1 Nakandǝ nduk saˈtǝ kǝ Urshalima, saˈkandǝ kǝ Betafaji mǝɗi na Nggwal Zaitun, thlǝnkǝ Yesu kǝmsichiyan chap. 2 Ndangkan tanda wa, "Ɗam kǝ wan mǝrǝɓɗi pangǝnwun yu, maa nggun yimndǝ kǝ huran nowun naa kwaari tǝ waˈyan kǝnan fee ha. Kwasankowun ha, kǝ ɓichǝwun tanda. 3 Maa innowunchi yowun mee, kǝ ndawunwa thlǝ mandǝ yahchǝ tanda, nan ɓowun tandǝ kaɗ tollaa wa." 4 Ichiˈini sǝɓchǝyu ndiiɗan tǝ ǝnɗi mbuˈtǝ thlǝ shenuˈtǝ tǝ yahti Farta Zakariya ha, ndat wa. 5 "Mbaˈamandǝn nafchi Siyona, ɗǝposi, kwitirˈyowun ɓat kǝmɗiyowun. Nefa thla nawaktǝ maan idiyansi, mǝthlan ɓat ɗar kwaari. Ə ɗar wan kwaari." 6 Pǝɗak kǝmsichaˈan chikandǝ kǝɗ ǝnɗi ndandǝ Yesu taˈan tanda. 7 Ɓakandǝ tǝ kwaari taˈan tǝ wayan kǝmɗi Yesu chipkandǝ ǝnachipchi yandǝ kǝ ɗar nanda. Tǝrkǝ Yesu si, chokkan kǝ ɗaran. 8 Tertǝ nafchiɗi nech hur nggomnan nakandǝ chip ǝnachipchi yandǝ ha kǝ ɗar mbanda. Fowun paɗ chathl kandǝ saˈcha chamkandǝ ha kǝ ɗar mbanan. 9 Nggomǝn nafchǝɗi pangngǝnan tǝ fee kǝrsaˈan thlaˈankandǝ ɓǝratiyanda nakandǝ ndat wa, "Maanaman Waˈi Dauda. Mbǝs ǝn har mǝɗi thla nech ɓat hur thlǝm Chinda." Maanaman Farta thla nech hulafǝrta thla nawaktǝ sǝrtaˈansi. 10 Kǝ yimkǝ Yesu kǝ Urshelima, nat mǝrɓan sakandak inda. Nakandǝ chǝha mee tǝ ndat wa, "Wuneniya?" 11 Ndak tertǝ nafchiɗi nech tǝ Yesu yu wa, "Thleya thlǝ shenuˈtǝ tǝ yahti Farta, Yesu thla ɓech ǝ Nazarat, ǝ hahi Galili."

12 Yimkǝ Yesu kǝ hur kǝtǝn shitaˈan, paɗ rǝkkan nat nafcha fee nech hita tǝ fee nech hǝyandǝ kaɗi hur kǝtǝn shitaˈan. Paɗ mbulmankan tembǝr chi fǝ ɓeɗe wanɗǝɓǝthlcha tǝ mǝtchokti fǝ hiyandǝ ɗiikuturchǝ kaɗi. 13 Ndangkan tanda wa, "Nechan kǝ yaraɗan hur Laulawati Farta ndat wa, ‘Wirinchi nech fee ˈyat wa Wiri Farta.’ Paɗ chankowun kaɗ kǝ mǝt wuɓti yaarcha." 14 Ɓak komincha tǝ tǝraɗcha mbǝsndi hur wuran. Paɗ kǝnankan tandǝ kaɗi. 15 Paɗ kǝ nak paktǝ pangngǝncha tǝ fǝ chaˈandǝ kusiˈ i Musa Kaɗ ǝna sakaa inɗi chǝtǝn. Paɗ nakandǝ sǝk ǝnɗi na wanchǝ mbuˈta tǝ ndat wa, "Maanda kǝmɗi Waˈi Dauda. Sǝɓkǝ hurchandǝ kaɗ kaan." 16 Chǝhan kandǝ Yesu tǝ ndat wa, "Chǝ sǝk ǝnɗi naa wanchiɗa ndata wa?" Ndangkǝ Yesu tanda wa, "Aa tamwowun channggandǝ hur ndikti Farta wa. Thla ndech wa, ‘Chǝ ɗǝfchǝ usoko tǝ maanda kǝ meˈi wancha tǝ wanwaaˈyaarcha fee nech iˈta.’" 17 Malkǝ Yesu tandǝ ha, chekan kesh mǝrɓan, pǝɗakan kǝ Betani, mǝnkan minni.

