1 Malkǝ Yesu minni ha, pǝɗakan kǝ thle Yahuda, chenkan kufi Urdun. Nggǝr kǝ nafchi terchan ngom ndǝ kǝmɗiyan. Mǝthlan paɗ chaˈan kan tandǝ har kǝɗ ǝnɗi sǝdǝn ha. 2 Fowun Farisiyawecha ɓakandǝ kǝmɗiyan kǝthlǝm kǝ kaɗa nda, chǝhan kandǝ mee ndang kan nda wa, "Kǝ ɓǝra kusiˈ i Musa, kǝmsi kǝ kal nef nuwan ha wa?

3 Nggǝrang kǝ Yesu tandǝs wa, "Mǝ mbuˈowundǝ Musa wa kǝ chǝwun?" ✝

4 Ndang kanda wa, "Kalaˈanchǝ Musa wa naa nef mbahǝn fǝran ɗelwer nuwan yi chaktǝ ha, kǝ pǝɗa."

5 Ndang kǝ Yesu tanda wa, "Kǝthlǝm kwaˈkwa tǝ inchiyowun ɗǝf chi Musa kǝ yarowunchǝ kusiˈ tǝ ini sǝ kǝɗuyu. 6 Paɗ ǝ tǝrkwathl kan tǝn icha, tahǝschǝ Farta nafcha hǝsh nefa tǝ nunefa. 7 Kǝthlǝm ndaˈan, nefa nan mal chinan ha tǝ manan, kǝ chok ndǝ ɓukwaˈ tǝ nuwan, 8 fen chap paɗ naa ndǝ choktǝ kǝ fat arta. Kǝthlǝm ndaˈan, peˈ wandǝ choktǝ chap wa, paɗaa nef arta. ✝ 9 Kǝthlǝm ndaˈan, nat ǝnɗi wumandǝ Farta, mǝ chakan nef ha wa."

10 Kǝ yim kǝ Yesu kyeuri, nggǝr kǝ kǝmsichayan chǝhan mee kǝ ɗar ndiktaˈan. 11 Ndang kan tanda wa, "Nat thla kalchi nuwan ha, kah kan yowun samǝn, chen tǝ ɗǝf miɗi chǝtǝn tǝ thla kartǝn, ǝ chǝt fǝlaukǝta. 12 Kǝɗu paɗ maa ǝ kar nu nef chimaɗan pǝɗakan kani yowun samǝn, chǝt fǝlaukǝta." ✝

13 Nak nafchi ɓat tǝ wan wancha kǝmɗi Yesu kǝthlǝm kǝ ɗǝfandech mbǝsˈǝn har kǝ in. Paɗaa nak kǝmsichiyan yana ndǝ nafchaˈan. 14 Paɗ kǝ nak Yesu kǝɗuyu, sǝɓkǝ hwirˈyan kaɗi, ndang kan kǝmsichiyan wa, "Malaman wan wancha kǝ ɓandǝ kǝmɗin chi, kǝ ˈyatawun tanda wa. Kǝthlǝm kuturakti Farta yi weˈtǝ naa nda. 15 Kittaˈan nati mbuˈowun nda, nat thla thlǝwakchǝ kuturakti Farta kǝɗ thla thlǝ chǝt wan waa, nee yim kǝ mandǝ hulafǝrta wa." ✝ 16 Nggǝthl kǝ Yesu wan waanchaˈan kǝ kǝfatˈyan, ɗǝfan kan tandǝ her kǝ inda, ɗǝfan kan tandǝ mbǝs ǝn kǝ in.

17 Kǝ thlaˈkǝ Yesu kǝthlǝm kǝ maltǝ mǝɗan ha, chat ɓak yowun nef tǝ rakat kǝmɗiyan, chamkan kuruminchǝ ha pangngǝn nan, chǝhan kan mee, "Kaa thlǝ chaˈandǝ nafchi har, mǝnati chǝta kǝni mbǝs shishingnda kǝ kwekichi?"

18 Ndang kǝ Yesu wa, "Kǝthlǝm mǝ ˈyatu nenchǝ wa kaa nefa? Nefsi nech kǝ kaa nefa wa, mangga Farta ndak wa. 19 Shinin kusiˈ chaˈan, ‘Kǝ ɓilin fata wa. Kǝ chin fǝlaukǝta wa. Kǝ yerkǝn wa. Mǝ lekǝn kǝ ɓǝra ǝnɗi sǝnwaktu wa. Kǝ pupukin nef har wa. Fǝran maandǝ chu tǝ mu.’" ✝

20 Ndangkǝ nafan wa, "Thlǝ chaˈanan kaɗi thlǝ nechi thlǝnandǝ ichi inni thlaˈtǝ fartǝɗi peˈtǝ kǝ kimshaa."

21 Ɗǝpang kǝ Yesu ɗǝmba kafata, ndang kan wa, "Ən arta ndak takucha. Ɗu hiyan ichiyo kaɗ nat, kǝ chekeen fǝ ɓahcha kǝnawan, no mbǝs wurmakta ǝ hulafǝrta. Kǝrsaɗan kǝno ɓat paranenchi."

