1 अखमीरी रोट्टी अन हाब्ब जो फसह कहलुसतद, हात्‍ती ईरोद; 2 अदिक प्रधान याजक अदिक नियम इन गुरु ई मात इन खोज दा ईरोर कि यीशु उक ह्यांग कोंद बुटेव, पर आंदुर लॉकुर से अंजतोगोर.

3 आग शैतान यहूदा दा समुस्त, जो इस्करियोती कहलुस्तान अदिक हन्नेळ चेलागोळ दा आळुकु आगतोगोन. 4 आव यहूदा दा होगकु प्रधान याजकगोळ अदिक मंदिर इन पहरेदारगोळ्द सरदारगोळ सांगुळ मातचीत माळदुन कि यीशु उक याता प्रकार आंदुर कय देल हुळसुस्यार. 5 आंदुर खुश आदुर, अदिक आऊक पैस्या कोळोर साटी तयार आदुर. 6 आव मान्स कोंडुन, अदिक मौका ढुंढ्सली कुरतुन कि याग भीळ ईरतीदील रा आऊक आंदुर कय देल हुळसुस कोंडेव.

7 आग अखमीरी रोट्टी इन हाब्ब इन दिन बत्‍त, यारदा फसह म्यांडा अन्द पाड्डा अन्द बलि कोळोद जरूरी ईरोद. 8 यीशु पतरस अदिक यूहन्ना अक ईद अनकु कळुदुन: "होगकु नाम फसह अन्द ऊमोद तयारी माळी."

9 आंदुर आऊन से केळदुर, "नी यल चाहासत्या कि नाव इदरी तयार माळेव?"

10 आव आंदुर से अंदुन, "नोळी, नगर दा प्रवेश माळतेला अच ऊंद मंळसा नीर इन माळका नेगुकु नीमी सिक्यान; याता मान्ना दा आव होदान नीव आऊन हिंद होटोगेतीर, 11 अदिक आ मान्ना अन स्वामी से अनेतीर: ‘गुरु नीन से अनतान कि अद पाऊनागोळ्द कमरा यल आद यदुर दा ना तान चेलागोळ सांगुळ फसह अन्द भोजन तिनाईन?’ 12 आव नीमी ऊंद सजुस्द धोळ्द म्याकुच इन कमरा तोरस्यान; अल्या तयारी माळेतीर.

13 "आंदुर होगकु, ह्यांग यीशु आंदुर से अंदिदुन, हांग अच नोळदुर अदिक फसह अन्द भोजन तयार माळदुर."

14 याग घळी होट्ट बत्‍त, रा आव चेलागोळ सांगुळ ऊमली कुरतुन. 15 अदिक आव आंदुर से अंदुन, "नान हापाळ इच्छा ईरोद कि दुख भोगसोर से पयले ईद फसह अन्द भोजन नीम सांगुळ तिनाईन. 16 यतिकी ना नीम से अनतीन कि यागासताका अद परमेश्वर उन राज्य दा पुरा आगाल आगासताका ना अदरी यागलु तिनतीदील."

17 आग यीशु कटोरा हुळकु धन्यवाद माळदुन अदिक अंदुन, "इदरी हुडी अदिक आपस दा वाट्स कोमी. 18 यतिकी ना नीम से अनतीन कि यागासताका परमेश्वर उन राज्य बराल्द आगासताका ना अंगुर इन रास्सा ईगी टु यागलु कुडुतीदील."

19 बाक आव रोट्टी हुळदुन, अदिक धन्यवाद माळकु मुरदुन, अदिक आंदरी ईद अनतेला कोट्टुन, "ईद नांद शरीर हुन जो नीम साठी कोटकु आगतद: नांद याद इन साठी ईदा माळतोगी." 20 ईदा रीति देल आव भोजन इन बाद्दा कटोरा भी ईद अनतेला कोट्टुन, "ईद कटोरा नांद आ खुन इन व्हाशोद वाचा हुन. जो नीम साठी वाहुसकु आगतद.

21 "पर नोळी, नानी हुळसुसावाळा अन कय नान सांगुळ मेज मा आद. 22 यतिकी मंळसा अन पार रा जसा आऊन साठी ठहरूस्कु आग्याद, हांग अच आव सोत्‍तान, पर हाय आ मंळसा मा यार्द द्वारा आव हुळसुस्कु आदान!"

23 आग आंदुर आपस दा विचार माळली कुरतुन कि नाम दा टु याव आन, जो ईद क्याल्सा माळ्यान.

