1 "मादी लॉकुर इन सम्राट क्षयर्ष उन पार दारा कसदी लॉकुर इन द्याश मा राज्‍य माळली कुरतुन. 2 आऊन राज्‍य-काल इन पयला वर्ष दा ना-दानिएल धर्मग्रन्‍थगोळ दा उल्‍लिखित आ वर्ष इन संख्‍या अन्द गणना माळ कोंडुन, अदुर दौरान यरूशलेम नगर उजाड़ बिदकु ईत्त, जसा प्रभु नबी यिर्मयाह अन्द माध्‍यम देल हेळीदुन. ईद संख्‍या ईरोद सत्तर वर्ष."

3 आग ना तान स्वामी परमेश्वर उन दी तान बाय माळदीन. ना पश्‍चात्ताप प्रकट माळोर साटी बॉरा अन कपळा हाकदीन, अदिक तान ताल्ला मा राख हाकदीन. ना उपवास ईटदीन. ना परमेश्‍वर उन कृपा-दृष्‍टि सिक्कोर साटी प्रार्थना अदिक विनती माळली कुरतीन. 4 ना प्रभु परमेश्वर से तान पाप स्‍वीकार माळदीन, अदिक आग आऊन से ई शब्‍दगोळ दा प्रार्थना माळदीन: "हे स्‍वामी, नी महान अदिक भययोग्‍य परमेश्वर आय. जो लॉकुर नीन से प्रेम माळतार, अदिक नीन आग्यागोळ्द पालन माळतार, आंदुर मा नी करूणा माळत्या, अदिक आंदुर सांगुळ तान वादा अक पुरा माळत्या. 5 नाव पाप माळदेव. नाव दुष्‍कर्म माळदेव, अदिक नीन प्रति दुष्‍ट व्‍यवहार माळदेव. नीन आग्यागोळ्द अदिक आदेशगोळ्द अवहेलना माळकु नीन से विद्रोह माळदेव. 6 ना नीन सेवक नबीगोळ्द संदेश इन केळीदील. आंदुर नाम्द राजागोळ, शासकगोळ, अदिक नाम्द पूर्वजगोळ इक अदिक द्याश इन पुरा जनता अक नीन हेसुर देल सन्‍देश केळसीदीन. 7 हे स्वामी, केवल नी अच धार्मिक आय, अदिक नाम्द ताल्ला शर्म देल बांगकु आद. ईंद भी नाव, यहूदा प्रदेश इन निवासी, यरूशलेम नगर इन ईरावाळेर, पुरा इस्त्राएली कौम इन लॉकुर जो दूर अदिक हात्ती इन द्याशगोळ दा प्रवास माळेत्यार, अल नी आंदरी तान प्रति विश्वासघाती आचरण इन कारण ईरोर साटी विवश माळ्द, शरम इन कारण हापाळ लज्‍जित आर. 8 नाम्द भाग्‍य दा केवल शरम आद. हे प्रभु! नाव सप्पा नाम्द राजा, नाम्द शासक अदिक नाम आप्प तान पाप इन कारण लज्‍जित आर; यतिकी नाव नीन प्रति पाप माळदेव. 9 हे स्वामी नाम परमेश्वर, केवल नी इच दयालु अदिक क्षमाशील आय. नाव नीन प्रति विद्रोह माळदेव, 10 अदिक नीन धर्म इन व्यवस्था अन अनुसार आचरण माळीदिल, जो नी तान सेवक नबीगोळ माध्‍यम देल नाम्द मुंद ईट्द. प्रभु, ई प्रकार नाव तान स्‍वामी परमेश्वर उन वाणी केळीदील. 11 पुरा इस्त्राएली लॉकुर नीन दण्ण इक केळदुर देल इनकार माळदुर. आंदुर नीन व्यवस्था अन्द उल्लंघन माळदुर अदिक नी दी टु बार फेर्स बुट्टुर. अत: जो श्राप अदिक किर्‍या परमेश्वर उन सेवक मूसा अन्द व्यवस्था दा लिख्‍सकु आव, अव नाम मा बरसुसली कुरतव; यतिकी नाव नीन प्रति पाप माळीदेव.* 12 हे परमेश्वर, जो वचन नी नाम्द अदिक नामोर न्यायीगोळ प्रति अंदीद, अवरी नी पुरा माळ्द. नी नाम मा महा विपत्ति तंद. ह्यांग विपत्ति यरूशलेम मा तंद हांग अच पुरा आकाश इन ल्‍यालमा धरती मा अदिक येलु बंदिदील. 13 मूसा अन्द व्यवस्था दा लिख्‍सकु पुरा परेशानीगोळ नाम मा बिद्दव, तरी भी नाव तान प्रभु परमेश्‍वर उन कृपा-दृष्‍टि प्राप्‍त माळोद प्रयत्‍न माळीदिल अदिक नाव तान अधर्ममय आचरण इक बिटकु नीन सत्य वचन केळली तत्‍पर आगीदील. 14 ई कारण यहोवा सोच विचार माळकु नाम मा विपत्ति हाक्द; यतिकी नाम परमेश्वर यहोवा याट क्याल्सा माळतान आ सप्पा दा न्यायी ठहरूस्तान; लेकीन नाव आऊन केळीदील.

