1 Ɗelwer tǝɗiya thlaˈtǝ mǝɗinchi Bulus, tatǝ kimsha i Yesu Kǝristi, tǝmɗi yahti Farta,

kǝmɗi fee chiɗ chiɗ fee nech hur Afisa, fee nech tǝ kaafata hur para Yesu Kǝristi.

2 Kaafata tǝ kaɓi kaɗi thlaˈtǝ mǝɗi Farta Chinmǝn tǝ Chinda Yesu Kǝristi kǝ chok tǝ wunchǝ.

3 Chaman Farta usoko, mǝthlan tǝɗi nech kǝ Farta, tǝ chin Chinmǝn Yesu Kǝrǝsti. Thla ɗǝfaminchǝ chǝka yen mbǝs ichǝ har yi shemetǝɗi nech hulafǝrta, tǝmɗi Yesu Kǝristi. 4 Kǝthlǝm tat tǝ minchi hur Kǝristi choh kwaɗǝn, kǝnan tǝn heshi, kǝthlǝm kǝ chokmǝn Chiɗ Chiɗ, paɗ fee nggowakchǝ kǝ ǝna ˈyarata ǝ pangngǝn nan. Kǝthlǝm yahtǝɗi yahtǝn minchi,

5 tapi tahsan Fartǝ ha kǝ chok mǝn kǝ wanchiyan tǝmɗi Yesu Kǝrǝsti, tǝmɗi kaɗatˈyan yi kafata. 6 Chichan kǝɗu kǝthlǝm kǝ maanamǝn kafatˈyan yi maandiyan thla fǝramǝn ndǝn herchaˈ tǝmɗi Waˈyan thla yahtǝn. 7 Tǝmɗi mǝrti Kǝristi mbǝs tǝmǝn hǝraˈta, tǝ kalamǝn ɓǝɓifechiyamǝn ha. Chich Fartǝ ǝnɗa tǝmɗi maan kafatˈyan. 8 Kaafaɗi fǝramǝn ndǝn thla nawaktǝ sǝrtaˈansi, ɓukwa tǝ sǝnda tǝ mbǝrtaˈan paɗ.

9 Ɗǝf Fartǝsi kǝ sǝn mǝn ǝnɗi kaɗatǝn thla choh sǝnwaktǝ nefa. Thla paɗ tahsandǝn ha kǝ ndiiɗ ha tǝmɗi Kǝristi. 10 Kaɗatˈyan wa, maa ndiiɗ fartaˈan ha, kǝ wumanchǝ nat icha ǝ kan ɗukwa alkǝti Kǝrǝsti. Ndat wa nat ichiɗi nech hulafǝrta tǝ thla nech hur heshi.

11 Ə hur Kǝrǝsti paɗ, tatǝ Farta minchi kǝ mbǝsmǝn sǝm kǝrsǝ mǝrtiyan. Farta tapi tahsanchǝ ha kǝ chokmǝn kǝ nafchiyan hur Kǝristi. Mǝthlan tǝɗi thlǝ chich chǝka mii tǝmɗi kaɗatˈyan. 12 Kaɗati Farta, ndaˈan nech wa, nggǝmǝn tǝɗi nggakchǝ ɗǝf kǝfat kǝ Kǝrǝsti, kǝ chokmǝn kǝ fee nech maanandǝ kapakǝti Farta.

13 Tǝmɗi Kǝristi, kun paɗ sǝktǝwun kit tǝ ndikta, kwastǝ ndikta thla mbinchan yi hǝraˈtǝyowun. Kǝ fǝr kowun kit kǝ Kǝristi, ɗǝfowun kǝ fee wanɗǝsǝnda yi Shemeta Thla Chiɗ Chiɗ thla ɗǝf tǝ fee miyan, kǝ pǝn wa kun yaˈan. 14 Shemeta Tha Chiɗ Chiɗ ndaˈan wathlamǝnchǝ ha ndat wa Farta nan fǝramǝn sǝm kǝrsǝ mǝrtǝɗi ɗǝftǝn miyan, thla nech choktǝ kǝ yimǝn fartǝɗi naa Farta hǝraˈandǝ fee nech kǝ yaˈan. Ənɗiya paɗ kǝthlǝm manandǝ kapakǝtˈyan.

15 Kǝthlǝm ndaˈan, kǝthlǝm tapi sǝkichi mbanɗi fǝr tǝ wun kit kǝ Chinda Yesu, tǝ paɗ mbanɗi thlǝ natwun yah nafchi Farta, 16 malawi chan Farta usoko kǝmthlǝm kun wa. Nat fartǝɗi nati shita thlǝ nechi kǝɗuktǝ tǝ wunchi. 17 Ndat wa Farta yi Chinmǝn Yesu Kǝristi, Papa thlǝ maanda, kǝ fǝrowunchǝ Shemeta yi mbǝr ǝna tǝ sǝn ǝna kǝ sǝn wun ndi ndiˈchan. 18 Nggǝt shiti paɗ Farta kǝ ɗǝftǝ ɗaˈkǝtˈyan kǝ wanɗǝkaɗechˈyowun. Kǝthlǝm kǝ sǝn wun nech ɗǝf wanɗǝkaɗaɗi ˈyatǝn wunchǝ kǝ ɗaran. Paɗ kǝ sǝnwun maandi wurmaktiɗiyan yi mbǝs ǝn har thla nech kǝ fee nech chiɗ chiɗ, ndaˈan nech kǝ mbǝs ichi har. 19 Nggǝt shiti paɗ kǝ sǝnwun maandi Alkǝti Farta thla pǝɗanchǝ sǝndǝ ha, thla nech kǝ yimǝn nggǝmǝm tǝɗi fǝrchǝ kit. Alkǝɗi nech chǝt ter ǝ hurmǝn, artǝ tǝ Alkitɗi Alkǝɗɗi nech, 20 chǝt ter hur Kǝrǝsti fartǝɗi thlaˈandǝ Farta hur mǝmatecha. Paɗ fǝrankan mǝt chokta thla nech manchan tǝ har harsǝm ˈyan ǝ hukafǝrta. 21 Minni naa Kǝrǝsti chǝt kutǝraktiyan ɗar chǝka yen kurakta, tǝ alkǝta, tǝ thlaˈ kirsha. Thlǝman pǝɗantǝ thlǝmchiɗi ha nat thlǝ naa fee fǝrta, ngga hur heshiɗiya ndak wa, tǝ heshiɗi nech ɓat paɗ. 22 Ɗǝfchǝ Farta ichi nat kǝ kan alkǝti Kǝristi. Paɗ ɗǝf kan ndi kǝ choka kǝ in chǝka mii hur nggomǝn fǝ fǝr kitcha. 23 Thla nech kǝ fatˈyan. Hur nandǝ paɗ chok kǝ Kǝrǝsti kǝ ndiiɗan, thla ndiiɗanchǝ chǝka mǝ ha, chǝka tǝ yen mbenna.