Apocalipse 15

E Mojsijasi thaj e Bakroresi đili

1 Tegani dikhljem aver baro čudesno znako ko nebo: Efta anđelura e eftane palune nevoljencar – palune golese so lencar ačhadol e Devlese holi.

2 Tegani dikhljem khanči sar more taro staklo, mešimo e jagasa thaj po more taro staklo ačhena kola so pobedisade e Zvero, lesi ikona thaj o đinipe lese alavengo. Ićarena e harfe saven o Dol dija len 3 thaj đilabena i đili e Devlese slugasi e Mojsijasi thaj i đili e Bakroresi:

"Bare thaj čudesna si ćire buća,

Gospode, Devla, Vladarona pe sa!

Pravedna thaj čačukane si ćire droma,

Carona e narodurengo!

4 Ko te ma daral tutar, Gospode,

thaj te ni slavil ćo alav?

Golese so tu san jekh sveto!

Sa e manuša ka aven ke tute

thaj ka klanjin pe angle tute,

golese so sikadile ćire pravedna buća!"

5 Pale gova dikhljem sar ko nebo putajlo o Hram, kaj si o šatori tare Devleso svedočanstvo. 6 Thaj andaro Hram iklile efta anđelura, saven sesa efta nevolje. Sesa urade ane thode thaj sjajna lanena fostanura taro čaršafi thaj pe kolina lenđe sesa zlatna pojasura. 7 Jekh tare štar džuvde bića dija e efta anđelurenđe efta zlatna čare pherde e Devlese holjasa savo si džuvdo ke sa e đivesa. 8 O Hram pherdilo e čurosa tare Devlesi slava thaj zuralipe, gija kaj khoni naštine te avol ano Hram dži kaj ni ačhadon kola efta nevolje tare efta anđelura.