18 Pung walwurta nakan nggǝrandǝ in kǝ mǝrɓan, kǝsankǝ mita. 19 Kǝnakan yowun ɗǝftǝ shukwata nduk kǝlaar mbanda, ɗikan kimni, paɗ mbǝs wa wanchaˈan wa, kǝ saˈchǝ ndak. Ndangkan shukwaɗan wa, "Mǝ nggirin nggǝt tawa kǝ kweekǝɗan. Chat hwarkǝ shukwaɗan kaɗi." 20 Nak kǝmsichaˈan kǝɗuyu, sakankǝ indǝ tanda ndakanda wa, "Chich in kǝn hwartǝ shukwaɗi kaɗ chat kǝda ya?" 21 Nggǝmankǝ Yesu ndangkan tanda wa, "Kittaˈan nati mbuˈowunda, ma fǝr kit yowunsi as wowun inda wa. Ngga ǝnɗi chandǝ fee shukwaɗa ndak natwun chǝta wa. Paɗ nowun mbahǝn ndandǝ ɗekwen wa thlaˈu mǝɗya kǝ hǝmin kǝ hawurta, nan chǝt kǝɗu. 22 Ma fǝrwun kit chǝka mǝ shiyanduwun Farta hur shita, nowun mbǝsta."

23 Kǝ yimkǝ Yesu kǝ kǝtǝn shitaˈan, mǝthlan hur chaˈandǝ nafchǝ har, ɓak paktǝ pangngǝncha tǝ paktechi Yahudawecha kǝmɗiyan. Chǝhan kanda wa, "Tǝ weˈtǝ alkǝt mii thlǝ chǝtu ichǝɗiya? Paɗ wun fǝruchǝ alkǝɗan?" 24 Ngǝmankǝ Yesu tanda wa, "Nggǝt paɗ ni chǝhowun mee arta, ma fǝrichǝwun nggǝmnan, nggǝt paɗ ni mbuˈowun tǝ weˈtǝ alkǝt mǝ thlǝ chiti ichiɗiya. 25 Baptisma i Yohana ɓechan ǝ ayi? Ə hulafǝrta wa, ndu mǝɗi nefa wa?" Nakandǝ sakandǝ ha pǝrthlǝr nanda, ndakanda wa ma ndi mǝnwa hulafǝrta nechan ndat wa mǝ chǝt fǝrwak tǝ wun kit kǝ ndi? 26 Ma ndimǝn wa, ‘Ɓechan mǝɗi nefa,’ nggǝmǝn lekǝt ǝnɗi na nafchǝ chamǝnnda, kǝthlǝm nat nafcha fǝrndǝ kit wa Yohana thlǝ shenuˈtǝ tǝ yahti Farta." 27 Nggǝman kandǝ Yesu, ndakanda wa, "Sǝnwaˈan wa." Mǝthlan paɗ, ndangkan tanda wa, "Nggǝt paɗ ni mbuˈowunchi ndu tǝ weˈtǝ alkǝt mǝ thlǝ chiti ichiɗiya wa."

28 "Mǝ natwun hacha? Yowun nefsi tǝ wancha kǝ hǝssǝ chap, ɓakan kǝmɗi thla tǝrkanan ndangkan wa ‘Waˈinchi, ɗu chu ter ǝ hǝngga inabi ɓukwiya.’ 29 Nggǝmankan wa, "Ni ɗawa." paɗ kǝ kǝrsa ɓeɗankan kaɗatˈyan ha, ɗǝkan kǝ hǝnggaɗan. 30 Ɗǝk chinnandǝ kǝmɗi chapatǝ wanan, mbuˈankan kǝɗuyu paɗ, nggǝman kan wa ni ɗǝta papa, paɗ ɗǝwa wa. 31 "Hur wanchǝɗi chap ya, wun chich ǝnɗi yahtǝ chinan?" Nggǝman kanda wa, "Thla tǝrkanan." Ndangkǝ Yesu tanda wa, "Kittaˈan nati mbuˈowunda fǝ thlǝt chamincha, tǝ fǝlaucha kǝ nǝssa tandǝ la yimndǝ kǝ kuturakti hulafǝrta mǝ kun. 32 Kǝthlǝm ɓech Yohanna kǝ pǝnowun mban kakǝta, fǝrwowun kit wa. Paɗ fǝ thlǝt chamincha, tǝ fǝlaucha fǝrndǝ kit kǝ ndi. Chǝk tǝ kǝɗu paɗ, ǝ kǝrsa niwun tǝrwowun ha kǝ fǝr wun kit kǝ ndǝ wa."

