मीका 3

मीका अन द्वारा इस्त्राएल इन अगुआगोळ्द निंदा

1 ना अंदीन: हे याकूब उन प्रधानगोळा, हे इस्त्राएल इन घराना अन न्यायिगोळा, केळी! येन न्याय इन भेद जानसोद नीम क्याल्सा आल्लच? 2 नीव जो भलाई देल दुश्मनी, अदिक बुराई देल प्यार ईटतीर, मान्सी, नीव लॉकुर मा टु आंदुर तोगुल ईळ्स कोमतीर, अदिक आंदुर येलुगोळ मा टु आंदुर्द मास तेग्द बुळतीर; 3 लेकीन नीव नान लॉकुर्द मांस भी तिन कोमतीर, अदिक आंदुर्द तोगुल भी छिल्स बुळतीर; नीव आंदुर्द येलुगोळी स्वार्रा दा बेईसोर साटी मुर्द बुळतीर अदिक आंदुर्द मास गळग्या दा बेईसोर साटी तुकळा तुकळा माळतीर. 4 आंदुर आ समय यहोवा अन दोहाई कोट्टार, लेकीन आव आंदुर केळतीदिल, लेकीन आ समय आव आंदुर्द बेकार क्याल्सागोळ कारण आंदुर से मार्रा तिर्गुस बुट्टान.

5 यहोवा अन ईद वचन हुन जो भविष्यवक्ता नान प्रजा अक भटकुस बुळतार, अदिक याग आंदरी तिनली सिकतद आग "शांती, शांती" कारूतार, अदिक अगर यावारा आंदरी तिनली कोळालुर, रा आऊन खिलाप लळाई माळली तयार आगेगतार. 6 ई कारण नीम मा ईत्ता ईळ्लक बंदीत, कि नीमी दर्शन सिकतीदील, अदिक नीव ईत्ता अंधार दा बिद्दीर कि भावी अन सकतीदिल. भवष्यवक्तागोळ साटी सुर्य मुळकीत, अदिक हागुल इन होती भी आंदुर मा अंधार आगकु ईत्तीत. 7 दर्शन तोर्सावाळेर शर्मिंदा आदार, अदिक भावी अनावाळेर मार्रगोळ करेव आदाव; अदिक आंदुर सप्पा च्या सप्पा तान बाय इदुरसाटी मुच्यार कि परमेश्वर दी टु उत्तर सिकाल. 8 लेकीन ना रा यहोवा अन आत्मा देल शक्ति, न्याय अदिक ताकत हासिल माळकु परिपुर्ण आईन कि ना याकूब उक आऊन अपराध अदक इस्त्राएल इक अदुर्द पाप जतुस सकाईन.

9 हे याकूब उन घराना अन प्रधानगोळा, हे इस्त्राएल इन घराना अन न्यायीगोळा, हे न्याय से घृणा माळावाळेरा अदिक सप्पा सीधा मातगोळी वाकळा तिकळा माळावाळेरा, ईद मात केळी. 10 नीव सिय्योन नगर इन हत्या माळकु अदिक यरूशलेम इक कुटीलता माळकु मजबूत माळतीर. 11 अदुर्द प्रधानगोळ घुस ताकोम ताकोमकु विचार माळतार, अदिक याजक दाम ताकोम ताकोमकु व्यवस्था कोळतार, अदिक भविष्यवक्ता पैस्या साटी भविष्य हेळावाळेर अनतार; तरी भी आंदुर ईद अंदकु यहोवा मा भरोसा ईटतार, "यहोवा नाम बीच दा आन, इदुरसाटी यातोदु विपत्ति नाम मा बरतीदील." 12 इदुरसाटी सिय्योन नीम कारण जोत्सकु केई माळकु आदीत, अदिक यरूशलेम खण्डरगोळ्द ढेर आगेदीत, अदिक याता पहाळी मा भवन बन्सकु आद, अद आळी इन ऊचा स्थान घाई आगेदीत.