1 Kǝrsǝ thleya Yesu chenkan kufi Galili, thla thlǝ ˈya fee wa Kufi Tibariya. 2 Paɗ kapa nggomnda terchan parech anchi, kǝthlǝm ǝ niindǝ ǝna saka incha thla thlǝ natǝn chita. Tǝmɗi kǝnandǝ nafchǝ kaɗi fee nech haɗchan. 3 Yesu paɗ tǝrkan kǝ ɗar nggwela chokkan ha minni tǝ kǝmsichiyan. 4 Mbǝnfa Tathla i Yahudawecha, sheˈsi. 5 Kǝ thlaˈan kǝ Yesu inda nakan ˈyam nafchǝ terchan ɓata kǝmɗiyan. Tǝɓǝrkan ha kǝmɗi Filibus ndang kan wa, "Nechamǝn ɗǝt hi kulkuli ayi thla naa nafchiɗiya sǝmnda?" 6 Mbuˈchan kǝɗuyu kǝthlǝm kǝ kaɗanchi, kǝthlǝm mǝthlan tǝ indiyan sǝntǝ ǝnɗi natǝn chita.

7 Nggǝman kǝ Filibus ndakan wa, "Chika mǝ kulkuli yi tipesh kumchit kum chap (200) nggech chaˈan tǝ chika wuni kǝ mbǝs ngguɗyeh wa."

8 Artǝ hur kǝmsichiyan Andrawus wanman Siman Biturus ndang kan wa, 9 "Ə yowun wanwaa mǝɗi ya tǝ kulkuli ɗǝrman yi pǝkata, tǝ yirfǝ chap. Kǝɗu mǝna thleya chaˈandǝ tertǝ nggomǝnɗiya kǝɗ thleya?"

10 Ndak Yesu wa, "Ndamandǝn nafcha wa kǝ chok ndǝ ha." Mǝɗan hwalichǝs kaan. Kǝthlǝm ndaˈan hǝssa chokkandǝ ha. nechandǝ kǝɗ aruˈ ɗǝrman(5000). 11 Tǝrkǝ Yesu kulkulitaˈan, kǝrsǝ chan usoko Farta, chakankan fee chokchi ha. Kǝɗu paɗ chitǝn tǝ yirfan. 12 Kǝ sǝm kanda nggalkanda, ndang kan kǝmsichiyan wa, "Nggomaman fishirchaˈan tǝɗi hǝhatech kah yu kǝ thlǝm kǝ sǝɓ chika mǝ kaɗ wa." 13 Nggoman chandǝ takǝt fishirchaˈan tiˈini hur kulkuli tǝɗi ɗǝrman yi pǝkata, paɗ diiɗ kan inaftǝ kum nggǝrsǝ chap.

14 Kǝ nak nafchǝ ǝnɗiya yi saka inda thla chit Yesu. Ndakan ndawa, "Nggǝ asˈindǝs wa, nafɗiya mǝthlan nech kǝ thlǝ mbandi Farta, mbuˈtǝ fee wa nan ɓata kǝ hur heshi." 15 Kǝ sǝnkǝ Yesu wa nafchaˈan ɓata nandǝ tahǝs tǝ fa kǝ tǝr ndǝ anchi kǝ kwitira nwaat, nggǝran kan in kǝ ɗar nggwalan ichiɗan.

16 Kǝ saˈkǝ far wita, ɗǝk kǝmsichiyan kaha kǝ hawurta. 17 Yim kandǝ kǝ hur kombawal nggak kandǝ che ndǝ hawur taˈan kǝ ɗǝndǝ kǝ hahi Kafarnahum. Fartaˈan nggakkǝ mǝt wuthla, tapa wa ɓi Yesu kǝm ɗa ndawa. 18 Nggak kǝ hawurtaˈan tǝrtǝ kafǝrta kǝthlǝm kapa rǝnnaa nech pǝrta. 19 Kǝrsǝ wiˈtǝ kǝɗ kilomita ɗǝrman ndu michcha, kǝɗu nak Yesu ɓat nduk tǝ kombawal taˈan, paɗ kǝmsichaˈan lekǝkanda. 20 Ndang kǝ Yesu tanda wa, "Nggǝta, mǝ lekǝwun wa." 21 Kǝɗu mbǝnkandǝ fata, thlǝ kandǝ anchi kǝ hur kombawal taˈan. Chat kǝɗuyu kombawaltaˈan saˈkandǝ kǝ mii chichangnda mǝɗi nat ndǝ ɗǝta.

