1 याग ईद तय आगेत कि नाव जहाज द्वारा इटली होदेव, रा आंदुर पौलुस अदिक थ्वाळासा दुसरा बंदीगोळी भी यूलियुस हेसुर ईनव औगुस्तुस उन पलटन इन ऊंद सुबेदार उन कय दा कोट्ट बुटुर. 2 याग ना आसिया क्षेत्र अन किनारा मा जो ऊंद बंदरगाह ईरोद अल टु होगावाळेर अद्रमुत्‍तियुम हेसुर इन नगर इन ऊंद जहाज मा कुर्तकु होट्टुर आग मकिदुनिया अन थिस्सलुनीके नगर इन ऊंद अरिस्तर्खुस हेसुर इन मंळसा नाम सांगुळ ईरोन. 3 दुसरा दिन नाव सैदा नगर दा जहाज टु ईळदेव, अदिक यूलियुस पौलुस मा कृपा माळकु आऊक संगीगोळ अल होग गोटुन कि आऊक जो वस्तुगोळ हतताव अदुर्द पुर्ती माळ सकुल. 4 अल टु नाव समुद्र अन हादी देल होट्टेव हवा नाम विरूद्ध दिशा दा ईरोद ई कारण नाव साइप्रस टापू उन बाजु दा टु आगकु होदेव; 5 अदिक किलिकिया अदिक पंफूलिया नगर इन हात्‍तीगोळ्द समुद्र दा टु आग्त लूसिया अन्द मूरा नगर दा ईळदेव. 6 अल सेनानायक उक सिकन्दरिया अन्द ऊंद जहाज इटली होगतेला सिक्त, अदिक आव नामी अदुर मा येर्स बुट्टुन.

7 याग नाव हापाळ दिन ताका धीरू-धीरू नळुतेला कठिनाई देल कनिदुस नगर इन मुंद पोहचुसदेव, रा इदुरसाटी कि हवा नामी मुंद वाळुस ईला गोळोद, नाव सलमोने नगर इन मुंदु टु आग्त क्रेते टापू उन आड्ड आगतेला नळदेव. 8 अदिक अदुर किनारा-किनारा कठिनाई देल नळुकु सुरक्षित बंदरगाह हेसुर इन ऊंद जागा दा पोहचुसदेव, यल टु लूसिया नगर हात्‍ती ईरोद.

9 याग नाव हापाळ समय अल बीतुसदेव अदिक जहाज इक मुंद वाळुसोर साटी इदुरसाटी तकलीफ आगोद यतिकी उपास इन दिन ईग खतम आगेगीदव. इदुरसाटी पौलुस आंदरी ईद अंदकु समजुसदुन, 10 "हे लॉकुरा, नानी हिंग हतेत्याद कि ईद समुद्र यात्रा हापाळ खतरनाक आदीत, ना सिर्फ माल मत्‍ता अदिक जहाज इन साटी अच उलटा नाम जीवन इन साटी भी." 11 लेकीन सुबेदार पौलुस उन मातगोळ से यक्कुल जहाज नळसावाळा अदिक जहाज इन मालिक इन मातगोळी वाळुसकु मान्सदुन. 12 ईद बंदरगाह सोळ इन समय कडोद साटी वळ्लीद ईला ईरोद, इदुरसाटी हापाळ मुंदुर्द आग सकुल रा फीनिक्स पोहचुसोद कोशिश माळोद अच ठान्सदुर अदिक सोळ इन समय अल्या कडोद निश्चय माळदुर. ईद रा क्रेते अन्द ऊंद बंदरगाह आद जो दक्षिण-पश्चिम अदिक उत्‍तर पश्चिम येढ्ढु दिशा अन दी खुल्सतद.

