1 Nggǝt pǝnowun Fibi wanmanmǝn, thla thlǝ chich ter kǝtǝn shiita ǝ Kankiriya, ndat wa, kaa nef nakan. 2 Thlamndi hur thlǝm chinmǝn, cham kǝɗu ǝ mbanɗi kǝmchǝsi, kǝɗ thla thlǝ chǝt fǝ para mbanchi Farta. Kǝsamandǝnsi chik tǝ yen mbenna thla yahtǝn, kǝthlǝm mǝthlan tǝ indiyan, chok kǝ kaa shiketǝ nafchǝ terchan, nat tǝ nggǝt paɗ. 3 Ndaman ǝn Biriskila fa tǝ Akila paɗ nat ndǝ wa shikechǝ tarchinchi hur Kǝristi Yesu. 4 Fǝrndǝ shishingǝn chiyanda nduk mǝrtǝ kaɗi, kǝthlǝm nggǝta, ngga nggǝt ichinna nech chan usoko kǝmɗiyandawa. Auwa, nat nafchiɗi thlǝ fǝrchǝ kit kǝmɗi Farta, fee nawakchǝ kǝ Yahudawecha fen paɗ naandǝ chan tandǝ usoko. 5 Ndaman ǝn nafchǝfa fǝ parecha thlǝ ngomchǝha wirˈyanda. Ndaman ǝn Afanitus, shiketǝna thla nggakchǝ thlǝt Kǝristi ǝ hahi Asiya. 6 Ndaman ǝn Maryamu fa, thla chich tǝr kaˈan kǝthlǝm kun. 7 Ndaman ǝn Andaronikus tǝ Yuniya fee nech kǝ Yahudawecha kǝɗ nggǝta, fee paɗ kǝnandǝ fee tanda ǝ pursuna nat tǝ nggǝta. Sǝn fee tandǝ kaˈan pǝthlǝr taatǝ kǝmsicha, paɗ liindǝ thlǝt Yesu Kǝristi. 8 Ndaman ǝn Amfilitus, shiketǝna thla thlǝ yahti hur Chinda. 9 Ndaman ǝn Urbanus shiketǝ terˈyamǝn hur Kǝristi, tǝ shiketǝna Sitakis. 10 Ndaman ǝn Afalis thla sǝndǝ fee ndi tǝ chan ter Kǝristi. Ndaman ǝn nafchǝɗi wiri Aristobus fa. 11 Ndaman ǝn Hirudiyan fa wanmana thlǝ Yahudawata. Ndaman ǝn fee fǝrchǝ kit kǝmɗi Chinda, nafchǝɗi wiri Narkisas.

12 Ndaman ǝn Tǝrafina, tǝ Tǝrafusa, nǝssǝɗi fee chanchǝ ter Chinda kaˈan. Ndaman ǝn Barsisa shiketǝna thla yahti, nuɗi chanchǝ ter Chinda kaˈan. 13 Ndaman ǝn Rufus fa thla sǝndǝ fee ndǝ hur teri Chinda. Paɗ ndaman ǝn mananfa thla tǝrchǝ nenchǝ kǝɗ waˈyan. 14 Ndaman ǝn Askitus, tǝ Filigona, tǝ Hermes, tǝ Faturobas, tǝ Harmas, tǝ paɗ tǝ takǝt wanmancha fǝ fǝr kit tǝɗi nandǝ mǝt arta. 15 Ndaman ǝn Filologus, tǝ Yuliya, tǝ Niriyus, tǝ wanmanan kǝ nunefa. Ndaman ǝn Olimfas, tǝ paɗ tǝ takǝt wanmancha fǝ fǝr kit tǝɗi nandǝ mǝt arta. 16 Ndaman ǝn raˈanfa tǝ nggǝthl fatkafa yi mbǝnfata, tǝ chǝɗchǝɗ tǝ wanɗikaɗata. Nat fǝ parechǝ Kǝristi mǝɗiya, tandǝ paɗ tandǝ ndowun ǝn fa.

17 Nggǝt shiyowunda wanmanchǝna, mbǝramsi tǝ fee nech chakowundǝha, kǝ ɗǝfndǝ wunchǝ kǝ che wansarta, kǝ ɓǝra chaˈaɗi thlǝtwun. Mbǝham langǝ tǝ weˈtǝ nafchiˈinni. 18 Kǝthlǝm weˈtǝ nafchiˈinni ngga teri Kǝristi Chinmǝn thlǝ chǝt ndawa. Hwir ˈyandǝ dak thlǝ chaandǝ ndǝ tera. Tǝmɗi mbǝn meˈyanda thlǝ lǝmndǝ ndǝ fee nech tǝ paˈpaˈ tǝ incha. 19 Kun paɗ, chika wuni tapi shiki saktǝ fǝr mandǝyowun kǝ ɓǝra ndiktǝ Kǝristi Yesu. Kǝthlǝm kǝt ndaˈan wanɗǝkaɗatinchi chǝɗchǝɗ kǝ ɗarwun. Nat tǝ kǝɗu, yahinchǝs kǝnowun ɗathlchan tǝ ǝnɗi nech ndiˈchan. Kǝ kǝmowunchǝ ǝn tǝ ǝnɗi nawakchǝ ndiˈchan wa. 20 Farta thla thlǝ fǝrchǝ kǝɓikaɗi, nduk ha kǝ rǝɓantǝ Hweˈra, kǝ furowuntǝ alkǝta kǝ ɗaran.

Kaakǝti Chinmǝn Yesu, kǝ choktǝ wunchi.

21 Timoti shiketǝ terinchi, mǝthlan ndowun ǝnfa. Kǝɗu paɗ Lukiyas, tǝ Yason, tǝ paɗ Sosifata, wanmanchina, Yahudawecha.

22 Nggǝt, Tartiyus, thlǝ yara wan ɗelwer tǝɗa, nggǝt ndowun ǝnfa hur Chinda.

23 Gayus thla tǝrti kah wirˈyan, tǝ kwaan nafcha fǝ fǝr kit, fee thlǝ kǝmchǝ kyeuriyan tandǝ ndowun ǝn fa. Erastus thlǝ kǝs kopo i hahǝ har, tǝ Kwartus wanmanmǝn tandǝ ndowun ǝn fa.

[24 Kaakǝti Yesu Kǝristi Chinmǝn, kǝ chok tǝ wunchǝ nat. Kǝ chok kǝɗu.]

25 Malaman kǝ fǝramǝn Farta, mǝthlan tǝɗi naa alkǝtˈyansi, kǝ ɗǝftǝ wunchi kǝ chok wun tǝ alkǝtfa, kǝ ɓǝra kwastǝ ndikta thla binchan kǝ ɗar Yesu Kǝristi, thla sǝktǝ wun mǝɗinchi. Ndiktǝɗi nech ǝ wubtǝ kaɗ choh choh. 26 Nakanya paɗ chenfe kesh hayang, tǝmɗi yarechi fǝ shenuˈta tǝ yahti Farta. Tǝ mbaˈti Farta, thlǝ maanda mbaˈan kǝ fee kaɗi kǝmɗi hahi heshi nat, kǝthlǝm nat nafcha kǝ fǝrndǝ kit kǝ anchi paɗ kǝ mananda. 27 Nakan maanda kǝmɗi Farta, mǝthlan ndak thlǝ ɗathla. Kǝ manan fee tǝmɗi Yesu Kǝristi, kǝ kweˈkǝchi. Kǝ chok kǝɗu.