15 "हे स्‍वामी नाम परमेश्वर, नी तान भुजबल टु तान निज लॉकुर इक मिस्त्र द्याश इन गुलामी टु मुक्‍त माळीद अदिक ई प्रकार तान हेसुर इक महान माळसुस्द, जसा अव ईंद भी आद. प्रभु, नाव पाप माळदेव. नाव दुष्‍ट आचरण माळदेव 16 स्‍वामी, तान धर्ममय आचरण इन अनुरूप तान गुस्सा अदिक प्रकोप यरूशलेम टु सर्कुस कोम. प्रभु, यरूशलेम नगर नीन अच पवित्र पहाळी नगर हुन. नाम्द पूर्वजगोळ्द पापमय अदिक नाम्द अच अधर्ममय आचरण इन कारण यरूशलेम नगर अदिक नीन निज लॉकुर आसपास इन राष्‍ट्रगोळ दा बदनाम आगेगीदुर. 17 अत: हे नाम परमेश्वर, तान ई सेवक उन प्रार्थना अदिक विनती इन केळ. हे स्वामी, ऊजळुस्कु पवित्र जागा मा तान अच महिमा अन्द साटी तान बाय इन प्रकाश चमकुस्त. 18 हे नान परमेश्वर, नान प्रार्थना अक तान कीव हच अदिक अदरी केळ. तान कण्णगोळ इक तेरू अदिक नाम विनाश मा नजर माळ. जो नगर नीन हेसुर देल कारूकु आगतद, अदरी नोळ. प्रभु, तान धार्मिकता अन्द कारण ईला बल्‍कि नीन महान दया मा भरोसा ईटकु नाम ईद प्रार्थना, ईद विनती नीन मुंद प्रस्‍तुत माळेतेव. 19 हे स्वामी, नाम्द प्रार्थना अक केळ. हे स्‍वामी, नाम्द अपराध इक क्षमा माळ. हे स्वामी, नाम मा ध्‍यान कोळ अदिक नामी मुक्‍त माळ. हे नान परमेश्वर, तान अच महिमा अन्द साठी देरी माळबाळ, यतिकी नीन नगर अदिक नीन खुद इन लॉकुर नीन अच हेसुर देल कारूकु आगतद."

20 ई प्रकार ना अनीन. ना प्रार्थना माळीन. ना तान अदिक तान इस्त्राएली कौम इन पाप इक स्‍वीकार माळीन. याग ना तान प्रभु परमेश्वर उन मुंद आऊन पवित्र पहाळी नगर इन साटी याचना प्रस्‍तुत माळीन; 21 याग ना प्रार्थना अन्द शब्‍दगोळ इक माताळतेला अच ईरीन, आग आवा जिब्राएल स्‍वर्गदूत तेज गती देल नान हात्ती बंदुन, यारी ना पयला दर्शन दा नोळीदिन. द्यावगा-बलि इन समय ईरोद.* 22 आव नान इक समझुसतेला ईद अंदुन, "दानिएल, ना नीन इक बुद्धि अदिक समझ कोळोर साटी बंदीन. 23 नी प्रार्थना माळोद शुरू माळीद कि नान इक आदेश प्राप्‍त आत. ना नीन इक अदा हेळली बंदीन, यतिकी नी परमेश्‍वर उक परमप्रिय आय. ईग नी नान शब्‍दगोळ इक ध्‍यान देल केळ अदिक तान दर्शन इक सम्स."

24 नीन लॉकुर अदिक नीन पवित्र नगर इन साटी वर्ष इन सत्तर हप्ता निश्‍चित माळकु आदव. ई वर्षगोळ व्‍यतीत आगदुर दा सप्पा प्रकार इन अपराध खतम आगेदव, पाप इन अंत आगेदीत, अधर्म इन प्रायश्‍चित माळकु आदीत, धार्मिकता प्रकट माळकु आदीत, दर्शन अदिक नबूवत सत्‍य प्रमाणित आदीत अदिक परम पवित्र जागा अन्द अभिषेक माळकु आदीत. 25 निएल, इदुरसाटी नी ईद मात इक जान्स अदिक इदरी सम्स कि या पल यरूशलेम नगर इन पुनर्निर्माण अदिक अदरी मात कुर्सोद आग्या प्रसारित माळकु आदीत, आ समय टु हुळकु "अभिषेक माळकु आग्याद" जो "प्रधान भी आन, आगमन इन समय ताका वर्ष इन येळ हप्ता आदाव. आग वर्ष इन बासठ हप्तागोळ ताका संकट काल बंदीत. ई संकट-काल दा नगर मात निर्मित आदीत. अऊर चौक मात बनस्याव अदिक खाई मात अगुळकु आदीत. 26 बासठ हप्तागोळ बाद्दा ऊंद दूसरा ‘अभिषेक माळकु’ आदान. आव कडुकु आदान, अदिक आऊन हात्ती येनु ईरतीदील, ऊंद प्रधान बंदान. आऊन सेना नगर अदिक पवित्र जागा अक खंडर माळ बुट्टीत. अदुर अंत बाढ़ देल आदीत, अदिक आखरी ताका युद्ध आगतेला ईत्तीत. विनाश ठहरूस्कु आगेग्याद."

27 "प्रधान हापाळ लॉकुर सांगुळ पक्‍का वादा माळ्यान. ई वादा अन अवधि वर्ष इन ऊंद हप्ता अन्द आदीत अदिक ई वर्षगोळ आरधा हप्ता ताका अगुआ पशुबलि अदिक अन्नबलि भेंट येरसोद बंद माळ बुट्टान. आग घृणित मूर्तिपूजा इन छास्कु आगदुर देल आ प्रधान विनाशक सिद्ध आदान. आव आ समय ताका विनाश माळतेला होदान यागासताका आऊन अंत इन निश्‍चित समय बरतीदील."*