1 ✝सब कर ताकोमावाळेर अदिक पापी यीशु उन हात्‍ती बंदुर ताकी आऊन केळुल. 2 पर फरीसी अदिक नियम इन गुरु कुळकुळुस्कु अनली कुरतुर, "ईव पापीगोळ से सिकतान अदिक आंदुर सांगुळ तिनतान." 3 आग आव आंदुर से ईद उदाहरण अंदुन:

4 "नीम दा टु याव आन यार्द सौ म्यांडागोळ ईरूल, अदिक अऊर दा टु ऊंद काळ्दोगुल, रा नीन्यानव म्यांडागोळी आळी दा बिटकु, आ काळ्द म्यांडा अक यागासताका सिक्‍काल आगासताका ढुंढ्सतेला ईरबाळुल? 5 अदिक याग सिक्‍केगताव, आग आव बळा खुशी देल अदरी खांदा मा नेगु बुळतान; 6 अदिक मान्या बंदकु संगीगोळी अदिक मान्ना हातळोर लॉकुरी जमा माळकु अनतान, ‘नान सांगुळ खुशी माळी, यतिकी नान म्यांडा जो काळ्दोगीत सिक्‍केग्याद.’ 7 ना नीम से अनतीन कि ईदा रीति देल ऊंद मन तिर्गुसावाळा पापी इन बारा दा भी स्वर्ग दा ईट अच खुशी आदीत, याट कि नीन्यानव ईत्‍ता न्यायीगोळ्द बारा दा आगाल्द, जो पाप माळोद पयला अच बिट बुटार.

8 "या याक हिंग आर्त ईतीदार यार्द हात्‍ती हत्‍त सिक्‍कागोळ ईरूल, अदिक अऊर दा टु ऊंद काळ्दोगुल, रा आक दिंग्या होत्‍ताकु अदिक मान्ना उळ्ग उळ्गकु, यागासताका आ सिक्‍का सिक्‍केगाल जी जान हचकु ढुँढ्सतीदिल? 9 अदिक याग सिक्‍केगतद, रा आक तान सैलीगोळी अदिक मान्ना बाजुवाळेर इक जमा माळकु अनतार, ‘नांद सांगुळ खुशी माळी, यतिकी नांद सिक्‍का जो काळ्दोगित सिक्‍केग्याद.’ 10 ना नीम से अनतीन कि ईदा रीति देल ऊंद मन तिर्गुसावाळा पापी अन्द बारा दा परमेश्वर उन स्वर्गदूतगोळ्द मुंद खुशी आगतद."

11 बाक यीशु अंदुन, "यावारा मंळसा नव येढ्ढ चिकोर ईरोर. 12 आंदुर दा टु स्याणेव आप्प से अंदुन, ‘हे आप्पा, संपत्‍ती दा टु जो भाग नांद आद अद नानी कोटबुळी.’ आव आंदरी तान सम्पत्ति वाट्सदुन. 13 यक्कुल दिन बित्सलीका ईरव कि स्याणेव पार सब येनारा जमा माळकु दुर द्याश इक होटोदुन, अदिक अल कुकर्म इन क्याल्सा दा तान सप्पा सम्पत्ति हार्स बुट्टुन. 14 याग आव सब येनारा खर्च माळ कोंडुन, रा आ द्याश दा धोळ्द अकाल बित्‍त, अदिक आव कंगाल आगेदुन. 15 इदुरसाटी आव आ द्याश दा अल ईरावाळा ऊंद मंळसा अन्द मान्या क्याल्सा नोळली होदुन. आव आऊक तान केय दा हंदी आळसोर साटी कळुदुन. 16 अदिक आव चाहासोन कि अव फल्लीगोळ से यवरी हंदी तिनव, तांद व्हाट्टा तुम्मुल; अदिक आऊक याऊ येनु ईला कोळोन. 17 याग आव तान होश दा बंदुन आग अनली कुरतुन, नान आप्प ऊंद यासारा अच मजदूरगोळी व्हाट्टा से यक्कुल रोट्टी सिकताव, अदिक ना ईल उपास सायेतिन. 18 ना ईग यदकु तान आप्प उन हात्‍ती होगाईन अदिक आऊन से अनाईन कि हे आप्प, ना स्वर्ग इन विरोध दा अदिक नीन नजर दा पाप माळदीन. 19 ईग ई लायक ईतीदील कि नानी नीन पार अंदकु आगुल, नानी तान ऊंद मजदूर उन घाई ईट कोम. 20 आग आव यदकु, तान आप्प उन हात्‍ती होदुन:

