प्रेरितगोळ 16

तीमुथियुस उन पौलुस अदिक सीलास उन सांगुळ होगोद

1 बाक पौलुस दिरबे अदिक लुस्त्रा दा भी होदुन. अल तीमुथियुस हेसुर इन ऊंद मसीह ईरोन, आऊन मोय यहूदी विश्वासी ईरोर, लेकीन आऊन आप्प गैरयहूदी ईरोन. 2 आव लुस्त्रा अदिक इकुनियुम उन वार्टुर दा वळ्लेव मंळसा ईरोन. 3 पौलुस उन इच्छा ईरोद कि तीमुथियुस आऊन सांगुळ बरूल; अदिक जो यहूदी लॉकुर आ जागागोळ दा ईरोर आंदुर कारण आव आऊंद खतना माळदुन, यतिकी आंदुर सप्पा जानसोर, कि आऊन आप्प गैरयहूदी ईरोन. 4 अदिक नगर नगर होगतेला आंदुर आ नियमगोळी जो यरूशलेम इन प्रेरितगोळ अदिक स्याणागोळ ठहरूसीदुर, मानसोर साटी आंदरी हेळकु आगोद. 5 ई प्रकार मंडलीगोळ विश्वास दा संची आगतेला होत अदिक संख्या दा रोज वाळुस्त होत.

त्रोआस दा पौलुस उन दर्शन

6 आंदुर फ्रूगिया अदिक गलातिया प्रदेशगोळ दा टु आगकु होदुर, यतिकी पवित्र आत्मा आंदरी आसिया दा वचन केळसोर से मना माळ्त. 7 आंदुर मूसिया अन्द सीमा अन हात्‍ती पोहचुस्कु, बितूनिया क्षेत्र दा होगोद चाहासदुर; लेकीन यीशु उन आत्मा आंदरी इजाजत कोटीदील. 8 इदुरसाटी आंदुर मूसिया टु आगकु त्रोआस दा बंदुर. 9 अल पौलुस ईळ्लकी ऊंद दर्शन नोळदुन कि ऊंद मकिदुनी मंळसा निदुरकु आऊन से विनती माळकु अनेत्यान, "ईपाटी ईळुकु मकिदुनिया दा बा, अदिक नाम्द मदत माळ." 10 आऊन ईद दर्शन नोळतेला अच नाव तुरन्त मकिदुनिया होगोद चाहासदेव, ईद सम्सकु कि परमेश्वर नामी आंदरी खुशखबरी केळसोर साटी कारस्यान.

फिलिप्पी दा: लुदिया अन्द मन-बदलुसोद

11 इदुरसाटी त्रोआस टु जहाज कुर्तकु नाव सिधा सुमात्राके होदेव अदिक दुसरा दिशी नियापुलिस दा बंदेव. 12 अल टु नाव फिलिप्पी पोहचुसदेव, जो मकिदुनिया द्याश इन मुख्य नगर अदिक रोमीगोळ्द ऊर हुन; अदिक नाव आ नगर दा थ्वाळासा दिन ताका ईत्‍तेव. 13 आराम इन दिन नाव नगर इन फाटक इन व्हार्या गांगा अन्द किनारा ईद सम्सकु होदेव कि अल प्रार्थना माळोद जागा ईतीदाद, अदिक कुर्तकु आ आर्तेर से जो जमा आगीदुर, मातगोळी माळली कुरतेव. 14 लुदिया हेसुर इन थुआतीरा नगर इन जांभळा रंग इन कपळा मारावळ्त ऊंद भक्त आर्त केळोर. प्रभु आकिन मन खोल्सदुन कि आक पौलुस उन मातगोळ मा मन हचुल. 15 याग लुदिया तान घराना समेत बपतिस्मा ताकोंडुर, रा आक नाम से विनती माळदुर, "अगर नीव नानी प्रभु उन विश्वासिनी सम्सतीर, रा नळुकु नान मान्या ईरी," अदिक आक नामी मान्सकु ओतुर.

पौलुस अदिक सीलास बंदीगृह दा

16 ऊंद दिशी याग नाव प्रार्थना माळोद जागा मा होगेव, रा नाम मुलाकात ऊंद हारोद आर्त दासी से आत यारदा भविष्य हेळावाळा दुष्टआत्मा ईरोद; अदिक लॉकुर्द भविष्य हेळदुर देल स्वामीगोळ साटी हापाळ पैस्या कमुसकु तरतोगोद. 17 आक पौलुस उन दी नाम हींद बंदकु चिल्ळासली कुरतुर, "ई मंळसा परमप्रधान परमेश्वर उन दास हुय, जो नामी उद्धार इन हादी इन कात्‍ता केळ्सतार." 18 आक हापाळ दिन ताका हिंग अच माळतेला ईत्‍तुर; लेकीन पौलुस परेशान आदुन, अदिक पलटुस्कु आ दुष्टआत्मा से अंदुन, "ना नीनी यीशु मसीह अन्द हेसुर देल आग्या कोळतीन कि आकिन दा टु होटबुळ." अदिक अद आत्मा अदा घळी होट बुळ्त. 19 याग आ पोर इन स्वामीगोळ नोळदुर कि नाम्द कमाई इन आशा होग्त ईत्‍त, रा पौलुस अदिक सीलास उक हुळकु चौक दा प्रधानगोळ हात्‍ती जेडुकु ओतुर; 20 अदिक आंदरी रोमन अधिकारीगोळ हात्‍ती ओतुर अदिक अंदुर, "ई लॉकुर जो यहूदी आर, नाम नगर दा बळा अशांती फैलुसेत्यार; 21 अदिक हिंग रीति रिवाजगोळी कल्सेत्यार, यारी ग्रहण माळोद या मानसोद नाम रोमीगोळ साटी वळ्लीद हैलेच अदिक नाव ईदुर्द पालन भी माळ सकालेव अदिक मान्स भी सकालेव."

