1 Yesu i uga silmajiri siba ikope na sirha̱ bu pa sa koce ui silacuma mupyala mu eewo na mahuna timamba.

2 Haziya ha acuma a Yesu ikope na sirha̱: jigu, Saminu (buna bu aba ogo Bitrus) ni buhun bu bware Andarawus Yakub bwa bu Zabadi, ni buhun bu bware Yohana, 3 Filibus na Bartalomi, Toma na Matiyu bu cago bu ganju, Yakub bwa bu Halfa, na Taddiyus, 4 Saminu buco bu cinge ci Ka'anan na Yahuda Iskariyoti, ina i cibe Yesu.

5 Aco ikupe na burya̠ abe Yesu iba cuma kwa na hin naba: <<Ita esa ina isa i aco ana ai dakuwo Hwinsu ko i'ogo i Samariya. 6 Kulaje pa hatami ha Isra'ila hana ha inage. 7 Si ese ina i ga̱hi i cibaga bena: kurwa cigwama ci zaro u yabtano. 8 Aco ana ai hugo, laco i hadgage ga, i asinge aco na kwaji, ha kuturu i ma guzagi ga hana na mahuna, i silacuma mupyala mu eewo. Daje aba bu pa, daje goo bui pan. 9 Ita zangi zinariya, na musare, na cilapo na muhin na iyi mapala; 10 Ita zanga ipamu na cihano cina, ko cilapo ciri, ko hataka ko agungu i zwama buna bu yiwa na ibwana u gyamace bu hin ia̱ i kamace,

11 <<Si ese i'ogo ko hila̱, kaba̱ buco bu burya̠ imadale na yaba buba kapi hun na ga̱hi i ala. 12 Ga̱hi na ese yaba, i saniga. 13 Si yaba na gimba dala a burya̠ , u yana na yaba ni, si zaa ba; salama nibui u maringiya a hwabui. 14 Si aco wanje na ca ko a kubule cikarigo, masosoryage bu ala na buna nuhi i sire yaba ko i'ogo ni. 15 Kamahinda gya ni zwama, ko Sodom ni Gomara wai zake i'ogo ni huna Hwinsu ui ia̱ hukunci>> 16 Ni yiwa na cuma nga̱ hatami na suwa siwa si hila̱. Na zwaman zana mahasa nga̱ ahwa hinda i yana nga̱ mutantabara.

17 <<I masikai na aco, zwama ai kula pa mugwamgwam i pan bo bulala na ukaba ahunda̱ muwaba. 18 Zwama gya ai kula pa hagwamnoni na mugwamgwam zwama ga̱hi isa sheda cikarigo pa aco ana ai dakuwo Hwinsu. 19 Sa a kumbe, i ta madami na ina ga̱hi i zwame ko nga̱ ga̱hi i zwamaga. Hon niya ai pan ina gahi i zwame, 20 Sa ga̱hi i kargyana, ama a̱huru a Buca abuhi abe ai ia̱ cikarigo. 21 <<Aco ni cuhun caba, ai hyan buna bui hone bu cage, buca hinda bui hune bwa, saawo si za hugaga numa hacaca, hal si sana a hunage hacaca ha siba. 22 Aco ka̱mu ai wanda zwam gya, ama buna bui yisan hal ihogu bui hyan a̱huru ana zaa ihogu. 23 I hugi an si ga̱hi hyan ai dame, swamje pa i'ogo i maiwa. Kamahinda gya na zwama, kapin ga̱hi ma hogi i ringi mo'ogo mu Isra'ila Bwa bu Buwama bui kurya.

24 <<Silmajiri ai zakuwa walami, ko hinda bugyama bu zakuwa buca bu yaba buba. 25 Ina i yiwa silmajiri a yan nga̱ walami waab, hinda bugyama nga̱ buca bu yaba. Sa a uga buca bu yaba Ba'alzabul, be aba ai ugan aco yaba! 26 Ita huga iwasa yaba. Azaa ina i yiwa na ciswin azaa hyan gya. 27 Ina gya ni zwama na ci'incu, na kargya gi na hwinsu, ina aba ai na kublani na hacube, a zwamagana na zata ui sumu. 28 Ita huga iwasa aco na ai hune ikanga̱ ama a panuwa i hune a̱huru. ama, huge iwasa buna bui hune a̱huru na ikanga̱ hinda a tane na ula. 29 Ai ta sangwa Akukuturu arya na musare? A zaa uika una ui hene na cinge sa na idaku i Buca abuhi. 30 Cihinji ci icwa nebu cima rutage. 31 Ta huga iwasa. Izake si Akukuturu.

32 <<Buna bui hugo mu'inya i zwaman aco ana busa abumui, gya ma nazaa i huge mu'inya mu buba pa Buca abumui na zaro. 33 Buna bu hin gya na sa buba na haisa ha aco, Gya ma na hin an na daku bwa pa Buca abumui bu zaro.

34 <<Ita hyana̱ nga̱ na kule dala a burya̠ , na doone. Ne koreya dala a burya̱, ama kasakari. 35 Na koreya zwam gya san

<< <Buco buta yada na buco bu buba,

bwa bu cu'a buta yada na amaci a buba,

yawo ita yada na kwasigo ai ba

36 Buco buna bu wanje bu yiwa suwa aco yaba buika̱ na an goo.>

37 <<Buna bu zake ka̱ri buce bu buba ko amaci a buba bui jubuwa busa abumui yo; Buna bu zake ka̱ri bwa ko bwa bu cware bui jubuwa busa abumui; 38 Ka̱mu buna bui zanguwo u'on masacu ma buba bu na laganya ba bui jubuwa ba sa abumui 39 Ka̱mu buna bu ka̱ri cagi a̱huru a buba bui nagi uwa, buna bu nagi a̱huru a buba zwama gya bui hyan uwa.

40 <<Buna bu ce ga̱hi buna ce gya, buna hinda bu ma ce gya buce buna buni cuma. 41 Buna bu ce bucubago bu Hwinsu zwama buba sa acuma a Hwinsu bu ce daje u bucubago bu Hwinsu, hinda buna bu ce buco bu nagu ciri bui ca daje u buco bu nagu ciri. 42 Buna bu pa i kopi saawo sina miya ma duri zwam siba sa silmajiri a simui, kamahinda buzaa i nagi daje buba.>>