"आव ईगल्या दुर अच ईरोन कि आऊन आप्प उक आऊक नोळकु दया बत्‍त, अदिक ओळतेला आऊक तान याद्दा से हचदुन, अदिक आऊंद हापाळ चुम्मा ताकोंडुन. 21 पार आऊन से अंदुन, ‘हे आप्प, ना स्वर्ग इन विरोध दा अदिक नीन नजर दा पाप माळीन; ना ईग नीन पार अना लायक ईतीदील.’ 22 लेकीन आप्प तान दासगोळ से अंदुन, ‘जल्दी वळ्लीसा सा वळ्लीसा कपळा तेगुकु आऊक हाकसुसी, अदिक आऊंद कय दा ऊँगरा, अदिक कालगोळ दा केरू हाकसुसी, 23 अदिक पाल्सद व्हात तनकु कोण्णी ताकी नाव तिनदेव अदिक खुशी मान्सेव. 24 यतिकी नानव ईव पार सोतोगिदुन, बाक जित्‍ता आग्यान: काळ्दोगिदुन, ईग सिक्‍केग्यान.’ अदिक आंदुर खुशी माळली कुरतुर.

25 "लेकीन आऊन धोळ पार केई दा ईरोन. याग आव बरतेला मान्ना अन्द हात्‍ती पोहचुसदुन, रा आव गाना मुरसोद अदिक कुण्णोद आवाज केळदुन. 26 इदुरसाटी आव ऊंद दास उक कारूकु केळदुन, ‘ईद येन आगेत्याद?’ 27 आव आऊन से अंदुन ‘नीन स्याणेव वार्ट बंदान, अदिक नीन आप्प आऊक भला चंगा नोळ्यान, इदुरसाटी नीन आप्प धोळ्द पाल्सद व्हात कळसुस्यान.’

28 "ईद केळकु आव सिट्ट देल तुम्मेदुन अदिक बुळ्क होगोद चाहासीदिल, लेकीन आऊन आप्प व्हार्या बंदकु आऊक मनुस्ली कुरतुन. 29 आव तान आप्प उक उत्‍तर कोट्टुन, ‘नोळ, ना ईस वर्ष टु नीन स्यावा माळीतीन अदिक ना यागलु भी नीन आग्या टाल्सीदील, तरी नी नानी यागलु ऊंद मर्री इन पाड्डा भी कोटीदील कि ना अदरी वोतकु तान संगीगोळी सांगुळ खुशी माळाईन. 30 लेकीन याग नीनव ईव पार बंदुन, याव नीन सप्पा संपत्‍ती वेश्यागोळ मा हार्स बुट्टुन, तरी आऊन साठी नी धोळ्द पाल्सद पाड्डा कळसुस बुट.’ 31 आप्प तान धोळ पार उन से अंदुन, ‘नान पारा, नी हमेशा नान सांगुळ ईत्या; अदिक जो येनारा नांद आद अद सप्पा अपमान अच हुन. 32 लेकीन नामी ईग खुशी माळोद अदिक मग्न ईरोद आद यतिकी नीनव ई वार्ट सोतोगिदुन, ईग जित्‍ता आगेग्यान; अदिक पयले काळ्दोगिदुन, ईग सिक्‍केग्यान.’"