1 Byana je monso u maka̠la̠ man ma Hwinsu Buca abuci uba ui eagi, na aci uga saawo sa Hwinsu! Hinda ina gaci sa bini! Ube u san doone uba ci dakuwo zwama ui dakuwo Hwinsu. 2 Sa'usa a simui sina gya na ka̠ri, baniya cisa saawo sa Hwinsu, ama ci dakuwo ina gaci ci sana. Ama ci daki an sa Yesu a serya, ci sana nga̱ Bware, zwama ci hyan Bware nga̱ buba yiwa na nagu ciri na izangacu. 3 Ka̱mu buna bu tane soo na bu gimbo i sana nga̱ Kristi busa bu kimga icwa i na nagu ciri zwama bu yan nga̱ Yesu aba yiwa na nagu u ciri.

4 Ka̱mu buna bu ea magwata bu punje cikarigo ci Hwinsu; zwama magwata̱ masa nagu i lagano u cikarigo ci Hwinsu. 5 Ama i daki an Yesu a kore zwama a zangaci magwata̱ amaci. 6 Buna bu yiwa tare na Yesu buza i ala buba ne eaga magwata̱. Ama buna bu re gaba na eaga magwata̱ bwe sa tabuwa i hyan Yesu ko bu daki Bware. 7 Saawo a simui, ita yada buciyahya bui inacume. Buna bu ea ina gyamace busa bu bura̱, nga̱ Yesu aba sa a bura̱. 8 Buna bu ali na eaga iwo abusa bu bugwama bu iwo, zwama tun na jigu buco bu iwo bu ea magwata̱. Bwa bu Hwinsu bu kore zwama bu hacigage ibwana i bugwama bu iwo. 9 Aco na sa saawo sa Hwinsu a za ala na eaga magwata̱, zwama ikanga i pun i Hwinsu i yiwa na buba; zwama bwe sana Bwa bu Hwinsu aza ala na ea magwata̱. 10 Harbuna aba ai daki saawo sa Hwinsu na saawo bugwama bu eewo: Aco na ai eaguwo ina Hwinsu uba hyen an a eagi; ko buna bui ka̱ruwo buhun bu buba bui sa bwa bu Hwinsu.

11 Cikarigo cina ci ga̱hi i hoge na jigu a cini: An ci ma ka̱la̱ngi. 12 Cita yana nga̱ Kayinu, ana asa buco bu iwo ana a hone buhun bu bware Habila. Bai san Kayinu aba hone buhun? Zwama ibwana i bware isa iwo hinda ibwana i buhun isa i burya̠ . 13 Ita hoga mamaki, ahun nimui, sa aco doone ai wonje. 14 Ci daki na ci curi u'o ci korwa pa a̱hunru, ci daki haruni zwama maka̱la̱ ma ahun naci. Aco na za maka̠la̠ a sewa koce u u'o. 15 Aco na a wonje aco menwa asa nga̱ a honago aco, hinda i daki an ahonago aza inhya hurun ana aza ihogu.

16 Harbuni gaci daki maka̠la̠ masa: Yesu Kristi a pan icwa ya ba pa gaci. Gaci hinda u kamace pan sicwa a sici zwama acagiya ahun. 17 Si buna buza izana hinda bu hyan buhun na nagu hinda bwe hogowa yama i buba, neya maka̠la̠ ma Hwinsu uba ui yana na buba? 18 Saawo a simui, cita ea maka̱la̱ ma cikarigo ci uno, i cibe pa cihano a cihin ci kamahinda. 19 Ci daki harbuni an cisa aco kamahinda, harbuni gaci ci labta hasuwa a haci pa Hwinsu 20 ka̱mu hon na hasuwa a haci hab ci cibe magwata a maci. Ci daki na Hwinsu u daki hasuwa a haci, hinda u daki tibai.

21 Si'osa a simui sina gya na ka̠ri, si hasuwa a haci hai ci cibewa magwata a maci, ci daki na hasuwa a haci an ci yinsana pa Hwinsu 22 ci ca tibai gaci ginbage pa Hwinsu, zwama ci laga cikarigo ci uba hinda ci ea ka̱mu ina uba hoge laco. 23 Ina uba hin an ci ea: Ci tane soo na Bwa bu ba, Yesu Kristi, hinda ci ka̱la̱ngi sicwa a sici. 24 Aco na a lagano cikarigo ci Hwinsu, a yiwa tare na Hwinsu hinda Hwinsu u yiwa tare na ba. Hinda zwama a̱hurun a Hwinsu ana uba ci pan: Ci daki an Hwinsu u yiwa tare na gaci.