1 Ko dešutrito (13.) đive ano dešudujto (12.) čhon o Adar, kana e caroso proglas trubuja te avol važećo, isto gova đive kana e dušmanura e Jevrejenđe nadisajle kaj ka dobin vlast pe lende, sasa averčhande: E Jevreja dobisade vlast pe kola save mrzisade len.

2 E Jevreja ćidije pe ane pe forura ane sa e provincije e carose e Kserksese, te napadin kolen so manglje lenđe te ćeren bilačhipe. Khoni naštine te ačhavol len, golese so i dar dolda sa e naroduren. 3 Sa e upravitelja, e namesnikura, e šorutne ane provincije thaj e carose službenikura pomožina e Jevrejenđe golese so darajle taro Mordehaj. 4 A sar e Mordehaje sasa baro uticaj ane carosi palata, o glaso lestar šundilo ane sa e provincije thaj vov lija te avol sa pozuralo.

5 E Jevreja čalade mačurencar pire dušmanuren, mudarde len thaj uništisade len. Sa so manglje, ćerde kolencar save mrzisade len. 6 Samo ani palata ano foro Suza, e Jevreja mudarde thaj uništisade pandžšele (500) dženen. 7 Mudarde i e Paršandato, e Dalfone, e Aspate, 8 e Porate, e Adalje, e Aridate, 9 e Parmašte, e Arisaje, e Aridaje thaj e Vajzate, 10 e deše (10) čhaven e Hamanese, e čhave e Hamedatinese, e Jevrejenđe dušmane. Al tare lengo barvalipe khanči ni lije.

11 E carose gova đive vaćarde kobor manuša mudardile ani palata ani Suza. 12 A o caro phenda e caricaće e Jestiraće: "E Jevreja mudarde thaj uništisade pandžšele dženen thaj deše čhaven e Hamanese ani palata ano foro Suza. So li ćerde ane avera provincije e carose? Gija, savi si ći molba? Ka avol tuće uslišime. So si gova so rode? Thaj gova ka dol pe tuće."

13 I Jestira phenda: "Te si e carose palo manglipe, de e Jevrejenđe ani Suza i theara te ćeren palo avđivesutno proglas, thaj e Hamanese deše čhavenđe telura te umlaven ke vešala."

14 Tegani o caro zapovedisada baš gija te ćerol pe. Ani Suza dije proglas thaj umlade e Hamanese deše čhavenđe telura. 15 E Jevreja tari Suza ćidije pe i ko dešuštarto (14.) đive, ko čhon o Adar, thaj mudarde trišele (300) muršen ani Suza. Al tare lengo barvalipe ni lije khanči.

16 A i avera Jevreja, kola so bešle ane carose provincije, ćidije pe te branin po džuvdipe thaj po mir tare dušmanura. Mudarde eftavardeš thaj pandž milje (75 000) dženen, al tare lengo barvalipe ni lije khanči. 17 Sasa gova dešutrito (13.) đive ano čhon o Adar, a ko dešuštarto (14.) đive odmorisajle. Gova đive odredisade te avol đive kana xan thaj veselin pe. 18 E Jevreja tari Suza ćidije pe dešutrito thaj dešuštarto đive, a o dešupandžto (15.) odmorisajle thaj gova đive odredisade te avol đive kana ćeren gozbe thaj veselin pe. 19 Golese e gavutne Jevreja slavin dešuštarto đive ano čhon o Adar sar đive kana ćeren gozbe thaj veselin pe, thaj ke gova đive dena jekh avrese darura taro xape.

20 O Mordehaj pisisada sa kava so sasa, thaj bičhalda lila sa e Jevrejenđe save sesa paše thaj dur ane sa e provincije e carose e Kserksese. Naredisada lenđe 21 dži jekh berš te slavin o dešuštarto (14.) thaj o dešupandžto (15.) đive ano čhon Adar 22 sar đivesa kana e Jevreja odmorisajle tare pe dušmanura thaj sar čhon kana lengo žalost ćerdilo ano radost, a o bibaxtalipe ano baxtalipe – gola đivesa te slavin sar đivesa kana ćeren gozbe thaj veselin pe, kana den jekh averese darura taro xape thaj kana den e čororenđe. 23 E Jevreja nastavisade te slavin kava prazniko dži jekh berš thaj te ćeren gija sar so pisisada lenđe o Mordehaj.

24 Golese so, o Agagovco o Haman, o čhavo e Hamedatineso, dušmano sa e Jevrejengo, ćerda zavera te mudarol sa e Jevrejen, pa čhudija kocka savi akhardola pur, sar bi odredila o đive baše lengo mudaripe thaj uništipe. 25 Al kana i Jestira iklili anglo caro, vov dija pisimo nalog te phađol ko šoro e Hamaneso o bilačho plano savo ćerda protiv e Jevreja, thaj te umlaven le thaj lese čhaven ke vešala. 26 Golese gola đivesa akhardon Purim palo lafi "pur".

Baše sa so pisisada o Mordehaj ano lil, baše sa so dikhlje thaj baše sa so sasa lenđe, 27 e Jevreja prelije pe peste te ćeren gova adeti ane sa e đivesa, von, lenđe čhave thaj savore save tek ka aven te bešen lencar, dži jekh berš te slavin gola duj đivesa ano čhon o Adar sar so sasa propisime. 28 Tare gola đivesa trubun te den pe gođi thaj te slavil len dži jekh familija ane sa e kuštika, ane sa e provincije thaj ano dži jekh foro. E Jevreja nikad ni smin te ačhaven te slavin o Purim, ni te bistren gola đivesa maškare lenđe kuštika.

29 I carica i Jestira, e Avihajilesi čhej, thaj o Mordehaj o Jevrejo, pisisade dujto lil kaj sesa len pherdo ovlašćenje savesa potvrdisade o angluno lil taro Purim. 30 O Mordehaj bičhalda kala lila sa e Jevrejenđe ane šelubištefta (127) provincije e carose e Kserksese, haberesa taro mir thaj sigurnost, 31 te proglasin pe gola đivesa taro Purim ano određeno vreme, sar so o Mordehaj o Jevrejo thaj i carica i Jestira odredisade. Jednako gija e Jevreja odredisade vreme taro post thaj tugujipe baše peste thaj baše pe potomkura. 32 Gija e Jestirako zapovest potvrdisade kala propisura bašo Purim thaj gova sasa pisimo ane caroso lil.