22 Kǝ sǝkkan kǝɗuyu mbinawu ndiktaˈan wa, pǝɗakan kaɗi tǝ sǝɓtǝ hwira, kǝthlǝm wurumndǝ nakan kaan.

23 Ɗǝpang kǝ Yesu kǝmsichiyan ndangkan tanda wa, "Nan nat ˈYangˈyang wurumincha kǝ yimndǝ kǝ kuturakti Farta."

24 Kǝmsichiyan saka ndak indǝ tǝ ndiktaˈan. Chat nggǝr kǝ Yesu nda ndǝ tanda wa, "Wanchinchi, nan nat ˈyangˈyang kǝ yim nef kǝ kuturakti Farta. 25 Nan nat paˈpa fii nggelupa kǝ yim tǝ kwi lipira mǝni wurumnda kǝ yim kǝ kutǝrakti Farta."

26 Ke sǝkkǝ kǝmsichiyan ndiktaˈan nggǝr indǝ sakandata, ndang kandǝ raˈan wa, "Maa kǝɗu wun nech hǝraˈtǝ hacha?"

27 Ɗǝpang kǝ Yesu tanda, ndang kan tanda wa, "Mǝɗi nafcha nech chǝ kǝɗu wa, nan nat paˈpa mǝɗi Farta. Kǝthlǝm, ichi nat paˈpa mǝɗi Farta."

28 Ndang kǝ Biturus, Yesu wa, "Mal ǝn chǝka mǝ ha nat, pariˈǝn wechi"

29 Nggǝrangkǝ Yesu su wa, "Kittaˈan nati mbuˈowunda, yowunsi nech mal wirˈyan ha, ndu wanmanchaˈan, ndu chinan, ndu manan, ndu wanchiyan, ndu hǝngechiyan, kǝthlǝm nggǝt tǝ kwastǝ ndiktǝɗiya yi sǝkta. 30 Ənɗi natǝn mbǝsta hur heshiɗiya, nan pǝɗandǝ kurɓandǝ kum chǝt kum arta ha, yi wurcha, tǝ wanmanchǝ kǝ hǝssa, tǝ wanmancha kǝ nǝssa, tǝ mancha, tǝ wancha, tǝ hǝnngngecha, paɗ tǝ nggwarkwana. Kǝrsǝ ndaˈan hur heshiɗi nech ɓata nan mbǝs shishingnda kǝ kwekǝɗan. 31 Hur tertǝ nafchiɗi nech pang nakanya, nandǝ chok tǝ kǝ fee nech kǝrsǝn. Tǝ kǝɗu, hur tertǝ nafchiɗi nech kǝrsǝn nakanya, nandǝ chok tǝ ǝ pangnga."

32 Nakandǝ pǝɗat kafǝr kǝ Urshelima, Yesu wiˈtǝ ǝ pangngǝn nanda, kǝmsichiyan paɗ sakandech inda. Fee nech parandi kǝrsa paɗ tandǝ lekǝta. Kaɓ kǝ Yesu fee kum nggǝrsǝ chap yu kǝ kǝlar, nggǝr kan mbuˈandǝ tandǝ ǝnɗi nech sǝɓtǝ tǝ ndi. 33 Ndakan wa, "Namǝn kafǝr kǝ Urshelima. Naa fee fǝr Waˈi Nefa kǝ hari paktǝ pangngǝncha, tǝ fǝ chaˈandǝ kussiˈchi kaɗi. Nandǝ chakan mi mǝrta, kǝ ɓǝlan fee, kǝ fǝrndǝ anchi paɗ kǝmɗi nafchiɗi nggawakchi kǝ Yahudawecha. 34 Nandǝ chan tehletu, tǝ chǝhan yahtǝ kafa, nandǝ thlǝfanda, kǝ ɓǝlandǝ paɗ. Kǝrsǝ mǝndǝ mahkan nan thlaˈta tǝ shishingnda."

