एस्तेर 8

यहूदीगोळ इक तान रक्षा अन्द अधिकार सिकोद

1 अदा दिशी राजा क्षयर्ष यहूदीगोळ्द विरोधी हामान उन मान्न मकान एस्तेर रानी इक कोट्ट बुट्टुन. मोर्दकै राजा अन्द मुंद बंदुन, यतिकी एस्तेर राजा अक हेळीदुर, कि आऊन से आकिन येन नाता ईरोद. 2 आग राजा तान अद ऊँगरा जो आव हामान से ताकोम कोंडीदुन, ईळुकु मोर्दकै अक कोट्ट बुटुन. एस्तेर मोर्दकै अक हामान उन मान्न मकान मा अधिकारी नियुक्त माळ बुट्टुन. 3 बाक एस्तेर दुसरा गन राजा से अंदुर; अदिक आऊन काल मा बिदकु, कण्ण इन नीर वाहुस वाहुसकु आऊन से गिळगिळास्कु विनती माळदुर कि अगागी वंश इनव हामान उन बुराई अदिक यहूदीगोळ्द नुकसान इन आऊन युक्ति रद्द माळकु आगुल. 4 आग राजा एस्तेर उन दी व्हान्ना अन्द राजदण्ड वाळुसदुन. 5 आग एस्तेर येदकु राजा अन्द मुंद नीदुरदुर; अदिक अनली कुरतुर, "अगर राजा अक स्वीकार इरूल अदिक आव नान से प्रसन्न आन अदिक ईद मात आऊक वळ्लीद जानस्कु बिळतद, अदिक ना भी आऊक वळ्लीद हत्तेतीन, रा जो चिट्टीगोळ हम्मदाता अगागी इन पार हामान राजा अन्द सप्पा प्रान्तगोळ्द यहूदीगोळ इक नष्ट माळोद योजना माळकु लिखसीदुर, आ चिट्टीगोळी रद्द माळोर साटी लिख्‍सकु आगुल. 6 यतिकी ना तान कुल इन लॉकुर मा बिळावाळा आ विपत्ती इक या रीती देल नोळ सकाईन? ना तान वार्टुर्द विनाश इक ह्यांग नोळ सकाईन?" 7 आग राजा क्षयर्ष एस्तेर रानी से अदिक मोर्दकै यहूदी से अंदुन, "ना हामान उन मान्ना मार रा एस्तेर उक कोट्ट बुट्टीन, अदिक आव फाँसी इन खम्भा मा लटकुसकु आग्यान, इदुरसाटी कि आव यहूदीगोळी कोन्नोद कोशिश माळीदुन. 8 अत: नीव तान समझ इन अनुसार राजा अन्द हेसुर देल यहूदीगोळ हेसुर मा लिख्सी, अदिक राजा अन्द ऊँगरा अन्द छाप भी हच्ची; यतिकी जो चिट्टी राजा अन्द हेसुर देल लिख्‍सकु आगुल, अदिक अदुर मा आऊन ऊँगरा अन्द छाप हचकु आगुल, अदरी यारू रद्द माळ सकालुर." 9 अदा समय मतलब सीवान हेसुर इन तिसरा तिंगुळ इन तेईसवा दिन इक राजा अन्द लेखक कारूकु आदुर, अदिक या या मात इन आग्या मोर्दकै आंदरी कोटीदुन अदरी यहूदीगोळ इक अदिक अधिपतिगोळ इक अदिक भारत टु हुळकु कूश द्याश ताका, जो ऊंद सौ सत्ताईस प्रान्त आव, आ सप्पा अन्द अधिपतिगोळ अदिक हाकिमगोळ्द ऊंद ऊंद प्रान्त इन अक्षरगोळ दा अदिक ऊंद ऊंद द्याश इन लॉकुर्द भाषा दा, अदिक यहूदीगोळ इक आंदुर्द अक्षरगोळ्द अदिक भाषा दा लिख्‍सकु आत. 10 मोर्दकै राजा क्षयर्ष उन हेसुर देल चिट्टीगोळ लिख्सकु, अदिक अऊर मा राजा अन्द ऊँगरा अन्द छाप हचकु, तेज नळावाळेर सरकारी घ्वाळागोळ अदिक खच्चरगोळ मा सवारी माळावाळेर कय दा कळु बुट्टुन. 11 ई चिट्टीगोळ दा सप्पा नगरगोळ्द यहूदीगोळ इक राजा अन्द दी टु इजाजत कोटकु आत, कि आंदुर जमा आगुल अदिक तान तान जीव ऊळसोर साटी तयार आगकु, या जाती या प्रान्त इन लॉकुर अन्याय माळकु आंदरी या आंदुर आर्तेर अदिक बाल-बच्यागोळ इक दुख कोळोद चाहस्यान, आंदरी घात अदिक नष्ट माळुल, अदिक आंदुर धन दौलत लुट्‍स कोमुल. 12 अदिक ईद राजा क्षयर्ष इन सप्पा प्रान्तगोळ दा ऊंद अच दिन दा माळकु आगुल, मतलब अदार हेसुर इन हन्नेळवा तिंगुळ इन तेरवा दिन इक. 13 ई आग्या अन्द लेख इन नकलगोळ, पुरा प्रान्तगोळ दा सप्पा द्याशगोळ लॉकुर्द हात्ती तेरूकु कळुकु आत; ताकी यहूदी आ दिशी तान दुश्मनगोळ से बदला ताकोमली तयार ईरूल. 14 अत: सवारी माळावाळेर वेग देल नळसावाळेर सरकारी घ्वाळागोळ मा सवार आगकु, राजा अन्द आग्या देल फुर्ती माळकु जल्दी होटोदुर, अदिक ईद आग्या शूशन गढ़ दा कोटकु आगीत. 15 आग मोर्दकै निळा रंग अदिक बिळीद रंग इन राजकीय कपळा हाक्कु अदिक ताल्ला मा व्हान्ना अन्द धोळ मुकुट हुळकु, अदिक मलमल इन अदिक जांभळा रंग इन चादर होदुकु राजा अन्द मुंद टु होट्टुन, अदिक शूशन नगर इन लॉकुर आनन्द देल आऊन जयजयकार माळली कुरतुर. 16 यहूदीगोळ इक आनन्द अदिक हर्ष आत अदिक आंदुर्द धोळ प्रतिष्ठा आत. 17 अदिक या या प्रान्त, अदिक या या नगर दा, येल्यारा राजा अन्द आग्या अदिक नियम पोहचुसदव, अल अल यहूदीगोळ इक आनन्द अदिक हर्ष आत, अदिक आंदुर भोज माळकु आ दिन इक खुशी इन दिन मान्सदुर. अदिक आ द्याश इन लॉकुर दा टु हापाळ लॉकुर यहूदी बनसेदुर, यतिकी आंदुर मन दा यहूदीगोळ्द अंज्क सम्सकु ईरोद.