1 Ano leso desno va Kolese so bešol ko presto dikhljem paćardo lil so sasa pisimo andral thaj avral thaj pečatirimo efta pečaturencar.

2 A dikhljem jekhe zurale anđelo sar vaćarda bare glasosa: "Ko si dostojno te phađol kala pečatura thaj te putrol kava paćardo lil?"

3 Al khoni ni ko nebo, ni ki phuv ni tali phuv naštine te putrol o paćardo lil ni te dićhol ane leste. 4 Tegani me lijem te rovav but golese so khoni naštine te putrol o paćardo lil thaj te dićhol ane leste.

5 Al jekh tare starešine phenda manđe: "Ma te rove. Ek, pobedisada o Lavo tare Judaso pleme, o Koreno e Davideso. Vov šaj phađol e pečatura thaj te putrol o paćardo lil."

6 Tegani dikhljem sar maškaro presto thaj maškare štar bićura thaj maškare starešine ačhol Bakroro savo izgledila sar čhindo. Sasa le efta šinga thaj efta jakha, save si efta duxura e Devlese bičhalde ane sa o sveto. 7 O Bakroro avilo thaj lija taro desno va Kolestar so bešlo ko presto o paćardo lil. 8 Thaj kana lija o paćardo lil, e štar bićura thaj e bišteštar (24) starešine pele ke pe koča anglo Bakroro. Savoren sesa harfe thaj zlatna čare pherde tamjanesa, so si e molitve e Devlese manušenđe. 9 Von đilabena nevi đili:

"Dostostojno san te le o paćardo lil

thaj te phađe lese pečatura,

golese so sana čhindo,

thaj će ratesa poćindan e manušen bašo Dol

e manušen tare sa e plemenura, čhiba, narodura thaj nacije.

10 Ćerdan len te aven carstvo

thaj sveštenikura amare Devlese,

thaj von ka vladin ki phuv."

11 Tegani dikhljem thaj šundem glaso tare but anđelura trujal o presto thaj tare bićura thaj tare starešine. E anđelurengo đindipe sasa milja thaj milionura. 12 Đilabena bare glasosa:

"Dostojno si o Bakroro, savo sasa čhindo

te lol i zor, o barvalipe,

o mudrost, o zuralipe, o čast

i slava thaj o blagoslov!"

13 Tegani šundem sa e stvorenjura ko nebo, ki phuv, tali phuv thaj ko more thaj sa so si ane lende, sar phenen:

"Blagoslov, o čast, i slava thaj o zuralipe

Kolese savo bešol ko presto

thaj e Bakrorese ane sa e đivesa!"

14 Thaj e štar bićura vaćarde: "Amin!" A e starešine pele ke pe koča thaj klanjisajle lese.