24 ✝आंदुर्दा ईद वाद-विवाद भी आत कि आंदुर दा टु याव धोड्डेव सम्सकु आगतान. 25 यीशु आंदुर से अंदुन, "गैरयहूदीगोळ्द राजा आंदुर मा प्रभुता माळतार; अदिक जो आंदुर मा अधिकार ईटतार, आंदुर उपकार माळावाळेर कहलुस्तार. 26 ✝✝लेकीन नीव हिंग आगबाळेतीर; उलटा जो नीम दा धोड्डेव आन, आव स्याणेव उन घाई अदिक जो स्याणा आन, आव सेवक उन घाई आगुल. 27 ✝धोड्डेव याव आन, आव जो ऊमोर साटी कुर्तकु आन, या आव जो स्यावा माळतान? येन आव ईला जो ऊमली कुर्तकु आन? लेकीन ना नीम न्याड्या सेवक उन घाई आईन.

28 "नीव आंदुर हुईर, जो नान परीक्षागोळ दा लगातार नान सांगुळ ईतीर; 29 अदिक ह्यांग नान आप्प नानी राज्य मा अधिकार कोटान, हांग अच ना भी नीमी हांग अच अधिकार कोळतीन, 30 ✝ताकी नीव नान राज्य दा नान मेज मा तिनी-कुडी, उलटा सिंहासनगोळ मा कुर्तकु इस्त्राएल इन हन्नेळ वंशगोळ्द न्याय माळी.

31 "शमौन, हे शमौन! शैतान नीम लॉकुरी परखुसोर साटी आग्या बेळ कोंडान कि बेकार दा टु वळ्लेर इक अलग माळुल ह्यांग केईवाळा गोदी दा टु फरकंडा अलग माळतान, 32 लेकीन ना नीन साठी विनती माळदीन कि नीन विश्वास गोर्त आगबाळुल; अदिक याग नी वापस बंद्या, रा तान वार्टुर इक हिम्मत कोळेत."

33 पतरस यीशु से अंदुन, "हे प्रभु, ना नीन सांगुळ बंदीगृह दा होगली, अदिक सायली भी तयार आईन."

34 यीशु अंदुन, "हे पतरस, ना नीन से अनतीन कि ईंद हुंज कुग्गतिदील आगासताका नी मुर घन नांद इनकार माळ कोंड्या कि नी नानी जान्साल."

35 ✝बाक यीशु आंदुर से अंदुन, "याग ना नीमी चीला, झ्वारा, अदिक जुता बिना कळीदीन, रा येन नीमी यातोदारा वस्तु उन कमी आगीत?"

"आंदुर अंदुर, यातोदु वस्तु उन ईला."

36 आव आंदुर से अंदुन, "लेकीन ईग यार्द हात्‍ती चीला आद आव अदरी हुडुल अदिक हांग अच झ्वारा भी, अदिक यार्द हात्‍ती तलवार ईला ईतीदाद आव तान कपळा मारकु ऊंद कोंड कोमुल." 37 यतिकी ना नीम से अनतीन, कि ईद जो लिख्सकु आद: "अद अपराधीगोळ सांगुळ आळुकु आग्याद, अदुर्द नान दा पुरा आगोद जरूरी आद; यतिकी नान बारा दा लिख्सद मातगोळ पुरा आगदुर मा आव."

38 आंदुर अंदुर, "हे प्रभु, ईल येढ्ढ तलवारगोळ आव."

आव आंदुर से अंदुन, "हापाळ आव."

39 आग यीशु व्हार्या होटकु तान रीति इन अनुसार जैतून इन पहाळी मा होदुन, अदिक चेलागोळ आऊन हिंद आगेदुर. 40 आ जागा दा होगकु आव आंदुर से अंदुन, "प्रार्थना माळी कि नीव परीक्षा दा बिळबाळी."

41 आव आंदुर से अलग लगभग कल्ल भीळोद ईट दुर ताका होदुन अदिक ट्वांगरा टेक्सकु प्रार्थना माळली कुरतुन, 42 "हे आप्पा, अगर नी चाहास्या रा ईद दुख देल तुम्द कटोरा अक नान हात्‍ती टु सर्कुसबुळ, तरी भी नान ईला लेकीन नीन इच्छा पुरा आगुल." 43 आग स्वर्ग दा टु ऊंद स्वर्गदूत आऊक कांळ्सदुन जो आऊक सामर्थ्य कोळतोगोन. 44 आव हापाळ व्याकुल आगकु मात्‍त यक्कुल वेदना देल प्रार्थना माळली कुरतुन; अदिक आऊन पच्ची रा खुन इन धोळ्द-धोळ्द बुंद इन घाई धरती मा बिळतोगोद.

45 आग आव प्रार्थना माळकु येद्दुन अदिक तान चेलागोळ्द हात्‍ती बंदकु आंदरी उदासी इन मारा देल मिंग्त नोळदुन 46 अदिक आंदुर से अंदुन, "येती मिंगेतीर? येळी, प्रार्थना माळी कि नीव परीक्षा दा बिळबाळी."

47 यीशु ईद अंत अच ईरोन कि ऊंद भीळ बत्‍त, अदिक आ हन्नेळ दा टु ऊंद यार्द हेसुर यहूदा ईरोद आंदुर्द मुंद मुंद बरोन. आव यीशु उन हात्‍ती बंदुन कि आऊन गाल्ला अन्द चुम्मा ताकोम सकुल. 48 यीशु आऊन से अंदुन, "हे यहूदा, येन नी चुम्मा ताकोमकु मंळसा अन पार उक हुळसुसली बंद्या?"

