Yohanna 9

Kǝnan Yesu thla kaɗ nggǝttǝ fee kǝ komnda

1 Nak Yesu mbǝrtǝ ha, nakan nafɗi nggǝttǝ fee kǝ komnda. 2 Chihan kǝ kǝmsǝchiyan mee. Ndang kanda wa, "Thlǝ Chaˈanan kaɗi, wun chich ɓǝɓifata, nggǝttǝ fee nafɗiya kǝ komnda kǝɗaya? Mǝthlan wa parchaˈan*9:2 Ɓǝɓifati parcha Yahudawecha tǝrchanda wa ma nggǝt fee waa kǝ sǝɓtaˈan, parchaˈan para wandǝ kusi i Musa keke wa. wa?"

3 Nggǝman kǝ Yesu ndakan wa, "Ngga kǝthlǝm kǝt nafɗiya ndu parchaˈan chich ɓǝɓifata wa, kǝɗu kǝthlǝm kǝ pǝn fee teri Farta ɗar indiyan." 4 Nwaat kǝ chimǝn teri thla thlǝnchi nenchi peˈ mǝt ɗaˈ. Na Wiitǝ*9:4 Farta. Wiita saktǝ fartǝ mǝɗya pǝncha wa shishingnda hur heshiɗiya, wiitǝ paɗ mǝrta. chita thla nggawaktǝ yowun chit tera. 5 Ma nggǝt hur heshi, nggǝt nech kǝ ɗaˈkǝti heshi*9:5 Daˈkǝti heshi ndupo Ishaya 49:6. .

6 Kǝ mbuˈkan kǝɗu, chihakan yahtǝ kǝ haha, tǝhɗankan paˈkan kǝ wenita nafan. 7 Ndang kan wa, "Ɗu, chapan wenito kaɗi ǝ kwi ˈyam Siluwam," (Na saktaˈan wa "Thlǝnda"). Kǝɗu pǝɗak nafan kǝ chapandǝ wenitiyan kaɗi nggǝran kan in mǝthlan naa mǝta.

8 Fee nech nduk nduk tǝ anchi tǝ fee sǝnchi ha tǝ naa ndi mǝthlan shitǝ choh. Nda kan da wa, "Ngga nafɗiya thlǝ nech chokta kǝn shitǝ ya wa?" 9 Ndak fowun wa mǝthlanni. Fowun paɗ wa, "Auwa, tǝ thlǝ ndǝ raˈan." Nakan ndat wa, "Nggǝt niya."

10 Kǝɗu ndang kanda wa, kan tǝ kǝni indǝ wenitiyo ha? "Chichan in kǝni kǝn wenitiyo indǝ ha?" 11 Nggǝmkan nda kan wa, "Nafɗi thlǝ ˈya fee wa Yesu yu mǝthlan tǝhɗanchǝ fǝrta tǝ yahta kǝna paˈitǝ kǝ wenita. Ndi kan wa, ‘Ɗu kǝ Siluwam kǝ chepeen wenitiyo kaɗi.’ Pǝɗaki kǝ chapaanda, kǝni mbǝs naa mǝta." 12 Ndang kanda wa, "Mǝthlan ǝ ayi?" Nda kan wa, "Sǝnwi wa."