1 Aza huna Bitrus na Yohana aba na yina u kurwo pa yaba ahunda i Hayahudawa zwama a̱hunda-na karpe ataco. 2 Baniya aza buna bwa mace na cigunu azangi kurwo wai i'iba i yaba ahunda i Hayahudawa i labe ina aba ogo Gyamace, tuhunba sa zangi bwa akole a iri bwa na yaba ahunda i Hayahudawa zwama aco na yiwa na ginbo ese yaba ahunda i Hayahudawa. 3 Nga̱ buba hyan Bitrus ginbo ise yaba ahunda i Hayahudawa, kwa buba na kaban ga musarya. 4 Kwa Bitrus na Yohana na byana bwa. Kwa Bitrus na hin, <<Cibyanya̱!>> 5 Kwa hankali a buba ni maringe pa ba, na tano soo an ai pan bo i hya. 6 Kwa Bitrus ni hin, <<Azurpa ni Zinariya ciza, ina gaci za ibe i gaci ci bu pan. Ni ize i Yesu Kristi i Nazaret, masinge i cihano.>> 7 Kwa Bitrus konbe bwa na wa ucuga, kwa ni zangaca bwa, ai sanuwo kwa uwongorumi na buna u buba ni marenge na koce. 8 Kwa buba ni ma zarika na yinsana na buna buba kwa na hinana cihano. Kwa buba ni lagana ga eso u yaba ahunda i Hayahudawa ilabe, na cihano na mazarkaga, na ciba cilabe ci Hwinsu. 9 Nga̱ aco ka̱mu aba hin bwa na jabaga na zangaci Hwinsu, 10 a ganige bwa an buna bu madalago ne i'iba yaba ahunda i Hayahudawa ina aba yiwa ne oge Gyamace, hinda mamaki u konbe ga ne hyanu ina i ea na buba.

11 Bugunu buba kwa bu kumgage Bitrus na Yohana, aco ka̱mu hoge mamaki kwa eaman monda korwo pa aba na ihug ina aba yiwa na oge Uzala u Sulemanu. 12 Nga̱ Bitrus aba hyan, kwa bware ne hin naba: <<Aco Israila, baisan ga̱hi i hoge mamaki u ina i ea? Bai san ga̱hi i yiwa na mugingo amuci nga̱ gaci ci i ina na koce nuci gaci san boco buna bu jabage na buna u buba? 13 Hwinsu u Ibrahim, Ishaku na Yakub, Hwinsu u hacaca a haci, ube u kule izangacu pa bugyama a buba Yesu. I cuta bware pa Bilatus a hone bwa, hinda i cibe bware bi san a buhiyo pa Bilatus, hinda bware yaje an curi Barabas ana a hone aco a ali. 14 I cibe buna bu nagu ciri kwa ni hin naba buna bu hunago aco a curi bo pa ga̱hi. 15 I hone buna busa ipicu ea a̱huru, ama Hwinsu u ansinge bwa pa aco a kwaju. Gaci hinda cisa shaida u ini ka̱mu. 16 Na itano i soo na Yesu, buco buna bu ga̱hi i hya bu jabage. Ne ize i Yesu hinda na itano i soo i buba ea kulage i handgago na mahona ma buba, nga̱ ka̱mu ga̱hi i hyan na sicwa a sihin ga̱hi hyan. 17 <<Bane, ahun namui, Na daki ka̱mu i ia̱gi na nagu u cidako, nga̱ aco labe nuhin aba ia̱gi. 18 ama harbuni Hwinsu uba siji ina uba zwamage na haya hana ha ali na uno u acoma a Hwinsu, an Kristi iba i so wahala. 19 Curaj iwo, hinda i maringya pa Hwinsu, nga̱ aba ai hangaga na magwata̱ a mahi, zwama Hwinsu u kimga hasoo ahahin, 20 Hwinsu i pan kuce hinda i cumane na Kristi ina, uba ui tangage tun na jigo-wata Yesu. 21 Bware bui yana na zaro hal huna u Hwinsu uba ui ringe tibai, nga̱ uba i alkawali tun na jigu pa acubago a nagu ciri a Hwinsu an za ciri. 22 Zwama Musa u zwamage, <Hwinsu na icwa i ba ui asinga Bucuma buna bu nyaga na gya na soo aco nuhin; i yaje na tibai ina buba bui zwama. 23 Ka̱mu buna bui yaduwa na buba ai kwaman bwa pa aco.> 24 <<Harbuni, acuma Hwinsu ka̱mu a rwage na Samaila kurwa cyage, nga̱ aba zwamage, izwamago na moho muna mu ali. 25 ga̱hin hinda isa saawo sa acuma a Hwinsu kucuna ku Hwinsu uba ia̱gi hacaca a hahi. Zwama Hwinsu hin Ibrahim, <Pa saawo asibui na cinge ai tana ga uno u burya̠.> 26 Nga̱ Hwinsu uba ansinge bugyama buba, kwa uba ne cuma bwa buba a hwahin na jigo zwama bwe tane uno uburya̠ zwama ka̱mu nuhin i curi eewo nihin.>>