtǝwun kanan ǝ huraɗi mbǝrchǝ ha yu, ngga wa tǝ fǝr wun ndak wa, auwa, paɗ fǝrchowun kǝthlǝm tǝ yahwun fǝrta. 11 Nakanya tǝɓaman taran ha tǝ weˈtǝ wanɗǝkaɗaɗi nggaktǝwunsi. Kǝnowun kwech kwech tǝ tǝɓanan kǝɗ ǝnɗi natˈwun kwech kwech tǝrkanan. Cham kǝɗu keˈke tǝ ǝnɗi nessiyowun. 12 Maa wanɗǝkaɗa fǝrtǝ yowunsi, fǝr pafǝn ˈyowun nan mbǝnandǝ Fartǝ fa, maa fǝr wun keˈke tǝ ǝnɗi nessiyowun. Yahwu Farta kǝ fǝrwun ǝnɗi saˈwaktǝ alkǝt ˈyowun wa.

13 Ngga wa tǝni yah fǝran fowun ǝnɗi nech paˈpa, paɗ kǝ fǝrowunchi thla nech ˈyangˈyang wa. Paɗ keˈkesi kǝ kǝsawun fee nawaktǝn ˈyandǝsi. 14 Paɗaa tertǝ ǝnɗi ˈyowun nessi kǝ kǝsanchǝ fee nawaktǝn ˈyandǝsi. Kun paɗ fartǝɗi nawaktǝn ˈyowunsi, fen paɗ neˈsiyanda kǝsowun kandǝsi. Tǝ kǝɗu chǝka mǝ nan nat keˈke. 15 Kǝɗ ǝnɗi yarandǝ fee ha hur ndikti Farta, "Thla nggomanchǝ ha kaan, cha wa fǝ manchan wa, thla nggomchǝ nggudyeh paɗ, cha wa fǝ ngguɗyeh wa."

16 Chaˈǝn usoko Farta, ɗǝftǝn kǝ wanɗǝkaɗati Titus, kǝ tǝrtǝ heˈtǝ kǝsowundǝsi, kǝɗ ǝnɗi ɗǝftǝn kǝ hur wanɗǝkaɗatinchi. 17 Ngga wa ɗichan kǝmɗowun kǝthlǝm ǝnɗi shiyandǝˈǝn wa, paɗ ɓechan kǝɗ ǝnɗi tapatǝn kǝ tǝr hur wanɗǝkaɗatˈyan wa nan ɓata. 18 Nama thlǝn ǝn wanman ǝn ɓukwa tǝɗi, mǝthlan tǝɗi thlǝ manandǝ fǝ fǝr kit cha hur kǝtǝn shicha, kǝthlǝm terˈyan yi ɓas kwastǝ ndikta thla mbinchan yi sǝkta. 19 Kǝrsǝ ndaˈan, nafcha fǝ fǝr kit chiɗi hur kǝtǝn shita, taɗndǝ ndi kǝ wiˈ ɓukwa tǝ nggaˈan. Maa nggaˈan chak kǝnau pafǝn tǝɗiya, kǝthlǝm manandǝ Chinda. Kǝ pǝn ǝn paɗ wa nggaˈan kwech kwech kǝ kǝsaˈǝn tandǝsi. 20 Tǝ naˈan rakandǝ ndat wa kǝ sǝɓan yowun thlǝm ǝn kaɗ wa, kǝ ɓǝra chak kǝnau pafǝn tǝɗi fǝr tǝ fee her chaˈ ya. 21 Yah tiyaˈan kǝ chǝˈǝn ǝnɗi nech keˈke, ngga wa ǝ pangngǝn Chindǝ ndak wa, paɗ nat tǝ pangngǝn nafcha.

22 Nggaˈan paɗ thlǝn yowun wanmanˈǝn ɓukwa tǝ tanda. Wanmanˈǝn tǝɗi kurɓaɗǝ ǝn kaaɗa nda, niˈǝn paɗ thlǝ kweˈchan ha kaan, kǝ ɓǝra ichǝ samǝn samǝn. Nakanya fǝrkan kit kǝ kunya, mǝthlan kwech kwech kǝthlǝm kǝ ɓǝ kǝsowun ndǝsi. 23 Kǝ ɓǝra Titus, nefinchi paɗ mǝthlan shiketǝ terinchi kǝthlǝm kun. Kǝ ɗar wanmanchǝˈǝn tǝɗi nech ɓukwa tanda, nafchi fǝ fǝr kit cha thlǝnchǝ tanda. Ter ˈyandǝ thlǝ ɓechan tǝ maanda kǝmɗi Kǝristi. 24 Kǝthlǝm ndaˈan, pǝnamandǝn nafchǝɗa wa thlǝ yahchowun raˈan. Paɗ kǝ pǝnawun tandǝ ǝnɗi chich thlǝ natˈǝn thlaˈ kirshi tǝ kun. Kǝthlǝm kǝ sǝn nafchǝ fǝ fǝr kitcha wa, thlaˈ kǝrǝsɗi thlǝ natˈǝn chǝt kǝ ɗar indiyowun yi kit.