13 याग थ्वाळा-थ्वाळा दक्षिणी टु हवा बरली हत, रा ईद सम्सकु कि नाम योजना पुरा माळ सक्‍केव, लंगर नेगदेव अदिक क्रेते अन किनारा टु नळुतेला जहाज इक मुंद वाळुसली हतदेव. 14 लेकीन घळी तिमुर दा जमीन दी टु ऊंद धोळ्द तुफान येळ्त, यदरी उत्‍तर पूर्व तुफान अंदकु आगतद. 15 याग तुफान जहाज से टकरूस्त रा आ जहाज अदुर कारण मुंद ईला वाळुस सकोद, अदिक नाव कोशिश माळोद बिट बुटेव अदिक जहाज इक हवा सांगुळ यात होगोद आत होग गोट्टेव. 16 आग कौदा हेसुर इन ऊंद स्यांळ्दतुसा टापू उन आळ दा वाहुस्त-वाहुस्त नाव कठिनाई देल जहाज इक वश दा माळदेव. 17 बाक जहाज नळसावाळेर अदरी नेगुकु अनेक उपाय माळकु जहाज इक ल्यालमा टु कटदुर, अदिक सुरतिस इन चोरबालु मा टिकसोद अंज्क देल पाल अदिक सामान ईळ्सकु जहाज इक नीर दा वाहुस गोट्टुर. 18 याग नाव तुफान देल हापाळ ऊफान अदिक धक्‍कागोळ तिनदेव, रा दुसरा दिन आंदुर जहाज इन माल भीळली हतदुर; 19 अदिक तिसरा दिन आंदुर तान कयगोळ देल जहाज इन साज-सामान भी भीट बुटुर. 20 याग हापाळ दिनगोळ ताका ना सुर्य अदिक तारागोळ कांळ्सीदील अदिक धोळ्द तुफान नळुतेला ईत्‍त, रा आखरी दा तान ऊळोद सप्पा आशा नाव बिट बुटेव. तुफान दा ड्वांगा अन्द नाश आगेत

21 याग आंदुर हापाळ दिनगोळ ताका उपासा ईतोदुर, रा पौलुस आंदुर न्याड्या निदुरकु अंदुन, "हे लॉकुरा, अगर क्रेते टु रवाना ईला आगोद नान सलाह नीव मान्स कोमायदीर रा ई विनाश अदिक नुकसान देल ऊळ्दोगायदीर. 22 लेकीन ईग ना नीम से विनती माळतीन कि तान हिम्मत कटकु ईटी, यतिकी नीम दा टु यारदु जीव इन हानि आगतीदील, पर सिर्फ ईद जहाज नष्ट आगेदीत. 23 यतिकी अंसी इन ईळ्लकी, याता परमेश्वर उन ना हुईन अदिक यार्द ना आराधना माळतीन आऊन ऊंद स्वर्गदूत नान हात्‍ती बंदुन, 24 अदिक अंदुन ‘हे पौलुस, अंजबाळ! नीनी कैसर उन मुंद निदरोद जरूरी आद. नोळ, परमेश्वर सप्पा मुंदुरी जो नीन सांगुळ यात्रा माळेत्यार, आंदुर भी जीवन नीन सांगुळ आद.’ 25 इदुरसाटी, हे लॉकुरा, हिम्मत ईटी; यतिकी ना परमेश्वर उन विश्वास माळतीन, कि ह्यांग आव नान से अंदान, हांग अच आदीत. 26 लेकीन नामी यातोदारा टापू मा होगकु टिकसोद बिद्दीत."