22 आग भीळ इन लॉकुर आंदुर्द विरोध दा जमा आगकु पौलुस अदिक सीलास उन मा येरतेला बंदुर, अदिक शासकगोळ आंदुर कपळा हरदुर अदिक अदिक आंदरी कोळागोळ बडोद आग्या कोट्टुर. 23 हापाळ कोळा बळसुस्कु आंदुर आंदरी बंदीगृह दा हाक बुटुर अदिक दरोगा अक आग्या कोट्टुर कि आंदरी कळक बंदोबस्त दा ईटुल. 24 आऊक हिंग आग्या सिक्तेला अच आव आंदरी बुळ्क इन कोठरी दा ईटदुन अदिक आंदुर कालगोळ कोल इक ठोक्स बुटुन.

25 आर्धा ईळ्लक इन लगभग पौलुस अदिक सीलास प्रार्थना माळतेला परमेश्वर उन भजन हाळोर, अदिक कैदी आंदुर्द केळोर. 26 इटुर दा अचानक धोळ्द भूकम्प बत्‍त, ईल ताका कि बंदीगृह अन्द पायवा हालुसेदव अदिक तुरन्त सप्पा दरवाजा खुलसेदव; अदिक सप्पा कैदीगोळव बंधन खुलसेदव. 27 दरोगा जप दा टु येद्दुन, अदिक बंदीगृह अन्द दरवाजा खुला नोळकु सम्सदुन कि कैदी ओळेग्यार, इदुरसाटी आव तलवार तेगुकु तान तान इक कोंद बुळोद चाहासदुन. 28 लेकीन पौलुस धोळ शब्द दा कारूकु अंदुन, "तान तान इक येनु हानि पहचुसबाळ, यतिकी नाव सप्पा ईल्या आयेव."

29 आग बंदीगृह अन्द दरोगा दिंग्या कार्सदुन अदिक राटनेरी बुळ्क होदुन, अदिक अंज्क देल नळ्गतेला पौलुस अदिक सीलास उन मुंद बिदोदुन; 30 अदिक आंदरी व्हार्या तनकु अंदुन, "हे सज्जनगोळा, उद्धार सिक्‍कोर साटी ना येन माळाईन?"

31 आंदुर अंदुर, "प्रभु यीशु मसीह मा विश्वास माळ, रा नीनी अदिक नीन घराना अक उद्धार सिक्‍कीत." 32 अदिक आंदुर आऊक अदिक आऊंद सप्पा मान्ना अन्द लॉकुरी प्रभु उन वचन केळ्सदुर. 33 ईळ्लकी अदा घळी दरोगा आंदरी ओतकु आंदुर्द जखमगोळी तोळदुन, अदिक आव तान सप्पा घराना समेत तुरन्त बपतिस्मा ताकोंडुन. 34 आग आव पौलुस अदिक बरनबास उक तान मान्या ओतकु आंदुर्द मुंद भोजन ईटदुन, अदिक सप्पा घराना समेत परमेश्वर मा विश्वास माळकु खुशी माळदुन.

35 याग हागुल आत आग रोमन शासकगोळ तान सिपाहीगोळ अधिकारीगोळ्द कय देल बातणी कळुदुर कि आ मंळसागोळी बिट बुळी.

36 दरोगा ईद मातगोळी पौलुस से अंदुन, "शासकगोळ नीमी बिट बुळोद आग्या कळु बुटार. इदुरसाटी ईग होटकु शांती देल होटोगी."

37 लेकीन पौलुस सिपाहीगोळ अधिकारीगोळ से अंदुन, "आंदुर नामी जो रोमी मंळसा आर, दोषी ठहरूस्द बिना लॉकुर मुंद बळदुर अदिक बंदीगृह दा हाकदुर. ईग येन नामी चुपचाप तेगेत्यार? हिंग ईला; लेकीन आंदुर खुद बंदकु नामी व्हार्या तेगुल."

38 सिपाहीगोळ्द अधिकारीगोळ ई मातगोळ्द रोमी शासकगोळी जानकारी कोट्टुर, अदिक आंदुर ईद केळकु कि पौलुस अदिक सीलास रोमन नागरीत्वावाळेर लॉकुर उर, अंजेदुर, 39 आग रोमन अधिकारीगोळ बंदकु आंदुर से माफ विनती माळदुर, अदिक आंदरी बंदीगृह टु व्हार्या तनकु नगर बिटकु होगली हेळदुर. 40 पौलुस अदिक सीलास बंदीगृह टु होटकु लुदिया अन्द ईल होदुर, अदिक विश्वासी वार्टुर से भेंट माळकु आंदरी प्रोत्साहन कोटकु होटोदुर.