Atos 2

पतरस उन बातणी

14 आग पतरस आ हनुन प्रेरितगोळ्द सांगुळ निदुरदुन अदिक धोळ्द शब्द दा अनली कुरतुन, "हे यहूदी अदिक हे यरूशलेम इनोर सप्पा ईरावाळेर लॉकुरा, ईद अर्त कोमी अदिक किव हचकु नान मातगोळ केळी. 15 ह्यांग नीव समसेतिर; ई लॉकुर नशा दा हैलेच, यतिकी ईगल्या रा व्हातुर ईनव ऊंम्बत अच मुरदाव. 16 लेकीन ईद अद मात हुन, जो परमेश्वर उन दी टु बातणी तरावाळा योएल उन द्वारा अंदकु आगीत" 17 परमेश्वर अनतान:

कि आखरी इन दिनगोळ दा हिंग आदीत कि

ना तान आत्मा सप्पा मंळसा जाती मा हाक्‍काईन.

अदिक नीम पारगोळ अदिक पोरगोळ

परमेश्वर उन दी टु बातणी कोट्टार, अदिक नीम हारोदोर मंळसागोळ दर्शन नोळ्यार,

अदिक नीम स्याणागोळ कान्सा नोळ्यार.

18 ना तान दासगोळ अदिक तान दासीगोळ मा भी

आ दिनगोळ दा तान आत्मा दा टु हाक्‍काईन,

अदिक आंदुर परमेश्वर उन दी टु बातणी कोट्टार.

19 अदिक ना म्याकुच आकाश मा अदभुत क्याल्सा

अदिक ल्यालमा पृथ्वी मा चमत्कारगोळी तोर्साईन,

मतलब खुन अदिक बेक्‍की अदिक धुंगा अन्द बादल तोरसाईन.

20 प्रभु उन महान अदिक तेजस्वी दिन इन बरोर

से पयले सुर्य करीद अदिक चंद्र खुन घाई क्याचांद

आगेदीत.

21 अदिक जो यावारा परमेश्वर उन हेसुर देल प्रार्थना माळ्यान, आऊन उद्धार आदीत.

22 हे इस्त्राएलगोळा, ई मातगोळी केळी: यीशु नासरी ऊंद मंळसा ईरोन यार्द परमेश्वर उन दी टु आगोद प्रमाण आ सामर्थ्य अन्द क्याल्सागोळ अदिक आश्चर्य अन्द क्याल्सागोळ अदिक चमत्कारगोळ देल प्रगट आद, जो परमेश्वर नीम न्याड्या आऊन द्वारा माळकु तोरस्यान यदरी नीव खुद अच अरूतीर. 23 ✝२:२३ मत्ती २७:३५; मरकुस १५:२४; लूका २३:३३; यूहन्ना १९:१८अदिक नीव आवा यीशु उक, जो परमेश्वर उन ठहरूस्द योजना अदिक पूर्व ग्यान इन अनुसार हुळसुसकु आदुन, नीव अन्यायीगोळ्द कय देल क्रूस मा येरसुसकु कोंद बुट्टीर. 24 ✝२:२४ मत्ती २८:५,६; मरकुस १६:६; लूका २४:५लेकीन आऊका परमेश्वर मृत्यु उन बंधन दा टु बिळ्सकु जित्‍ता माळदुन; यतिकी ईद अशक्य ईरोद कि यीशु परमेश्वर उन वश दा ईरायदुन. 25 यतिकी दाऊद आऊन बारा दा अनतान,

ना परमेश्वर उक हमेशा तान मुंद नोळतेला ईत्‍तीन:

यतिकी आव नांद ऊम्मा कय दी आन, कि नान मनोबल कम आगेगबाळुल.

26 ईदा कारण नान मन खुश आत,

अदिक नान ल्यालग्या मग्न आत;

उलटा नान मय इक भी

आशा देल आराम सिक्‍कीत.

27 यतिकी नी नान जीव इक मृत्यु अन दुनिया दा बिळतीदील;

अदिक ना तान पवित्र जनगोळी कब्रगोळ दा हुळु गोट्या.

28 नी नानी जीवन इन हादी हेळ्या;

नी नानी तान दर्शन इन द्वारा खुशी देल तुम बुट्या.

29 हे वार्टुरा, ना नाम पुर्वज दाऊद उन बारा दा नीम से हिम्मत देल अन सकतीन कि आव रा सोतोदुन अदिक नळ्सकु भी आदुन लेकीन आऊन कब्र ईंद भी नाम अल उपस्थित आद. 30 यतिकी आव परमेश्वर उन दी टु बातणी तरावाळा ईरोन, आव जानसोन कि परमेश्वर नान से हिंग किर्‍या तिंदान कि ना नींद वंश दा टु ऊंद मंळसा अक नीन सिंहासन मा कुरसाईन; 31 आव आगावाळा मात इक पयले टु अच नोळकु मसीह अन्द जित्‍ता आगोद बारा दा भविष्यवाणी माळदुन कि ना रा आऊन जीव

मृत्यु अन्द दुनिया दा बिटकु आदीत अदिक

ना आऊन मय हुळतित.

32 ईवा यीशु उक परमेश्वर सोत्‍तुर दा टु जित्‍ता माळदुन, यार्द नाव सप्पा मुंदुर गवाह आयेव. 33 ई प्रकार आव नेगुकु आदुन अदिक परमेश्वर उन उजवा कय देल सर्वोच्च पद ताकोमकु, अदिक आप्प से अद पवित्र आत्मा हासिल माळकु यदुर्द वादा माळकु आगीत, आव ईद रिचुस बुटान जो नीव नोळतीर अदिक केळतीर. 34 यतिकी दाऊद रा स्वर्ग मा येरीदिल; लेकीन आव खुद अनतान,

प्रभु नान परमेश्वर से अंदुन,

नान ऊमा कय दी कुर,

35 यागासताका कि ना नीन से दुश्मनी ईटावाळेर इक नीन काल दिशी तनकु आंदरी नीन काल इन आशन माळ कोमालीन.

36 "इदुरसाटी ईग इस्त्राएल इन सप्पा घराना निश्चित रूप देल अर्त कोमुल कि परमेश्वर आवा यीशु अक यारी नीव क्रूस मा येर्सदिर, प्रभु भी ठहरूसदुन अदिक मसीह भी."

37 आग केळावाळेर मन तुम्मेदव, अदिक आंदुर पतरस अदिक मिक्‍कु प्रेरितगोळ से केळली कुरतुर, "हे वार्टुरा, नाव येन माळेव?"

38 पतरस आंदुर से अंदुन, "मन तिर्गुसी, अदिक नीम दा टु हर ऊंद मंळसा तान-तान पापगोळ्द माफ अन्द साटी यीशु मसीह अन्द हेसुर देल बपतिस्मा ताकोम; रा नीमी पवित्र आत्मा अन्द दान सिक्‍कीत. 39 यतिकी ईद वादा नीम, अदिक नीम औलादगोळ, अदिक आ सप्पा दुर-दुर इन लॉकुर साटी भी हुन यारी प्रभु नाम परमेश्वर तान हात्‍ती कारस्यान."

40 आव मात्‍त हापाळ मातगोळ देल भी गवाही कोट कोटकु समजुसदुन कि "तान-तान इक ई बेकार पीढ़ी देल ऊळ्सकु ईटी." 41 इदुरसाटी यार आऊन वचन ग्रहण माळदुर आंदुर बपतिस्मा ताकोंडुर; अदिक अदा दिशी मुर हजार मंळसागोळ हात्‍तीपास आंदुर्दा जमा आगेदुर.