1 "Mǝ chakawun mee raˈan wa, kǝthlǝm kun paɗ nggǝ fee chakowunchǝ wa. 2 Kǝthlǝm tǝ weˈtǝ chakmiɗi chakandǝwun raˈan, tǝ weˈtǝ ndaˈan na Farta chakowun ndǝ paɗ. Tǝɓ tartǝɗi kaɗat wunsi, tǝ ndaˈan na Farta kaɗowundǝsi.

3 "Kǝthlǝm mǝ thlǝ ɗǝpandu wan usunɗi nech ǝ weniti shetwa, paɗ kaɗewen har tǝ kunggul ɗǝftǝɗi nech ǝ wenito wa? 4 Necho ndandǝ wanmu wa kǝni, ‘Suku kǝ kǝtani wan usunɗi nech ǝ hur wenitiyo,’ kǝrsaɗan kunggul ɗǝftǝs ǝ hur wenitiyo? 5 Chǝ ɓǝɓi nefa, lo kǝtan kunggul ɗǝftǝɗi kaɗ nech ǝ wenitiyo kwaɗǝn. Kǝno mbahǝn nat ha ndiˈchan thla natu kǝtandǝ wan usunɗi kaɗ weniti shetwa.

6 "Kǝ ferawun yiɗchǝ ǝnɗi nech chiɗ chiɗ wa, kǝ fǝrawun paɗ kǝlanggarchǝ ɗakwan pǝthlaarchǝɗi mǝnandǝwun wa. Kǝthlǝm maa chǝwun kǝɗu nandǝ ɗǝssandata, kǝ tǝɓǝrndǝ ha kǝ chowunchǝndǝ mboro fa."

7 "Nam shiyama na fee fǝrowunda, nam kama nowun mbǝstǝ paɗ. Nam cham kǝɓi mii kǝtǝnan na fee inowundǝsi. 8 Kǝthlǝm thla shicha nan mbǝsta, nat thla kecha na fee fǝranda. Nat thla chich kǝɓi paɗ na fee inan mikǝnndǝsi.

9 "Wun ǝ hurwun chincha thla maa ǝ chǝhan waˈyan kwasata, kǝ fǝrantǝ ɗekwena? 10 Paɗ ndu kǝ chǝhan tǝ yirfa, kǝ fǝrantǝ wirɓa? 11 Ma kun tǝɗi, nech kǝ ɓǝɓi nafcha, ǝ sǝnwun fǝran kaa ǝn wanchiyowun, chek kǝ Chinwun thla hulafǝrta nan fǝr kwastǝ icha kǝ fee shiyancha. 12 "Kǝthlǝm ndaˈan, hur chǝkami nat chandǝn fowun nat ǝnɗi yahtusi kǝ chuchinda. Kǝthlǝm ndaˈan nech kǝ saktǝ Kusiˈ i Musa, tǝ ǝnɗi yara fǝ shenuˈchǝ tǝ yahti Farta."

13 "Yimam tǝ mikǝnda thla nech ɓeukɓeuk. Kǝthlǝm mikǝn ndǝ kǝ tǝktǝha nechan hang. Paɗ mbandǝyan paˈpa ha tǝ paraɗan. Fǝ yiminchaˈan kǝ huran paɗ terchanda. 14 Paɗ mikǝndǝ kǝ mǝt shishingda, ngguɗyeh, mbandiyan paɗ ˈyangˈyang paraɗan. Fee thlǝ parech sǝ paɗ terwanda wa.

15 "Mbǝramsǝ tǝ fǝ shenuˈchǝ tǝ yahti Farta kǝ fǝ lekcha. Fee thlǝ ɓech kǝmɗiyowun kǝɗ kaa nafcha. Yi kittaˈan, nechandǝ kǝɗ wanmerucha, fee thlǝ chanchǝ mboro nafchǝ fa. 16 Nechowun sǝn tandǝ tǝ weˈtǝ ter ˈyanda. Na fee mbahǝn ɗam wanwulma ɓǝra shelǝma wa? Ndu kǝ mbǝs fee wanshikwata, ǝ ɓǝra fǝrtǝtaha wa? 17 Kǝɗu paɗ, chǝk yen ɗǝfta thla nech ndiˈchan, thlǝ nggǝtchan wanchǝ ndiˈchan. Paɗ ɗǝftǝɗi nawakchǝ ndiˈchan, thlǝ nggǝtchan wanchiɗi nawachǝ ndiˈchan. 18 Ɗǝfta thla nech ndiˈchan nggǝt wa ɓǝɓi wancha wa, kǝɗu paɗ ɓǝɓi ɗǝfta nggǝt wa wanchǝɗi nech ndiˈchan wa. 19 Nat ɗǝftǝɗi thlǝ nggǝtwakchǝ wanchǝ ndiˈchan, thlǝ chathlanchǝ fee kaɗi, kǝ mǝk fee kǝ hur wata. 20 Kǝthlǝm ndaˈan, tǝ weˈtǝ teri fǝ shenuˈchǝ tǝ yahti Farta kǝ fǝ lekchǝ yu, natwun sǝn tandǝsi.

21 "Ngga nat thla thlǝ ndiicha wa, ‘Chinda, Chinda’ nech yimndǝ kǝ kutǝrakti hulafǝrta wa. Maangga thla chich ǝnɗi yahtǝ Papa thla nech hulafǝrta wa. 22 Ə fartǝ chak mee nafchǝ terchan nandǝ ndii tǝ wa ‘Chinda, Chinda, ngga ǝ ɓasˈǝn tǝ thlǝmwa wa? Ngga ǝ rǝkˈǝn hwaˈarchǝ terchan tǝ thlǝmwa wa? Chǝwaˈan tar ǝna sakaˈinchǝ terchan hur thlǝmwa wa?’ 23 Kǝni ndandǝ tandǝ hayang wa, ‘Nggǝt tamwi sǝnwunchǝ wa. Chakamha tǝnenchi, kun fǝchǝt ɓǝɓi icha.’

24 "Kǝthlǝm ndaˈan, nat thla sǝkchǝ shenuˈtǝɗinchiya, paɗ kǝ chit tersi, nechan choktǝ kǝɗ thlǝ sǝnˈǝna thla tinchǝ wirˈyan ɗar fera. 25 Kǝ ɓak ˈyer kaha, ndiiɗ kǝ kuficha, welkǝ ˈyaman ha, thlaˈkǝ rǝnnaa kǝ pok wuran, chǝk tǝ kǝɗu hǝmwaha wa. Kǝthlǝm ɗǝfchǝ fee la tǝnan ɗar fera. 26 Nat thla sǝkchǝ shenuˈtǝɗinchiya paɗ kartǝ chǝt tersi, nechan kǝɗ yowun ɓema thla tinchi wiryan ɗar chokita. 27 Kǝ ɓak ˈyer kaha, ndiiɗ kǝ kuficha. Welkǝ ˈyaman ha, thlaˈkǝ rǝnnaa kǝ pok wuran. Chat wuran, hǝmkan ha pǝrǝf."

28 Kǝ tǝɓang kǝ Yesu mbuˈ ichiɗa, chat nggomndi nafchaˈan sakandak inda tǝ chaˈaɗanˈyan. 29 Kǝthlǝm chaˈanchan tandǝ har kǝɗ nafɗi nech tǝ alkǝtfa, ngga kǝɗ fǝ chaˈandǝ kusiˈ i Musa kaɗ wa.