33 Sǝkam saktaˈan paɗ ya. Chǝ fee yowun nefa thla chich hǝngga inabi, sǝsankan hǝnggaɗan, rekan mǝɗi na fee thlǝ yim wan inabitaˈan. Tǝnkan mǝt njang yi thlǝ ndii hǝnggaɗan. Malkan hǝnggaɗan ha hari fowun fǝ huɗecha, pǝɗakan kǝ hahǝ samǝn. 34 Kǝ saˈkǝ sǝfakti inabitaˈan nduk ha, thlǝnkan mafechˈyan kǝmɗi fǝ huɗechaˈan kǝ ɗǝndǝ thlan yaˈan. 35 Paɗ fǝ huɗechaˈan kǝsankandǝ mafechaˈan, thlǝfan kandǝ arta, ɓǝlang kandǝ arta, mǝmakan kandǝ artǝf paɗ tǝ ɗakwancha. 36 Nggǝrkǝ thlǝwuran thlǝn mafecha, pǝɗanchi fee ha tǝrkwathl kanan tǝ terta. Fǝ huɗechaˈan chan kandǝ tandǝ kǝɗ ǝnɗi chandǝndǝ fee tǝrkwathl kanan. 37 Ə nggǝl miyan thlǝn kǝ thlǝ hǝnggaɗan waˈyan kǝmɗiyanda ndakan wa, ‘Asˈindǝs wa nandǝ fǝran mandǝ waˈinchi.’ 38 Paɗ kǝ nak fǝ huɗechaˈan wanan, ndang kandǝ raˈan wa, ‘Əhǝǝ, thleya nech sǝm kǝrsǝ mǝrtǝ hǝnggaɗan. Ɓǝlaman, sǝm kǝrsǝ mǝrti hǝnggaɗan, kǝ chok kǝ yimǝn.’ 39 Chat kǝsan kanda, mǝkkandǝ ndi kǝ kǝrsǝ sǝsaɗan, paɗ ɓǝlan kanda.

40 "Chǝhan kǝ Yesu mee tanda, fartǝɗi ɓa thlǝ hǝnggaɗan, mǝ natǝn chandǝ fǝ huɗechǝɗa?" 41 Nggǝrang kandǝs wa, "Nan ɓǝlandǝ ɓǝɓi nafchiˈini ǝ mbanɗi ɗǝɗwaktǝ naɗan, kǝ fǝrantǝ fowun hǝnggaɗan. Fee nech na fǝran yaˈan fartǝɗi nǝhatǝn." 42 Ndangkǝ Yesu tanda wa, "Awi, tamwowun channggadǝ hur ndikti Farta ɗi yarandǝ fee ha wa? Thla Ndech wa, ɗakwanɗi kartǝ fǝ tǝncha ndaˈan chokchi kǝ chǝma ɗakwan tǝnan. Thleya teri Chinda, ǝna saka indǝ paɗ ǝ wenitiyamǝn. 43 Kǝthlǝm ndaˈan nggǝt mbuˈowunda, na fee thlǝt kuturakti Farta mǝɗˈyowun, kǝ fǝran fee, fee nech nggǝt wanchǝ ndiˈchan yi kuturaktaˈan. 44 Nat thla hǝmchǝ kǝ in ɗakwanɗiya nan fǝfalat kaɗi, paɗ nat thla hǝmandǝ ɗakwanɗiya kǝ in, nan haˈandǝ kaɗ kǝɗ fuhwata." 45 Kǝ sǝkkǝ paktǝ pamgngǝnchiˈini tǝ Farisawecha saktǝˈinini fǝrtǝn yu, sǝnkanda wa awi kǝɗar nandǝ natǝn ndikta. 46 Yahndǝs kǝ kǝsanda, paɗ tandǝ kwarandǝ nafcha. Kǝthlǝm tǝr nafchǝ ndǝ wa thlǝ shenuˈtǝ tǝ yahti Farta nakan.