22 Əssaɗan nafchaˈan fee thlarchǝ tǝ kǝrsǝ kapa kufiˈyan, kuɗuk ndǝ har wa kombawal artǝ nech minni. Paɗ Yesu yim wa kǝ huran tǝ kǝmsichiyan wa, kǝthlǝm kǝmsichaˈan ˈyan ichin nandǝ pǝɗecha. 23 Terchan fowun kombawalcha ɓech ǝ Tibariya tǝrchǝ kaha nduk tǝ minni sǝmndǝ nafchǝ kulkuli tǝɗi, kǝrsǝ usoko tǝ ɗi chandǝ Chindǝ Farta. 24 Kǝ nak nafchaˈan Yesu tǝ kǝmsǝchiyan tandǝs wa, yim kandǝ kǝ hur kombowalchǝɗi nech minni, pǝɗa kandǝ kǝ Kafarnahum, kǝ ka Yesu.

25 Kǝ chen kandǝ kapa kufiˈan, mbǝsan kandǝ Yesu mii kapa kufiˈan, ndang kanda wa, "Thlǝ maanda, ɓecho kǝmɗiya kwati?" 26 Nggǝman kǝ Yesu tanda wa, "Kittaˈan, nati mbuˈowunda, nechowun ka nenchiya ngga kǝthlǝm ǝna saka inɗi natwun nenchi chita wa. Kǝthlǝm kǝ mbǝswun, kǝ sǝmwun, kǝ nggalwun. 27 Kǝ nowun ɓahtǝha ǝ ɗar ka ɗǝsǝmnda thla nech sǝɓtǝ kaɗ wa. Kwechan kǝ ɓahwun ha kǝ ɗar ka ɗǝsǝmǝnda thla nawakchǝ sǝɓtǝ kaɗi kǝ kwekǝɗan, thla nati nggǝta Waˈi Nefa fǝrowunda. kǝthlǝm mǝthlan nech kǝ thla pǝndǝ Farta kǝ Chinda ndat wa, mǝthlan nech kǝ thla fǝrandǝn alkǝta kǝ chit ichiɗiya."

28 Tǝ kǝɗu chihan kǝ nafchǝ mee Yesu ndakanda wa, "Mǝ nech nat kǝ nwaat nat ǝn chita, kǝ thlǝna ǝn tarchiɗi yahtǝ Farta wa kǝ chi ǝn?"

29 Nggǝman kǝ Yesu tanda wa, "Thleya nech kǝ tarchǝɗi yahtǝ Farta wa kǝ chǝwun, kǝ fǝrwun kit kǝmnɗi thla thlǝndǝn."

30 Nggǝman kanda wa, "Weˈtǝ ǝna saka in mi natu chita, kǝ naa ǝn, kǝ fǝr ǝn kit kǝ wechi. Mǝ natu chita? 31 Kaakech kakechmǝn sǝmndǝ ɗǝsǝmǝnɗi thlǝ ˈya fee wa manna. * thla ɓech hulafǝrta hur chanjeya, kǝɗ ǝnɗi natǝn kǝ yaraɗan ndat wa, ‘Fǝrandech kulkuli ǝ hulafǝrta kǝ sǝmnda.’ "

32 Kǝn Yesu nda ndǝ tanda wa, "Kittaˈan, nggǝt mbuˈowunda, ngga Musa fǝrowunchi kulkuli thla ɓech hulafǝrta wa. Papa inchi thla nech fǝrowun kulkuli thla nech kǝ yi kit ǝ hulafǝrta. 33 Kǝthlǝm, kulkuli i Farta ndaˈan thlǝ ɓech kaha thlaˈtǝ hulafǝrta, thla thlǝ fǝranchǝ shishingndǝ heshi."