27 याग चौदावा ईळ्लक बत्‍त, अदिक नाव भूमध्य समुद्र दा भटकुसतेला टेटाळेव, रा आर्धा ईळ्लक इन हात्‍ती जहाज नळसावाळेर अनुमान हचकु जान्सदुर कि नाव यातोदारा जमीन इन हात्‍ती पोहचुसेतेव. 28 नीर इन गहराई अन अंदाज ताकोंडुर मा ऊंद सौ ईप्पत फूट इन गहराई ईरोद, अदिक थ्वाळा मुंद वाळुसकु बाक गहराई अन अंदाज ताकोंडुर रा नब्बे फूट गहराई ईरोद. 29 आग कल्ल इन जागागोळ देल टकरूसोद अंज्क देल आंदुर जहाज इन हिंदळोद भाग दा नाक लंगर हाकदुर, अदिक व्हातुर आगोद प्रार्थना माळोर. 30 लेकीन याग जहाज नळसावाळेर जहाज मा टु ओळोद कोशिश माळोर, अदिक गली टु लंगर हाक्‍कोद बहाना देल जहाज समुद्र दा ईळ्स बुटुर; 31 लेकीन पौलुस सूबेदार अदिक सैनिकगोळ से अंदुन, "अगर इंदुर जहाज मा ईतीदील, रा नीव भी ऊळु सकालीर." 32 आग सैनिकगोळ जाळी कडुकु जहाज समुद्र दा होग गोट्टुर.

33 याग व्हातुर आगदुर मा ईरोद, आग पौलुस ईद अनकु, सप्पा मुंदरी ऊम्मोर साटी विनती माळदुन, "ईंद चौदा दिन आदव कि नीव हादी काईत काईत उपास ईतीर, अदिक येनु तंदिदील. 34 ना इदुरसाटी नीमी तिनोर साटी विनती माळेतीन कि नीम जित्‍ता ईरोरसाटी जरूरी आद; यतिकी नीम दा टु यारदु ताल्ला अन्द ऊंद चुट्टी भी बिळबाळुल." 35 ईद अनकु आव रोट्टी हुडुकु सप्पा मुंदुर मुंद परमेश्वर उन धन्यवाद माळदुन अदिक मुरूकु तिनली कुरतुन. 36 आग आंदुर सप्पा मुंदुर भी हिम्मत कटकु ऊमली कुरतुर. 37 नाव सप्पा मिलुसकु जहाज मा येढ्ढ सौ छ्यात्‍तर मुंदुर ईरेव. 38 याग आंदुर ऊंडकु संतुष्ट आदुर, रा गोदी इक समुद्र दा भिटकु जहाज इक हल्‍का माळली कुरतुर.

39 याग व्हातुर आत रा आंदुर आ द्याश इक अरतीदिल, लेकीन ऊंद खाळी इन किनारा कांळ्सत, अदिक विचार माळदुर कि अगर आग सकुल रा इदुर मा जहाज इक टेकसेव. 40 आग आंदुर लंगरगोळी खोल्सकु समुद्र दा बिट बुटुर अदिक अदा समय जाळीगोळ्द बंधन खोल्स बुटुर, अदिक जहाज इन मुंद मुंदळोद पाल येर्सकु किनारा दी होटोदुर. 41 लेकीन येढ्ढ समुद्र अन संगम इन जागा हुडुकु आंदुर जहाज इक टेक्सदुर, अदिक जहाज इन मुंदळोद हिस्सा धक्‍का तिनकु नट्टोत अदिक आलगाळ सकिदील; लेकीन हिंदळोद लयरगोळ्द बल देल मुरूली हत.

42 आग सैनिकगोळ ईद विचार आत कि बंदीगोळी कोंद बुटेव, हिंग आगबाळुल कि यावारा तैरूस्कु ओळेगुल. 43 लेकीन सूबेदार पौलुस उक सुरक्षित माळोद इच्छा देल आंदरी ईद विचार देल रोक्सदुन अदिक उल्टा ईद आग्या कोट्टुन, कि जो तैरूस सकतार, पयले हारकु किनारा मा होट बुळुल; 44 अदिक बाकी यारारा पट्टीगोळ मा, अदिक यावारा जहाज इन मुर्द तुकळा गोळ्द सहारा देल होट बुळुल. ईद रीति देल सप्पा मुंदुर किनारा मा सुरक्षित ऊळ्दकु होट्टुर.