1 Wasika una u sire Pa wa u Bitrus, almajiri a Yesu Kristi.

Kurwo pa aco na Hwinsu uba tanga, ana ayiwa na hacigaga soo, aco na a some gasa yiwa na mu'ogo mu Fontus, na Galatiya na Kafadokiya ana Asiya hinda na Betaniya. 2 Hwinsu Buca̠ aba tanga zwama uba dakagiga tun na jigu, nga̠ Hwinsu uba ka̠ri, pa ibwana a̠huru aba guzagi pa nagu magwata. Zwama ga̠hi lagana Yesu Kristi, hinda ai guzagi pa jigagu u mahyi ma Yesu. Hwinsu ui jidane ne pan dala burya̠.

3 Ci pan Hwinsu nuci una usa Buca̱ bu Yesu Kristi! zwama yama bware aba gupe na ci matanga, pa yasingo u Yesu Kristi pa u'o, ube usa ciza itano soo, 4 hinda ci za gajo una uza ihogu, mana aba iri na zaro zwama ga̱hi. 5 Ga̱hi buna bo Hwinsu uba wai oga na koce waba, hinda Hwinsu uba wui iri ga̱hi na kuce yoba kwa i ce icagagu, una wa bu gimbagu ni ciba na mohun mu ihogu aba i hyan. 6 Na haruni, ia̱ wawo dinyiya, ka̱mu na haruni i yiwa na sungoro ama uza i sana. 7 A i haruni zwama a gwaji itano soo-nuhi nga̠ aba yiwa na gwaji zinariya na ula-zwama a daki gama ui ba, itano soo nuhi u zake zinariya una ui kulega na izangacu Hwinsu, hal korwo hun Yesu Kristi aba a maringe. 8 Ka̱mu na haruni yasa tabuwo ihyan bware ama i ka̱ri bo; hinda yasa tabuwo hyan bware bane, i yiwa ne hugi bware na ikanga nuhi na wa̱wo dinyiya, 9 zwama i yiwa na hyan icagagu i a̱huru nuhi mana masa ma itano soo nuhi. 10 Acubago a Hwinsu ana aba cube iri pale na sinu zwama i burya̠ una ui sana nuhi, a i numa dinyiya zwama aba a daki ina icagagu iba sa. 11 A ka̱ri daki hun na ui ea, na nga̱ aba ai ea, a̱huru a Kristi ana a yiwa na cikarigo na soo waba, ma cibe nga̱ Kristi uba ui so songoro hinda na izangacu ina i laga. 12 Hwinsu ube yiwa na icibaga. iri na ea, Hwinsu hinda uba cibega, sa zwama icwa yaba Hwinsu ube u yiwa ne panaga numa yoba, ama zwama ga̱hi, bani hinda a̱huru a burya̠ ana Hwinsu uba cuma na zaro ube sa a cibe iri ka̱mu na cikarigo ci Hwinsu ci laco ci Kristi ana aba numagega, acuma a Hwinsu a ka̱ri hyan iri ni.

13 Zwama haruni kimganje soo a hanhi zwama ibwana. Tana soo nuhi zwama i burya̠ ina Hwinsu uba ui bu pan, hun na Yesu Kristi uba ui maringe. 14 Baniya nga̱ ga̱hi sa sawo si burya̠ , ta tana soo nuhi pa eewo nga̱ ga̱hi yiwa na dalo na za cidaka. 15 Ama nga̱ Hwinsu una wa i ugaga uza ciri, ga̱hi ma i san aco nagu ciri. 16 Zwama cikarigo ci Hwinsu ci hin, <<Yan na nagu ciri zwama gya naza ciri.>>

17 Na ahunda i yiwa na uge <<Buca̱ si ea ahunda pa Hwinsu>>. Zwama usa u ea shari'a, una uza idaku ina i tigamba buba ea. Zwama haruni, i pan Hwinsu cilabe ea dala a burya̠ zwama isa hana̱gata na doone. 18 Zwama i daki ai cagage, pa dala na sa burya̠ ana a ga̱hi i ce gado pa sikaka a sihin aba curgega gado. Ai cagage sa na Azurpa ko zinariya an ai hacigaga. 19 Ama na mahya ma Kristi mana mazi daraja, buna busa nga̱ udwumaga mana maza magwata̱. 20 Ube Hwinsu uba tanga tun na jigu una aba ia̱gi doone, ama a cibe ga na muhon mu ihogu doone. 21 Pa bware ga̱hi tana soo pa Hwinsu buna buba yasinge ga pa aco na akwadaga aba zagaci bo, zwama haruni iyajo nuhi na itano soo nuhi a yan pa Hwinsu.

22 Baniya nga̱ ga̱hi izi nagu ciri zwama ilagano na kamahinda hal ma iyiwa na maka̱la̱ ma ahun nuhin na maka̱la̱ ma kamahinda, na soo uinka. 23 Zwama a gupe na bumata, sa na birwa ina yi hacigaga aba hyan ga, kwadi pa birwa mana maza hacigaga pa cikarigo ci Hwinsu cina ciza ihacigago. 24 Nga̱,

Cikarigo ci Hwinsu ciba hin, <<ka̱mu asa nga̱ humbe,

daraja maba hinda masa nga̱ cikwalagu ui humbe.

Humbe hya kwaji, cikwalagu hinda a hine,

25 ama cikarigo ci Hwinsu ciza ihogu.>>

Hinda ube usa cikarigo ci Hwinsu ci laco cina aba zwamage.