35 Ɓak Yakubu tǝ Yohanna, wanchi Zabadi, kǝmɗiyan. Ndang kan nda wa, "Thlǝ chaˈandǝ nafchi har, yah ǝn si kǝ cheˈǝnchin ǝnɗi shiyutǝ ǝn nat."

36 Chǝhangkan tanda wa, "Mǝ yahtǝ wunsi kǝ chowunchi?"

37 Ndaka nda wa, "Fartǝ maandi kutǝraktiyo, nggǝmu fa kǝ chok artǝ hurˈǝn tǝ harsǝm ˈyo, artǝ paɗ tǝ kaku ˈyo."

38 Nggǝrang kǝ Yesu tandǝs wa, "Sǝn wowun ǝnɗi natwun shita wa. Nowun mbahǝn sa wankonga ɓahtǝɗi ha nati sata wa? Ndu kǝ chowunchi fee weˈtǝ baptisma tǝɗi na fee chita wa?" ✝

39 Nggǝr kandǝs wa, "Aa naˈan mbahǝnda."

Ndang kǝ Yesu tanda wa, "Nowun sa tǝɓsaˈyam ɓahtǝɗi nati sata, paɗ kǝ chowunchi fee baptisma tǝɗi naa fee chita. 40 Paɗaa ngga nggǝt nech tǝ alkǝt fǝr chokta tǝ harsǝm ndu kaku inchi wa. Michaˈan tahsanchi fee ha kǝthlǝm fee tahsandǝ fee ha kǝ tanda."

41 Kǝ sǝkkǝ takǝɗ kǝmsichiɗi kum yu kǝɗuyu, sǝɓankandǝ hwir kaɗ tǝ Yakubu tǝ Yohanna.

42 ˈYak Yesu kǝmsichiyan kǝ mǝt arta nat, ndakan wa, "Sǝnwun wa mǝɗi fee nawakchi kǝ Yahudawecha, fee nech kǝ kuturcha, thlǝ pǝnanchandǝ nafchiyanda alkǝta. Paktechaˈan ˈyandǝ paɗ thlǝ pǝnan chandǝ nafchiyandǝ pongngǝn alkǝt paɗ. 43 Paɗaa ngga nechan nat kǝɗu pǝthlǝrwun wa. Paɗ nat thla yahchi kǝn manchan hurwun, nwaat kǝ chǝt tar mafakǝta kǝ takichaˈan. 44 Paɗ nat thla yahchǝ kǝ chok kǝ pangndǝ yowun, nwaat kǝn kǝ mafati chǝka wuni. ✝ 45 Kǝthlǝm chǝka Waˈi Nefa, ngga ɓechan kǝthlǝm kǝ chan fee tar mafa kǝta wa. Paɗ ɓechan kǝthlǝm kǝ chan tǝ nafchǝ tar mafa kǝta, kǝ fǝr tǝ shishingndiyan kǝthlǝm kǝ pǝltǝ nafchi terchan hur ɓǝɓifechˈyanda."

46 Ɓakandǝ kǝ Yeriko. Nak Yesu tǝ kǝmsichiyan tǝ takǝt nafchi chet kesh mǝrɓan, komndǝs ɗas ǝ kǝlaar mbanda, mǝthlan shita. Thlǝman wa Bartimawus (waˈi Timawus.) 47 Kǝ sǝkkan wa Yesu thlǝ Nazarat nech ɓǝrtǝ ha, chat kǝɗu thlaˈankan ɓǝrata ndakana, "Yesu, Waˈi Dauda, kǝ haɗuchifa."

48 Nak fowun nafchǝ terchan yana ndǝ ha, ndat wa kǝ nggas ɓaˈ. Thlat tǝ kǝɗu nakan chekandǝ thlaˈa ndǝ ɓǝrata tǝ alkǝta, ndat wa, "Waˈi Dauda, kǝ haɗuchifa."

49 Thlarkǝ Yesu ha, ndang kan tanda wa, "ˈYamndi."

Ndang kandǝ komnan wa, "Mbunufata, thlaˈu, mǝthlan ˈyawechi."

50 Chat mǝkan kan ǝna chiptiyan kaɗi, thlaˈkan tǝ weshet fa, ɓakan kǝmɗi Yesu.

51 Chǝhan kǝ Yesu mee, "Mǝ yah tusi kǝ chuchi?"

Ndang kǝ komnan wa, "Thlǝ Chaˈanan kaɗi, kǝ mbǝssi naa mǝta."

52 Ndang kǝ Yesu wa, "Ɗu, fǝr kitˈyo ǝ kǝnuchi kaɗi."

Chat kǝɗuyu mbǝstǝ naa mǝta, parakan Yesu pǝɗa kanda.