34 Ndang kanda wa, "Thlǝ maanda, fǝraˈandǝn kulkulitiˈini kǝ kwekǝɗan."

35 Ndang kǝ Yesu tanda wa, "Nggǝt nech kǝ kulkuli thla thlǝ fǝrchǝ shishingnda. Chika wun ɓech kǝmɗinchi nggǝ mitǝ haɗ anchi wa, chika wun paɗ fǝrchǝ kit kǝ nenchi peˈwu kuchimndǝ hwaranda wa. 36 Nggǝta tapi mbuˈowunchi, niwun nenchi, chika tǝ kǝɗu fǝrwowun kit kǝ nenchǝ wa. 37 Chika wuni thla fǝritǝ Papa nan ɓat kǝmɗinchi, nat thla paɗ ɓech kǝmɗinchi nggi rǝk anchi wa. 38 Kǝthlǝm ɓechi kah hulafǝrta, ngga wa kǝ chi ǝnɗi yahti wa, kǝ chi ǝnɗi yahtǝ thla thlǝnchi nenchi. 39 Thleya nech kǝ ǝnɗi yahtǝ thla thlǝnchi nenchi, ndaˈan nech kǝ sakani nef arta hur fee fǝri tǝn wa. Kǝ thlaˈani tanda kǝ fartǝɗi naa heshi tǝɓata. 40 Thleya nech kǝ ǝnɗi yahtǝ Papa, ndat wa, chika wuni nech ɗǝf wanɗǝkaɗat kǝmɗinchi nggǝta Wanan, paɗ kǝ fǝrtǝ kit kǝ nenchi. Nan mbǝs shishinggnda thla kǝ poriˈ. Nggǝt paɗ ni thlaˈanda fartǝɗi naa heshi tǝɓata."

41 Kǝthlǝm ndaˈan nggakkǝ Yahudawecha hurumndǝ fa kǝ ɗaran, kǝthlǝm ndi wa, "Nggǝt nech kǝ kulkuli thla ɓech kaha hulafǝrta." 42 Nda kanda wa, "Awi, thleya ngga Yesu niya wa, waˈi Yusufu, thla sǝndǝ mǝn manan tǝ chinan wa? Kan tǝ kǝni natǝn ndat wa, ‘Ɓechi kah hulafǝrta?’"

43 Ɗang kǝ Yesu tanda wa, "Kǝ nowun hurumnda pǝthlǝr raˈan wa. 44 Nggǝ nefsi nech mbahǝn ɓat kǝmnɗinchi wa. Maangga Papa thla thlǝnchi nenchi kaɓchi anchi wa, nggǝt paɗ ni thlaˈanda fartǝɗi naa heshi tǝɓata. 45 Kǝɗ ǝnɗi yarandǝ fee ha, hur Laulawechiɗi yara fǝ mbanchi Farta, ‘Farta nat nech chaˈandat har.’ Nat chikawun sǝkcha, paɗ kǝ chaˈa mǝɗi Papa, nan ɓat kǝmnɗinchi. 46 Yowunsi tamchǝ naa Chinda wa, maangga thla ɓech mǝɗi Farta wa, mǝthlan ndak tamchǝ naa Chinda. 47 Kittaˈan nggǝt mbuˈowunda, chika wun fǝrchi kit, shishingndiyan si kǝ kwekǝchi. 48 Nggǝt nech kǝ kulkuli thla thlǝ fǝrchǝ shishingnda. 49 Kaakech kakechwun sǝmndǝ ǝnɗi thlǝ ˈya fee wa manna hur chenjeya, chika tǝ kǝɗu mǝrnda. 50 Thleya nech Kǝ kulkuli tǝɗi nech ɓat kaha hulafǝrta, kǝthlǝm chika wun sǝmcha, kǝ mǝr wa. 51 Nggǝt nech kǝ kulkuli thla thlǝ fǝranchǝ nafcha shishingnda, thla ɓech kaha hulafǝrta. Chika wun sǝmchǝ kulkulitaˈan, nan tarat ha kǝ poriˈ. Kulkuli thla nati fǝrta kǝthlǝm shishingndi nafchi heshi, ndaˈan thlu fatinchi."

52 Nggak kǝ Yahudawechaˈan asˈinda pǝthlǝr nanda, nakandǝ ndat wa, "Kan tǝ kǝni naa nafɗiya ndat wa, nan fǝramǝn thlu fatˈyan kǝ sǝmmǝn?"