49 आऊन चेलागोळ जो यीशु उन सांगुळ ईरोर याग नोळदुर कि येन आगावाळा आद, रा अंदुर, "हे प्रभु, येन नाव तलवार नळसेव?" 50 अदिक आंदुर दा टु ऊंद मंळसा महायाजक ऊंद दास मा तलवार नळ्सकु आऊन ऊम्मा किव हार्स बुट्टुन.

51 इदुर मा यीशु अंदुन, "ईग बस माळी." अदिक आऊन किव इक मुटकु आऊक वळ्लीद माळदुन.

52 आग यीशु प्रधान याजकगोळ अदिक मंदिर इन पहरेदारगोळ्द सरदारगोळ अदिक पुरनियागोळ से, जो आऊन मा येरकु बंदीदुर, अंदुन, "येन नीव नानी विद्रोह जान्सकु तलवारगोळ अदिक कोलगोळ हुडुकु होटीर? 53 ✝याग ना मंदिर दा हर रोज नीम सांगुळ ईरीन, रा नीव नानी हुडोद कोशिश माळीदील; पर ईद नीम समय आद, अदिक अंधकार इन राज आद."

54 बाक आंदुर यीशु उक हुडुकु ओतुर, अदिक महायाजक उन मान्या तंदुर. पतरस दुर दुर टु उच आऊन हिंद-हिंद नळुतोगोन; 55 अदिक याग आंदुर आंगुळ दा बेक्‍की होत्‍ताकु ऊंद ऊज्या कुरतुर, रा पतरस भी आंदुर न्याड्या दा कुरतोदुन. 56 आग ऊंद दासी आऊक सिगळी इन उजुळ दा कुर्त नोळकु अदिक आऊक वळ्लीसा नोळकु अनली कुरतुर, "ईव भी रा यीशु उन सांगुळ ईरोन."

57 लेकीन पतरस ईद अंदकु इनकार माळदुन, "हे आर्त, ना आऊक अरालीन."

58 थ्वाळासा समय इन बाद्दा यावारा दुसरा मंळसा आऊक नोळकु अंदुन, "नी भी रा आंदुर दा टु ऊंद हुय."

पतरस अंदुन, "हे मंळसा, ना आलच."

59 बाक मात्‍त ऊंद घंटा अन्द बाद्दा ऊंद मंळसा भरोसा माळकु अंदुन, "जरूर ईव भी रा आऊन सांगुळ ईरोन, यतिकी ईव गलीली हुन."

60 पतरस अंदुन, "हे मंळसा, ना जान्सालीन कि नी येन अनेत्या!"

आव अनतेला अच ईरोन कि तुरन्त हुंज कुग्त. 61 आग प्रभु तिर्गकु पतरस उन दी नोळदुन, अदिक पतरस उक प्रभु उन आ मात याद बत्‍त जो आव अंदिदुन: "ईंद हुंज इन कुग्गोर से पयला, नी मुर घन नान इनकार माळ्या." 62 अदिक आव व्हार्या होटकु हुदक्या कोट कोटकु वर्लदुन.

63 जो मंळसागोळ यीशु उक हुडुकु ईरोर, आंदुर आऊन मज्याक हार्सकु आऊक बडुली कुरतुर; 64 आंदुर आऊन कण्णगोळ मा पट्टी कटकु आऊन से केळदुर, "भविष्यवाणी हेळ कि नीनी याव बळदुन!" 65 अदिक आंदुर आऊन अपमान माळकु आऊन विरोध दा हापाळ सा मातगोळ अंदुर.

66 याग हागुल आत रा लॉकुर्द स्याणा अदिक प्रधान याजक अदिक नियम इन गुरु जमा आदुर, अदिक यीशु उक तान महासभा दा तनकु केळदुर, 67 "येन नी मसीह हुय? रा नाम से अंद बुळ!"

यीशु आंदरी उत्‍तर कोट्टुन, "अगर ना नीम से अनाईन, तरी भी नीव विश्वास माळतीदील; 68 अदिक अगर ना सवाल केळाईन रा नीव उत्‍तर कोळतीदील. 69 लेकीन ईगी टु ना मंळसा अन पार सर्वशक्तिमान परमेश्वर उन ऊमा कय दी कुर्तकु ईराइन."

70 इदुर मा सप्पा मुंदुर अंदुर, "रा येन नी परमेश्वर उन पार हुय?"

यीशु उत्‍तर कोट्टुन, "नीव खुद अच अंतीर, कि ना हुईन."

71 आग आंदुर अंदुर, "ईग नामी गवाही इन येन जरवत आद; यतिकी नाव खुद आऊन बाय देल केळ कोंडेव."