53 Ɗang kǝ Yesu tanda wa, "kittaˈan nggǝt mbuˈowunda, maa ǝ sǝm wowun thlu fatinchi nggǝta Waˈi Nefa wa. Paɗ kǝ sowun ferinchi wa, shishingndǝs fiyowun wa. 54 Kǝthlǝm chika wun kangchǝ thlu fatinchi paɗ kǝ sa ferinchi, shishingndǝs fiyan thla thlǝ naa wakchǝ tǝɓata. Nggǝt paɗ ni thlaˈandǝ fartǝɗi naa heshi tǝɓata. 55 Kǝthlǝm thlu fatinchi nech kǝ kulkuli yi kit paɗ fǝrinchi nech kǝ ɗǝsata yi kit. 56 Chika wuni kangchǝ thlu fatinchi paɗ kǝ saa ferinchi, nechan choktǝ ǝ finchi, nggǝt paɗ fiyan. 57 Kǝɗ ǝnɗi naa Papa tǝ shishingndǝ fa thlǝnchi nenchi nechi nat ha tǝ shishingndǝ fa kǝthlǝm mǝthlan. Kǝɗu paɗ chika wun sǝmchǝ finchi, nan tarat ha kǝthlǝm nggǝta. 58 Thlǝya nech kǝ kulkuli thla ɓech kaha hulafǝrta, ngga kǝɗ manna tǝɗi kangndǝ kaakech kaakech wun, paɗ mǝr kanda wa. Chikawun sǝmchǝ kulkulichǝɗiya, nan tarat ha kǝ poriˈ." 59 Mbuˈchǝ Yesu ichiɗiya, fartǝɗi natǝn chaˈan ichi nafchǝ har mǝt nggomndi Yahudawecha ǝ Kafarnahum.

60 Kǝ sǝk kandǝ kǝɗaya, terchan hur kǝmsichiyan nda kanda wa, "Ndiktiɗiya lǝklǝk, wun nech mbahǝn ka thlǝta?"

61 Kǝɗu Yesu shinsǝ wa kǝmsichiyan tandǝ hurumnda kǝ ɗar ndiktǝɗiya, ndang kan tanda wa, "Ənɗiya sǝɓanchǝ wanɗǝkaɗechˈyowun kaɗ wa? 62 Nechan nat kǝn hacha ma niwun nenchi nggǝta Waˈi Nefa tǝrtǝ kafǝrta kǝmɗi natǝn choh? 63 Ənɗi thlǝ fǝrchǝ shishingnda ndaˈan nech kǝ Shemeti Farta, fat paɗ nech mbahǝn chit ǝna wa. Ndikta thla mbuˈowunndi nech kǝ Shemeta, tǝ shishingnda. 64 Kǝɗu fowunsi hur wun fǝrwandǝ kit wa." Kǝthlǝm thlaˈtǝ terkwathl kanan Yesu sǝntǝ fee fǝrwakchi kit tǝ thla nech hiyan ndǝ kaɗi. 65 Chekan kan tǝ ndat wa, "Ndaˈan chicha mbuˈowundi, nggǝ yowunsi nech mbahǝn ɓat kǝmɗinchi wa maangga tǝ yahti Papa wa."

66 Ə ɗar ndiktǝɗiya terchan hur kǝmsichiyan nggǝranchi in kǝrsǝn. Nggǝr wandǝ para anchi paɗ wa. 67 Ndankǝ Yesu fee kum nggǝrsǝ chap yu wa, "kun paɗ tǝ yah wun kǝ pǝɗowun wa?" 68 Nggǝman kǝ Siman Biturus ndakan wa, "Ai Chinda, kǝmɗi wuni nat ǝn ɗǝta? Chi nech tǝ ndik shishingnda thla kǝ poriˈ." 69 Nggaˈan paɗ fǝr ǝn kit, wathlaˈanchi paɗ wa chi nech kǝ thla Chǝɗ chǝɗ i Farta.

70 Nggǝman kǝ Yesu tandǝ tǝ ndat wa, "Ngga nggǝt taɗchǝ wunchi kun kum nggǝrsǝ chap wa? Nakan arta hur wun hweˈrǝ nakan." 71 Ndikchan kǝ ɗar Yahuda, waˈi Siman Iskariyoti. Kǝthlǝm mǝthlan nech hiyandǝ kaɗi, chika mǝ nakan arta hur fee kum nggǝrsǝ chap yu.